მთავარი თემა
გავრცელებული შეხედულება იეჰოვას მოწმეებზე
„მაიკს წლებია ვიცნობ. ის იეჰოვას მოწმეა. ყოველთვის მიკვირდა, რა უნდოდა ამ რელიგიაში. არ ვიცოდი, ვინ იყო იეჰოვა, არც ის ვიცოდი, რატომ არ ზეიმობდნენ მოწმეები დღესასწაულებს. ვფიქრობდი: ნეტა სექტაში ხომ არ არის-თქო მაიკი ჩათრეული?“ (ბეკი, კალიფორნია, აშშ).
«როდესაც ჩემმა მეზობლებმა იეჰოვას მოწმეებთან ბიბლიის შესწავლა დაიწყეს, ჩემთვის ვფიქრობდი: „ნეტა რატომ ჰქვიათ იეჰოვას მოწმეები? რა უცნაურად ჟღერს ეს სახელი რელიგიისთვის“» (ზენონი, ონტარიო, კანადა).
„მე და ჩემი ცოლი ეკლესიაში აღარ დავდიოდით, რის გამოც თავს ცოტა არ იყოს დამნაშავედ ვგრძნობდით. როცა იეჰოვას მოწმეებმა მოგვაკითხეს, ვიფიქრეთ, რომ მათ ამით ისარგებლეს. გვეგონა, რომ თუ ძირითად რელიგიებში ვერ ვიპოვეთ ის, რასაც ვეძებდით, ვერც იეჰოვას მოწმეების საეჭვო სექტაში ვიპოვიდით“ (კენტი, ვაშინგტონი, აშშ).
„გულწრფელად რომ გითხრათ, წარმოდგენა არ მქონდა, ვინ იყვნენ იეჰოვას მოწმეები და რა სწამდათ მათ“ (სესილი, ესბიერგი, დანია).
ალბათ გინახავთ, როგორ ქადაგებენ იეჰოვას მოწმეები კარდაკარ თუ საზოგადოებრივი თავშეყრის ადგილებში და როგორ სთავაზობენ ადამიანებს ბიბლიურ ლიტერატურას თუ ბიბლიის უფასო შესწავლას. შესაძლოა ეს ჟურნალიც იეჰოვას მოწმეებმა მოგცეს. მაგრამ მაინც არ იცით, ვინ არიან იეჰოვას მოწმეები. შეიძლება თქვენც იზიარებთ რომელიმე ზემოხსენებული ადამიანის აზრს.
თუ თავში მსგავსი კითხვები ან ფიქრები გიტრიალებთ, ვის უნდა მიმართოთ სწორი პასუხების მისაღებად? როგორ შეიძლება იმის გაგება, თუ რა სწამთ სინამდვილეში იეჰოვას მოწმეებს? როგორ ფინანსდება მათი საქმიანობა და თაყვანისმცემლობისთვის განკუთვნილი ადგილები? რატომ მოდიან ისინი თქვენს კართან ან რატომ გესაუბრებიან ქუჩაში?
„იეჰოვას მოწმეების შესახებ ინტერნეტში ბევრი რამ წამიკითხავს. მათზე ბევრი ჭორი და წინასწარშექმნილი არასწორი აზრი მსმენია. ამიტომ იეჰოვას მოწმეების მიმართ უარყოფითად ვიყავი განწყობილი“, — ამბობს ზემოთ ხსენებული სესილი. მაგრამ მას შემდეგ, რაც სესილი იეჰოვას მოწმეებს პირადად გაესაუბრა, თავის კითხვებზე ამომწურავი პასუხები მიიღო.
თქვენც ხომ არ ისურვებდით სიმართლე გაგეგოთ იეჰოვას მოწმეების შესახებ? საამისოდ, მიმართეთ ყველაზე სანდო და ზუსტი ინფორმაციის წყაროს — თავად იეჰოვას მოწმეებს (იგავები 14:15). ვიმედოვნებთ, რომ შემდგომი სტატიების მეშვეობით გაიგებთ, ვინ არიან იეჰოვას მოწმეები, რა სწამთ მათ და რა საქმიანობას ეწევიან.
