Pan Aktuoba 9, 2024, di World Wildlife Fund did sen out wan ripuot we a taak bout ou wa piipl a du a kil aaf di animal dem. Wen dem chek op umoch animal did de bout iina 1970, dat a laik elifant an laiyan an so, an dem chek it op agen iina 2020, dem fain se wi no av so moch a dem kain-a animal de agen; muo dan aaf a dem ded aaf. Di ripuot se: “Dis a wan big big ting, an wi no nuo wa a-go gwaan pan di ort ef tingz gwaan siem wie fi aal di neks faiv ier.”

 Nof piipl shak wen dem ier dem ting ya, kaa di ort nais an priti an wi lov it, an wi no waahn notn bad fi apm tu di animal dem. Wi fiil so kaa Gad did waahn wi fi tek kier a di animal dem.​—Jenisiz 1:27, 28; Pravorbz 12:10.

 So yu mait-a a wanda, ‘Wi a-go kyan du notn fi tap dem bad sitn ya fram apm tu di animal dem? Wa di Baibl av fi se bout dis?’

 It no mata ou aad wi chrai, wi naa go kyan tap dem sitn ya fram apm. A Gad a di wan we kyan riili tap dem sitn ya fram apm. Iina Revilieshan 11:18, di Baibl mek wi nuo se Gad a-go “mash op di piipl dem we a mash op di ort.” Wi kyan lorn tuu tingz fram da vors de:

1.  1. Gad a-go get rid a di piipl dem we a mash op di ort.

2.  2. Gad naa go tek lang fi du dis. Ou wi nuo dat? Kaa nowadiez, piipl a du muo an muo tingz we a kil aaf di animal dem.

 So a wa Gad a-go du fi tap di bad sitn dem we piipl a du fi kil aaf di animal dem? Gad set op wan govament iina evn an it a-go ruul uova di uol ort. (Matyu 6:10) Im a-go yuuz da govament de fi tiich piipl ou fi protek an tek kier a di animal dem.​—Aizaiya 11:9.