Idi 2017, adda 12 a Saksi a naglugan iti bangka manipud iti rehion ti Mosquito (Miskito) Coast iti Nicaragua. Ti bangkada ket napanaganan iti Sturi Yamni. Malagip ti maysa kadakuada a ni Stephen: “Panggepmi a paregtaen ti bassit a grupo dagiti Saksi nga agnanaed iti adayo a lugar ken tulongan ida a mangikasaba iti naimbag a damag iti nakalawlawa a teritoriada.”

 Ti 12 a Saksi ket nagrubbuat manipud Pearl Lagoon para iti 200 a kilometro (125 milia) a panagdaliasatda a mapan idiay Río Grande de Matagalpa. Dida ammo a ti nagan ti bangkada, a “Naimbag a Damag” ti kaipapananna iti lengguahe a Miskito, ket addanto espesial a kaipapananna kadagiti umili nga agnanaed iti igid ti karayan. Kalpasan ti 12 nga oras a panagbangka dagiti Saksi, malaksid iti panagsardengda iti agpatnag, nakadanonda met laengen iti destinasionda—ti komunidad iti La Cruz de Río Grande. Ti innem a lumugar a Saksi sibabara nga inabrasada dagiti kapammatianda.

 Karabiyanna, adda napasamak a didigra. Adda napigsa a bagyo a nakaigapuan ti napigsa a panagtudo iti surong ti Río Grande de Matagalpa. Iti sumagmamano nga oras, naglippias ti karayan ken dimmakkel iti dua nga aldaw. Nalayus ti Kingdom Hall ken ti adu a balbalay iti La Cruz. Dagiti simmangpet a kakabsat tinulonganda dagiti lumugar nga agbakuit. Kaaduan ti imyan iti dua ti kadsaaranna a balay ti maysa a Saksi.

 Iti maikatlo a rabii, napan ti mayor ti La Cruz kadagiti bimmisita a Saksi tapno agpatulong. Gapu ta ti Sturi Yamni ti kakaisuna a nalagda a bangka a makalasat iti naglippias a karayan, kayat ti mayor a tumulong dagiti Saksi a mangilugan kadagiti tattaona a mangipan kadagiti relief goods wenno ayuda ken tumulong iti dadduma a naapektaran a komunidad. Naragsakan dagiti Saksi a nakitinnulong.

 Kabigatanna, tallo a Saksi ti nakikadua kadagiti tattao nga imbaon ti mayor. “Nakaap-apres idin ti karayan,” malagip ni Stephen. “Mayan-anud ti nagdadakkel a kayo a naparut, nagadu ti alikuno, ken nakapegpegges ti ayus ti karayan iti nasurok a 18 a kilometro kada oras [11 mph].” Iti laksid ti narigat a kasasaad, nakadanon ti bangka kadagiti tallo a komunidad.

 Ti tallo a Saksi inusarda dayta a gundaway tapno ipaayda ti liwliwa a kasapulan unay dagiti pumurok. Nangiwaras met dagiti Saksi iti kopia ti 2017 a ruar ti Agriingkayo! a maitutop ti paulona, “No Dumteng ti Didigra​—Dagiti Addang a Mangsalbar iti Biag.”

 Dagiti komunidad iti igid ti karayan inapresiarda unay ti praktikal ken naespirituan a tulong nga impaay dagiti Saksi. “Situtulokda a tumulong uray kadagiti narigat a tiempo,” kinuna ti dadduma a pumurok. Imbaga pay ti dadduma, “Talaga nga adda ayatda iti padada a tattao.” Idi nakitada ti panagregget dagiti Saksi a tumulong kadagiti kapammatianda ken iti dadduma, adu a pumurok ti mas interesadon a dumngeg iti makaliwliwa a mensahe ti Biblia.