Já. Vottar Jehóva trúa því að öll Biblían sé „innblásin af Guði og nytsöm.“ (2. Tímóteusarbréf 3:16) Það á bæði við hið svokallaða Gamla testamenti og Nýja testamenti. Vottar Jehóva nefna þessa hluta Biblíunnar yfirleitt Hebresku ritningarnar og Grísku ritningarnar. Það er vegna þess að við viljum ekki gefa í skyn að vissir hlutar Biblíunnar séu úreltir eða skipti engu máli.

 Páll postuli skrifaði undir innblæstri: „Allt það sem áður er ritað er ritað okkur til fræðslu.“ (Rómverjabréfið 15:4) Hebresku ritningarnar búa þess vegna yfir verðmætum upplýsingum. Þær veita okkur meðal annars hagnýtar leiðbeiningar og sögulegar upplýsingar sem skipta okkur máli.

•   Frásögur sem skipta okkur máli. Hebresku ritningarnar innihalda meðal annars ítarlegar frásögur af sköpuninni og syndafalli mannkynsins. Án þessara upplýsinga fengjum við ekki viðunandi svör við spurningum eins og: Hvaðan komum við? Hvers vegna deyjum við? (1. Mósebók 2:7, 17) Auk þess hafa Hebresku ritningarnar að geyma frásagnir af samskiptum Jehóva Guðs við fólk sem upplifði gleði og glímdi við erfiðleika eins og við. – Jakobsbréfið 5:17.

•   Hagnýtar leiðbeiningar. Orðskviðirnir og Prédikarinn, sem eru hluti af Hebresku ritningum, innihalda sígilda lífsspeki. Í þessum biblíubókum er finna ráð sem stuðla að hamingjuríku fjölskyldulífi (Orðskviðirnir 15:17), hjálpa okkur að hafa rétt viðhorf til vinnu (Orðskviðirnir 10:4; Prédikarinn 4:6) og hjálpa ungu fólki að nota æskuárin þannig að þau verði hamingjurík. (Prédikarinn 11:9–12:1).

 Þar að auki er gagnlegt að kynna sér efni Móselaganna sem er að finna í Tórunni, það er að segja fyrstu fimm bókum Biblíunnar. Enda þótt Móselögin séu ekki bindandi fyrir kristna menn, hafa þau að geyma verðmætar meginreglur sem geta hjálpað okkur að vera hamingjusöm. – 3. Mósebók 19:18; 5. Mósebók 6:5-7.