TIMEƔRI 5
D acu i geqsed Ṛebbi i lqaɛa?
1. Acimi i d-yexleq Ṛebbi lqaɛa?
Yahwa yefka lqaɛa i lɛibad. Lqaɛa-yagi ţ-ţanezduɣt-nneɣ. Argaz ţ-ţmeṭṭut imezwura, Adam d Ḥewwa, ur d-ţwaxelqen ara iwakken ad ɛemmṛen igenwan. Ṛebbi ixleq-ed yakan lmuluk bac ad ɛicen deg igenni. (Yub 38:4, 7) Yessers argaz amezwaru deg yiwet n lǧennet igerrzen yeţţusemman leǧnan (tibḥirt) n Ɛidin. (Laṣel n ddunit 2:15-17) Yahwa yefka tagniţ i Adam akk-d tarwa-s bac ad ɛicen i dima ɣef lqaɛa.—Ɣer Ahellil 37:29; 115:16.
Di tazwara, ala leǧnan n Ɛidin i gellan d lǧennet. Adam d Ḥewwa yeţţunefk-asen lameṛ a d-sɛun dderya bac ad ɛemmṛen lqaɛa. Yeţţunefk-asen daɣen lameṛ a d-lhin d lqaɛa meṛṛa w’a ţ-rren d lǧennet. (Laṣel n ddunit 1:28) D lmuḥal aţ-ţenger lqaɛa. Aţ-ţeqqim dima ţ-ţanezduɣt n lɛibad.—Ɣer Amusnaw 1:4.
Wali bidyu Acimi i d-yexleq Ṛebbi lqaɛa?
2. Acuɣer ur telli ara lqaɛa d lǧennet?
Adam d Ḥewwa ɛuṣan Yahwa. Yessufeɣ-iten-id ihi si leǧnan n Ɛidin. Lǧennet-nni tṛuḥ-asen yerna ulac amdan i gessawḍen a ţ-id-yerr. Adlis Iqedsen yenna-d: “Tamurt teţţusellem s afus n wemcum.”—Yub 9:24; Ɣer Laṣel n ddunit 3:23, 24.
Eɛni Yahwa yerra di ṭṭerf lmeqsud-is yeɛnan lɛibad? Ala! Ṛebbi d Bab n Tezmert, lebɣi-ines dima iḍerru-d. (Icɛaya 45:18) Ad yexdem ayen ilaqen bac a d-yeḍru wayen akk i geqsed i yemdanen si tazwara.—Ɣer Ahellil 37:11, 34.
3. Amek ara tuɣal lqaɛa d lǧennet?
Lqaɛa aţ-ţuɣal d lǧennet di lweqt ideg ara yeḥkem Ɛisa, Agellid i gextaṛ Ṛebbi. Ɛisa ad yessenger iɛdawen meṛṛa n Ṛebbi deg yiwet n lgirra yeţţusemman deg Wedlis Iqedsen Harmagidun. Di lgirra-yagi, ad ilin lmuluk ɣer tama-s. Mbeɛd, ad yerr Cciṭan ɣer lḥebs 1 000 n iseggasen. Iqeddacen n Ṛebbi ad menɛen si nnger-agi axaṭer a ten- iwelleh Ɛisa w’ad iḥareb fell-asen. Ad izmiren ad ɛicen i dima di lǧennet ɣef lqaɛa.—Ɣer Aweḥḥi 20:1-3; 21:3, 4.
4. Melmi ara kfunt lemḥayen?
Melmi ara yemḥu Ṛebbi cceṛ? Ɛisa yefka-d “limaṛa” ara d-ibeggnen belli teqreb-ed taggara. Ass-a, liḥala n ddunit ur teḍmin ara belli ad yidir wemdan azekka. Liḥala-yagi teţbeggin-ed ihi belli tewweḍ-ed “taggara n ddunit.”—Ɣer Matta 24:3, 7-14, 21, 22.
Ɛisa a d-yeḥkem seg igenni ɣef lqaɛa 1 000 iseggasen. Di lweqt-agi ideg ara yeḥkem, ad yekkes meṛṛa lemḥayen yellan. (Icɛaya 9:5, 6; 11:9) Ad yili d Agellid, ad yili daɣen d Lmuqeddem Ameqran: ad yemḥu ddnubat n wid iḥemmlen Ṛebbi. Ṛebbi ad yessexdem Ɛisa bac ad yekkes lehlak, tewser akk-d lmut.—Ɣer Icɛaya 25:8; 33:24.
5. Menhu ara iɛicen di lǧennet?
Di Tzeqqa n Tgelda, a d-temlileḍ imdanen i gḥemmlen Ṛebbi, i geţnadin daɣen ad ẓren d acu i glaq ad xedmen akken a s-ɛeǧben.
Imdanen yeţḍuɛun Ṛebbi ad ɛicen di lǧennet. (1 Yuḥenna 2:17) Ɛisa yeḍleb i inelmaden-is ad nadin ɣef lɛibad yesɛan annuz w’a sen-sselmden d acu i glaq ad xedmen bac ad ţwaqeblen sɣur Ṛebbi. Ass-a, Yahwa la d-iţheggi imelyan n lɛibad akken ad ɛicen ɣer zdat di lǧennet ɣef lqaɛa. (Ṣafanya 2:3) Deg imukan n leɛbada n Inagan n Yahwa, yeţţusemman Tizeɣwa n Tgelda, imdanen lemmden akken ad uɣalen d imezwaǧen neɣ d ibabaten n lɛali, ţ-ţilawin neɣ ţ-ţiyemmatin n lɛali. Imawlan akk-d dderya-nsen ɛebbden Ṛebbi lwaḥid di Tzeɣwa-yagi. Lemmden amek ara wennɛen tudert-nsen s uselmed i ţţafen deg Wedlis Iqedsen.—Ɣer Mixa 4:1-4.
