Jiizas did tiich piipl fi liv iina piis wid dem wan aneda. Bot wan a di taim dem wi si se im did tel im falara dem se: “No bada tingk se a piis mi kom fi bring pan ort. A no piis mi kom ya fi bring, a waar! Mi kom ya fi ton wan bwai pikni gens im pa, wan daata gens ar mada, an wan daata-in-laa gens ar mada-in-laa.” (Mat. 10:34, 35) A wa Jiizas did miin wen im se dis?

A no laik se Jiizas neehn waahn piipl fi liv gud wid dem fambili dem, bot im did nuo se di wie ou im tiich wi fi liv mait-a kaaz sumadi fambili fi fait gens dem. So di wan dem we waahn fi get baptaiz an ton Jiizas falara wuda niid fi nuo se dem tingz de kyan apm wen dem mek op dem main fi fala Jiizas. Ef dem ozban ar dem waif, ar enibadi els iina dem fambili a fait gens dem kaaz a wa dem biliiv, it wuda mek it aad fi dem du di sitn dem we Jiizas se dem fi du.

Di Baibl se piipl we a Kristiyan fi “liv iina piis wid evribadi.” (Ruo. 12:18) Bot di ting dem we Jiizas tel dem fi du kyan kaaz “waar” iina dem fambili, kaa wen wan sumadi plan fi du wa Jiizas se dem fi du, an di ada sumadi dem iina di fambili no tingk se a so it fi go, dem mait-a staat fi fait gens dem. So it komiin laik di sumadi uona fambili ton dem “wos enimi.”​—Mat. 10:36

Jiizas falara dem we liv wid fambili we no biliiv iina wa dem biliiv iina, mait-a fain it aad somtaim, kaaz wa dem fambili wuda waahn dem fi du a mait-a sitn we Jeuova an Jiizas no waahn dem fi du. Laik wa mait-a apm a dat som a dem fambili kuda waahn dem fi go selibriet sortn an sortn alidie. Bot wen dem sitn ya apm, a wa yu tingk dem fi du? Wel Jiizas did se: “Enibadi we lov dem faada ar mada muo dan mi, no dizorv fi bi fi mi falara.” (Mat. 10:37) Wi nuo se Jiizas neehn a se di piipl dem we a fala im fi tap lov dem mada an faada. Bot im did a chrai get piipl fi tingk bout wa fi kom fos iina dem laif. Ef wi fambili naa sorv Jeuova an dem a fait gens wi, wi stil a-go lov dem, bot wi a-go shuo se a wa Gad waahn wi fi du kom fos iina wi laif.

Wi naa fi aks ef it aad wen sumadi fambili a fait gens dem, bot di wan dem we a fala Jiizas kyan tingk bout wa im did se tu im falara dem. Im mek dem nuo se enibadi we no plan fi go chuu aal kain-a prablem jos fi fala im “dem no fit fi bi fi [im] falara.” (Mat. 10:38) So wen wi fambili a fait gens wi, dat a jos wan a di uol iip a prablem dem we di piipl dem we a fala Jiizas nuo se dem afi go chuu. Bot iivn duo wi a go chuu aal a dat, wi uop se bies pan ou wi a liv wi laif it wuda mek wi fambili tap fait gens wi an mait-a aal staat stodi di Baibl tu.​—1 Pii. 3:1, 2.