Imukan ideg i neţţeɛbad Ṛebbi ţţusemman Tizeɣwa n Tgelda axaṭer deg-​sen i d-​iţţunefkay uselmed seg Wedlis Iqedsen yeɛnan Tagelda n Ṛebbi. Ɣef Tgelda-​yagi i gella yeţberriḥ Ɛisa.—Luqa 8:1.

D imukan i leɛbada n ṣṣeḥ. Tazeqqa n Tgelda d amkan ideg i d-​ţheggin Inagan n Yahwa ayen akk iwulmen bac ad iţţubecceṛ lexbaṛ n lxiṛ deg wemḍiq i d-​yezzin i Tzeqqa-​yagi. (Matta 24:14) Tizeɣwa n Tgelda ur ţţemcabint ara meṛṛa, la di temɣer la di lebni, yerna akken ma llant ur zewwqent ara sennig n wayen ilaqen. Mkul yiwet seg-​sent tessexdam-​iţ yiwet n tejmaɛt neɣ kteṛ. Imi xilla n tjemmuyaɛ i d-​yernan, d luluf n Tzeɣwa i nebna deg iseggasen-​agi iɛeddan (lqider n xemsa deg wass). Amek armi i nessaweḍ a nexdem annect-​agi meṛṛa?—Matta 19:26.

Bnant s tukciwin i d-​iţţunefken i lmend n lebni n Tzeɣwa n Tgelda. Tukciwin-​agi ţţuceggɛent i Bitil; mbeɛd Bitil yeţmuddu-​tent i tjemmuyaɛ i geḥwaǧen ad bnunt neɣ ad ṣeggment Tazeqqa n Tgelda.

Bennun-​tent iwaziwen i d-​yeţţasen si yal lǧiha. Deg waṭas n tmura, llant trebbuyaɛ ibennun Tizeɣwa n Tgelda. Ţţilin deg-​sent iwaziwen akk-​d iqeddacen ibennun Tizeɣwa-​yagi. Ţṛuḥun si tejmaɛt ɣer tayeḍ, ula ɣer imukan iḍerrfen, bac ad ɛiwnen irfiqen-​nsen di ddin ad bnun imukan i leɛbada. Di tmura nniḍen, kra n Inagan i gkesben ṣṣifat ilezmen ţţuwekklen akken ad bedden ɣef lebni akk-​d uṣeggem n Tzeɣwa n Tgelda deg walbeɛḍ n leǧwahi. Xas akken aṭas n Inagan yesɛan lḥirfat i d-​yeţţasen ansi nniḍen iwakken ad fken afus n lemɛawna di lebni, d Inagan n tejmaɛt-​nni i gxeddmen ccɣel akk ameqran. Annect-​agi meṛṛa yeţwaxdem s lemɛawna n ṛṛuḥ n Yahwa akk-​d lmeǧhud n wegdud-​is.—Ahellil 127:1; Ikulusiyen 3:23.

• Acuɣer i ţţusemman imukan-​nneɣ n leɛbada Tizeɣwa n Tgelda?

• Amek i nbennu Tizeɣwa n Tgelda di ddunit kamel?