Inagan n Yahwa ur ţcaraken ara di tsertit (lbulitik) ɛlaǧal n ddin. Ssebbat n leqrar-agi reṣṣant ɣef wayen yesselmad Wedlis Iqedsen. Ur nţekkay ara di trebbuyaɛ yessexdamen lḥerṣ, ur neţbuṭi ara ɣef ikabaren neɣ ɣef wid i d-tesbeddad tsertit, ur neţnadi ara a neṭṭef imukan di lḥukuma yerna ur neţcarak ara di lecɣal ara d-yawin abeddel n lḥukuma. Neţwali belli Adlis Iqedsen yefka-d ssebbat iṣeḥḥan i ɣ-yeţdemmiren a nesɛu tikli-yagi.

•   Nettabaɛ lemtel n Ɛisa, ur neqbil ara ad yeṭṭef amkan di tsertit. (Yuḥenna 6:15) Iweṣṣa inelmaden-is “ur [ţţilin] ara si ddunit” yerna yessefhem-asen akken ilaq belli ur d-yewwi ara ad ddun si lǧiha neɣ si tayeḍ di temsal icudden ɣer tsertit.—Yuḥenna 17:14, 16; 18:36; Marqus 12:13-17.

•   Neţţili d unṣiḥen i Tgelda n Ṛebbi. Ɣef Tgelda-yagi i d-yenna Ɛisa: “Linǧil n tgelda ad iţwabecceṛ di ddunit meṛṛa.” (Matta 24:14) Neţmettil-ed Tagelda n Ṛebbi, yerna neţţuwekkel a nberreḥ tisin-ines. Ɣef wannect-a ur nessekcam ara iman-nneɣ di lumuṛ yeɛnan tasertit n tmura meṛṛa, ula ţ-ţin ideg i neţɛici.—2 Ikurintiyen 5:20; Ifasusiyen 6:20.

•   Imi ur nessekcam ara iman-nneɣ di tsertit, nezmer a nehdeṛ akken i ɣ-yeɛǧeb ɣef lexbaṛ n lxiṛ i lɛibad meṛṛa, akken bɣun ilin ixemmimen-nsen yeɛnan tasertit. Nebɣa a d-nessken leqniɛa-nneɣ s lehduṛ-nneɣ d lefɛayel-nneɣ belli Tagelda n Ṛebbi aţ-ţefru uguren n lɛibad.—Ahellil 56:12.

•   Imi ur ɣ-iḥuza ara beṭṭu i d-tessasay tsertit, tesdukkel-aɣ tegmaţ n ṣṣeḥ, akken tebɣu tili tmurt-nneɣ. (Ikulusiyen 3:14; 1 Buṭrus 2:17) Lameɛna, ddyanat i gessekcamen iman-nsent di tsertit beṭṭunt lɛibad i tent-itebɛen.—1 Ikurintiyen 1:10.

 Neţqadar lḥukumat. Ɣas ma yella ur nxeddem ara tasertit, neţqadar lḥukuma i gesseddayen tamurt anda i neţɛic; ayagi yeɛdel d lameṛ n Wedlis Iqedsen i d-yeqqaren: “Mkul yiwen ad iḍuɛ lḥukumat ɛlayen.” (Iṛumaniyen 13:1) Neţqadar leqwanen, neţxelliṣ leɣrama yerna neţţak afus n lemɛawna di lmeǧhud i txeddem lḥukuma bac a d-tawi nnfeɛ i wegdud. Ur neţnadi ara a nesseɣli lḥukuma ibedden yakan; nettabaɛ lewṣaya n Wedlis Iqedsen i ɣ-d-iṭṭalaben a neẓẓall ɣef “igelliden akw-d wid yeṭṭfen imukan n lḥekma”, abeɛda m’ara d-iḥdeṛ lawan ad ṭṭfen kra n leqrarat yeɛnan tilelli di leɛbada.—1 Timutawus 2:1, 2.

 Neţqadar daɣen lɛibad nniḍen di lḥeqq i sɛan ad xtiṛen ayen i sen-yehwan di tsertit. Ɣef lemtel, ur neţnadi a nessexṛeb lbuṭ, ur neţnadi a nemneɛ i wiyaḍ ad buṭin.

 Ur neţcarak ara di tsertit: axemmim-agi d ajdid? Ala. Ţ-ţagi i d lɛeqliya i llan sɛan-ţ yemceggɛen akk-d imasiḥiyen nniḍen imezwura zdat n lḥukumat. Taktabt yeţţusemman Beyond Good Intentions tenna-d: “Ɣas ma yella imasiḥiyen imezwura ţwalin belli ilaq ad qadren lḥukumat, ur sen-d-iţban ara yeṣleḥ ad ţcaraken di tsertit.” Taktabt nniḍen yeţţusemman On the Road to Civilization tenna-d belli imasiḥiyen imezwura “ur llin ţţaṭṭafen ula d yiwen wemkan di tsertit.”

 Imi ur neţcarak ara di tsertit, a d-yawi wayagi lemḍerra i tmurt deg wayen yeɛnan laman? Ala. Nekni d imdanen imhenniyen yerna ulac d acu ara yagaden lḥekkam seg-neɣ. Di 2001, Takadimit taɣelnawt n tussniwin n tmurt n Ukṛanya tessufeɣ-ed yiwen n ṛṛabul fell-aneɣ, imi ur neţcarak ara di tsertit, tenna-d: “Ass-agi, kra ur sen-yeɛǧib ara ṛṛay n Inagan n Yahwa; ɣef ssebba-yagi abeɛda i ten-icuṛeɛ leḥkem n inaziyen d leḥkem asduklan n zik.” Acu kan, ula mi ten-ḥeqren lḥekkam iṣubyatiyen, Inagan “qqimen d imdanen yeţqadaren leqwanen. S ṣṣfa yerna mebla ma ḍemɛen kra, xedmen di leɛzayeb (lfirmat) n lɛamma akk-d lluzinat; ur llin ara maḍi d wid i gzemren a d-awin lemḍerra i nniḍam n leḥkem asduklan.” Akka daɣen ula d ass-a, ɛlaḥsab n ṛṛabul-agi, ayen is i ţţamnen d wayen i xeddmen Inagan n Yahwa “ur d-iţţawi ara lemḍerra deg wayen yeɛnan lehna d laman n tmurt, akken tebɣu tili.”