Aṭas n leḥwayeǧ n diri i xedment ddyanat s yisem n Ṛebbi. Meɛna, ma yella Ṛebbi d leḥmala, acuɣer i xedment leḥwayeǧ-agi? Axaṭer ddyanat-agi d ddyanat n lekdeb; ayen i d-qqarent d wayen i xeddment yessemsax isem n Ṛebbi. Amek meḥsub? D acu i geţxemmim Ṛebbi ɣef wayagi? D acu ara sent-yexdem Ṛebbi i ddyanat-agi?

1. Ayen i sselmadent ddyanat n lekdeb yessebɛad imdanen ɣef Ṛebbi. Acuɣer?

Ddyanat n lekdeb ‘beddlent tideţ n Ṛebbi s lekdeb’ (Iṛumaniyen 1:25). Ɣef lemtel, amur ameqran n ddyanat ur sselmadent ara isem n Ṛebbi i lɣaci, ɣas akken Adlis Iqedsen yeqqar-ed belli ilaq a nessexdam isem-is (Iṛumaniyen 10:13, 14). Uyerna, kra n yemḍebbren n ddyanat qqaren-d belli, m’ara d-teɣli fell-aneɣ twaɣit, d Ṛebbi i ɣ-ţ-yebɣan. Meɛna d lekdeb. D lmuḥal ad yexdem Ṛebbi cceṛ (ɣer-ed Yeɛqub 1:13). Lekdubat-agi n ddyanat ssebɛden lɣaci ɣef Ṛebbi; ayagi d ayen yesseḥzanen.

2. Ayen i xeddment ddyanat n lekdeb yessebɛad imdanen ɣef Ṛebbi. Acuɣer?

Lexdayem n ddyanat n lekdeb mačči am lexdayem n Yahwa. Adlis Iqedsen yeqqar-ed belli ddnubat n ddyanat n lekdeb “bbwḍen igenni” (Aweḥḥi 18:5). Seg wacḥal n leqrun aya, ddyanat-agi ssekcament iman-nsent di lbulitik, di lgirrat, yerna llant d ssebba n lmut n imelyunen n lɣaci. Kra n yemḍebbren n ddyanat ţɛicin di lerbaḥ yerna ḥemmlen ad ḍelben idrimen i lɣaci. Lefɛayel-agi meṛṛa sbegginen-d belli ddyanat-agi ur ssinent ara maḍi Ṛebbi yerna ur uklalent ara a d-hedṛent s yisem-is (ɣer-ed 1 Yuḥenna 4:8).

3. Acu i geţḥussu Ṛebbi m’ara yeţwali ayen i xeddment ddyanat n lekdeb?

Tzeɛɛfeḍ m’ara teţwaliḍ ayen akk i xeddment ddyanat n lekdeb? Ihi ɛlaḥsab-ik, d acu i geţḥussu Yahwa? Yahwa iḥemmel imdanen, meɛna yezɛef ɣef yemḍebbren n ddyanat, i d-yeggaren lekdubat fell-as, yerna i gxeddmen cceṛ i lɣaci. Yewɛed belli ad negrent ddyanat n lekdeb yerna ‘ur neţţuɣal ara a tent-naf’ (Aweḥḥi 18:21). Ur yeţɛeṭṭil ara Ṛebbi ad yessenger ddyanat n lekdeb irkelli (Aweḥḥi 18:8).

 A NNADI A NEFHEM AKTEṚ

4. Ṛebbi ur iqebbel ara ddyanat meṛṛa

Aṭas n lɣaci i gɣilen belli ddyanat cbant iberdan yemxallafen yeţţawin akk ɣer Ṛebbi. Dɣa d ṣṣeḥ? Ɣret-ed Matta 7:13, 14, mbeɛd hedṛet ɣef westeqsi-yagi:

• Amek i d-iheddeṛ Wedlis Iqedsen ɣef webrid yeţţawin ɣer tudert?

Walit BIDYU-YAGI, mbeɛd hedṛet ɣef westeqsi-yagi:

• Ɛlaḥsab n Wedlis Iqedsen, aṭas n ddyanat i gɛeǧben i Ṛebbi?

 6. Ṛebbi yebɣa a d-isellek imdanen si ddyanat n lekdeb

Ɣret-ed Aweḥḥi 18:4 a, mbeɛd hedṛet ɣef westeqsi-yagi:

• S wacu i teţḥussuḍ imi i teẓriḍ belli Ṛebbi yebɣa a d-isellek imdanen i ţkellixent ddyanat n lekdeb?

7. Kemmel ţnadi aţ-ţissineḍ Ṛebbi

Ayen i d-qqarent d wayen i xeddment ddyanat n lekdeb yewwi-d ad ibeddel tamuɣli-inek ɣef Ṛebbi? Xayel-ed yiwen ilemẓi yugin ad yessemḥess i lewṣayat yelhan n baba-s. Yeffeɣ seg wexxam, yuɣal yeţɛici yir tamɛict. Baba-s ur yeqbil ara ayen i gxeddem mmi-s. Acuɣer d lbaṭel ma nenna-d belli d baba-s i d ssebba n yir tikli n mmi-s-agi amɛaṣi?

• Ma neţlummu Yahwa yerna ur neţnadi ara a t-nissin ɛlaǧal n wayen i xeddment ddyanat n lekdeb, d lḥeqq wayagi?

 AYEN I D-NELMED

Ddyanat n lekdeb ssebɛadent imdanen ɣef Ṛebbi axaṭer sselmadent ixemmimen ur nṣeḥḥa ara yerna xeddment leḥwayeǧ diri-tent. Ṛebbi ad yessenger ddyanat-agi n lekdeb.

A d-nesmekti

• Acu i teţḥussuḍ m’ara teţwaliḍ ayen i sselmadent d wayen i xeddment ddyanat lekdeb?

• Amek i geţwali Yahwa ddyanat n lekdeb?

• D acu ara sent-yexdem Ṛebbi i ddyanat n lekdeb?