Tagelda tebḍa ɣef sin
TAQSIṬ TIS 65
Tagelda tebḍa ɣef sin
TEẒRIḌ acimi i gcerreg wergaz-agi ajellab-is? D Yahwa i s-t-id-yumṛen. Argaz-agi d nnbi Aḥyah. Teẓriḍ d acu i d nnbi? D win yeţxebbiṛ Ṛebbi ɣef wayen ara yeḍrun ɣer zdat.
Aḥyah yeţmeslay dagi neţţa d Yarubɛam. Yarubɛam d argaz i gwekkel Sliman ɣef kra n ccɣel di lebni. Mi d-yemmuger Yarubɛam deg webrid, Aḥyah yexdem lḥaǧa yessewhamen. Yeddem-ed ajellab ajdid yellan ɣef yiri-s, icerreg-it ɣef 12 yeḥricen. Aḥyah yenna i Yarubɛam: ‘Ddem i yiman-ik ɛecṛa yeḥricen.’ Teẓriḍ ayɣer yefka Aḥyah ɛecṛa yeḥricen i Yarubɛam?
Nnbi Aḥyah yessefhem i Yarubɛam belli qrib ad yekkes Yahwa tagelda i Sliman. Yenna-yas daɣen: ‘Yahwa a k-yefk ɛecṛa leɛṛac; a d-grin kan sin leɛṛac i Raḥabɛam, mmi-s n Sliman, ara iḥekmen deg wemkan n baba-s.’
Mi gesla swayen yenna Aḥyah i Yarubɛam, Sliman izɛef ayendin, dɣa yeɛreḍ ad ineɣ Yarubɛam. Lameɛna Yarubɛam irwel ɣer Maṣer. Mi gɛedda kra n lweqt, yemmut Sliman. Yeḥkem 40 iseggasen, lameɛna tura d mmi-s Raḥabɛam i guɣalen d agellid. Asmi i gesla s lmut n Sliman, Yarubɛam yuɣal-ed ɣer tmurt n Isṛayil.
Raḥabɛam d agellid n diri. Qessiḥ ɣef wegdud akteṛ n baba-s Sliman. Yarubɛam d kra n imeqranen n Isṛayil ṛuḥen ihi ad ssutren i ugellid Raḥabɛam ad yiḥnin ɣef wegdud. Lameɛna ur sen-iḥess ara. Yuɣal qessiḥ akteṛ n zik. Dɣa agdud yerra Yarubɛam d agellid ɣef ɛecṛa leɛṛac, ma d sin leɛṛac-nni nniḍen, win n Binyamin akk-d win n Yahuda, qqimen ddaw n leḥkem ugellid-nsen Raḥabɛam.
Yarubɛam ur yebɣi ara ad iṛuḥ wegdud-is ɣer Yarucalim akken ad iɛbed di lemqam n Yahwa. Dɣa yexdem sin iɛejmiyen n ddheb yerna yewwi tagelda n ɛecṛa leɛṛac a ten-ɛebden. Tamurt ur tɛeṭṭel ara teččuṛ d leqher ţ-ţmenɣiwt.
Lameɛna yella ccwal ula di tgelda-nni n sin leɛṛac. Werɛad wwḍen xemsa iseggasen segmi yebda Raḥabɛam leḥkem, mi d-yuli ugellid n Maṣer ad innaɣ neţţa ţ-ţemdint n Yarucalim. Yeddem aṭas n igerrujen si lemqam n Yahwa. Twalaḍ? Ur iqqim ara lemqam aṭas n lweqt akken yella di tazwara.
1 Igelliden 11:26-43; 12:1-33; 14:21-31.
