ჩვენი და-ძმები მთელ მსოფლიოში მსახურებისა თუ პირადი შესწავლის დროს წარმატებით იყენებენ jw.org-ის საწყის გვერდზე განთავსებულ აქტუალურ სტატიებს. მოდი ვნახოთ ზოგიერთი შემთხვევა.

პანდემია რამდენიმე თვის დაწყებული იყო, როცა კანადიდან ერთმა სარაიონო ზედამხედველმა შეგვატყობინა, რომ სტატია „როგორ გავუმკლავდეთ თვითიზოლაციას“ მაუწყებლების დაახლოებით 75 პროცენტმა მსახურებაში გამოიყენა. მაგალითად, ერთმა დამ თავის ექვს თანამშრომელს გაუგზავნა ამ სტატიის ბმული, რისთვისაც ზოგიერთმა მადლობა გადაუხადა.

ერთმა დამ, რომელიც მეუღლესთან ერთად ტოგოში მიმოსვლით მსახურებას ეწევა, ნათესავებსა და ნაცნობებს გაუგზავნა საწყის გვერდზე განთავსებული კიდევ ერთი სტატიის ბმული, რომლის სათაურიცაა „აპოკალიფსის ოთხი მხედარი“. მისმა მონდომებამ კარგი შედეგი გამოიღო და ის ახლა 7 ბიბლიის შესწავლას ატარებს.

პანდემიის გამო ზოგიერთ ქვეყანაში სკოლები დისტანციურ სწავლებაზე გადავიდა. სკანდინავიაში მცხოვრები ერთი და ძალიან მადლიერია სტატიის „რომელი რჩევები დაგეხმარება დისტანციური სწავლების დროს?“. ის ამბობს: „სახლში ძალიან ამერია მეცადინეობის გრაფიკი და ვერ ვასწრებდი ხოლმე ყველა დავალების შესრულებას. მალევე ვებგვერდზე ეს სტატია დაიდო. იქ მოცემული რჩევები ძალიან გამომადგა“.

ყოველდღიურად jw.org-ის საწყის გვერდს 1 600 000-ზე მეტი ადამიანი ნახულობს.

მადლიერი ვართ იეჰოვასი, რომ ამ სტატიების დახმარებით შეგვიძლია კარგი პირადი შესწავლა გვქონდეს და სრულად დავიხარჯოთ მის მსახურებაში (2 ტიმოთე 4:5).