Seksi-Seksi Yéhuwah terkenal merga gawéan penerjemahané. Wiwit November 2014, Seksi-Seksi Yéhuwah wis nerjemahaké Alkitab ing 125 basa lan wacan Alkitab ing 742 basa. Seksi-Seksi Yéhuwah uga nerjemahaké vidhéo-vidhéo. Ing sasi Januari 2015, vidhéo Ana Acara Apa Waé ing Balé Ibadah? wis diterjemahaké ing 398 basa, lan vidhéo Apa Sebabé Perlu Sinau Alkitab? ing 569 basa. Piyé iki bisa kelakon?

Ing sasi Maret 2014, Pengurus Pusat Seksi-Seksi Yéhuwah mènèhi petunjuk marang kantor-kantor cabang sakdonya supaya ngrekam swara kanggo vidhéo ing sak akèh-akèhé basa kanggo nawakaké sinau Alkitab.

Ana urut-urutané wektu nerjemahaké vidhéo. Sing kapisan, tim penerjemah nerjemahaké naskahé. Terus, wong sing nggunakaké basa kuwi dipilih kanggo ngisi swara vidhéoné. Banjur, tim audhio/vidhéo ngrekam naskah sing wis diterjemahaké. Bar kuwi, rekamané di-edit lan digabungaké karo on-screen text. Akiré, vidhéo sing wis digabungaké karo tèks lan rekaman swarané bisa di-upload ing situs wèb.

Kantor-kantor cabang nduwé ruang rekaman lan tèknisi sing wis dilatih kanggo nandangi gawéan iki. Ning, piyé carané yèn arep rekaman nganggo basa liya ing dhaérah liyané?

Ing endi-endi ana tèknisi audhio sing kerja nganggo peralatan rekaman sing gampang digawa-gawa. Tèknisi kuwi bakal nggawé ruang rekaman sing bisa dibongkar pasang ing Balé Ibadah, kantor, utawa ing omah nganggo mikrofon lan laptop sing ana software kususé. Wong sing nggunakaké basa sing arep direkam bisa dipilih kanggo dadi sing ngisi swara, pelatih, lan sing mriksa. Pas rekamané rampung lan wis disetujui, tèknisi audhio bakal ngukuti peralatané lan pindhah menyang dhaérah liyané.

Merga nganggo cara iki, basa sing direkam jumlahé dadi luwih akèh, nganti ping teluné jumlah basa sakdurungé.

Tanggepané wong-wong marang vidhéo-vidhéo iki apik banget. Akèh wong sing lagi pisan kuwi nonton vidhéo ing basané dhéwé.

Salah siji basa sing direkam yaiku basa Pitjantjatjara. Basa kuwi digunakaké karo luwih saka wong 2.500 sing ana ing Australia. Rekamané ana ing Alice Springs, Wilayah Utara. ”Vidhéoné bener-bener disenengi,” jaré Callan Thomas, sing mbantu bagéan rekaman. ”Wong-wong ing kéné nganti ora kedhèp ndeloki tablèt lan takon terus bisa éntuk vidhéo-vidhéo kuwi saka endi. Wacan-wacan ing basa iki sithik banget. Ning, wektu krungu lan ndelok dhéwé basané digunakaké, kabèh padha nggumun.”

Ana Seksi-Seksi Yéhuwa loro ing Kamerun sing ngliwati kali nganggo prau kayu. Sedulur loro kuwi mandheg ing désa Pigmi lan ketemu karo lurahé désa, sing uga dadi guru sekolah ing kono. Sakwisé ngerti nèk lurahé nggunakaké basa Bassa, sedulur loro kuwi nggunakaké tablèt kanggo nyetèlaké vidhéo Apa Sebabé Perlu Sinau Alkitab? ing basa kuwi. Lurahé désa kuwi seneng banget lan péngin diwènèhi wacan-wacan Alkitab.

Ing salah siji désa ing Indonesia, ana pemimpin agama ing kono sing sengit karo Seksi-Seksi Yéhuwah, wong kuwi ngobong kabèh wacan sing ana ing dhaérah kuwi. Sing liyané ngancam yèn bakal ngobong Balé Ibadah. Banjur, ana patang polisi sing nekani salah siji omahé Seksi Yéhuwah lan wong kuwi diinterogasi. Polisi-polisi kuwi péngin ngerti kagiyatan apa waé sing ana ing Balé Ibadah, dadi wong kuwi nduduhaké vidhéo Ana Acara Apa Waé ing Balé Ibadah? ing basa Indonesia.

Sakwisé ndelok vidhéo kuwi, salah siji polisi kandha, ”Aku saiki ngerti yèn wong-wong kuwi sakjané ora ngerti sing saktenané bab Seksi-Seksi Yéhuwah.” Polisi liyané kandha, ”Aku éntuk njaluk vidhéo iki? Arep tak duduhaké marang liyané. Vidhéo iki mènèhi katrangan sing bener bab agamamu.” Polisi-polisi kuwi dadi nduwé pandhangan sing apik bab Seksi-Seksi Yéhuwah lan malah gelem nglindhungi.

Nèk panjenengan durung tau ndelok vidhéo-vidhéo iki, panjenengan bisa ndelok ing basané panjenengan dhéwé.