Nayanakak iti Uganda iti distrito ti Gomba. Kaaduan a tattao sadiay ti nakurapay. Awan ti koriente iti ilimi, isu a no rabii, agusarkami kadagiti lampara.

 Mannalon dagiti nagannakko. Immakarda iti Uganda manipud iti Rwanda. Agmulmulada iti kape ken saba, ken ar-aramidenda dagiti saba iti arak a pagaammo kas waragi. Agtartarakenda met iti manok, kalding, baboy, ken baka. Iti kulturami, mamatikami a ti asawa a babai ket masapul nga agtulnog ken ni lakayna iti amin nga ibagana ken saanna a mabalin nga ibaga ti opinionna.

 Idi 23 ti tawenkon, immakarak iti Rwanda. Ditoy a nasursurok ti ag-disco a kaduak dagiti kaedadko. Adda maysa a kanayon a pappapanak isu nga inikkandak iti kard tapno libre a makastrekak. Magusgustuak met ti agbuya kadagiti naranggas a pelikula. Gapu iti kakaduak ken paglinglingayak, nagbalinak a bayolente, immoral, ken mammartek.

 Idi 2000, nag-live in-kami ken Skolastique Kabagwira. Tallo ti annakmi. Kas iti nasursurok idi ubingak, ekspektarek nga agparintumeng ni baketko no kablaawannak wenno no adda kiddawenna kaniak. Para kaniak, kukuak ti amin a sanikua ti pamiliami ken aramidek ti aniaman a kayatko a pangusaran kadagita. Kanayon a rummuarak iti rabii ken nabarbartekak nga agawid iti alas tres ti parbangon. No agtuktokak ket saan a dagus a maluktan ni Skolastique ti ridaw, kabilek isuna.

 Superbisorak idi iti maysa a private security company, ken dakkel ti sueldok. Aw-awisennak ni Skolastique a makimiembro iti relihionna a Pentecostal, ta pampanunotenna nga agbalbaliwak. Ngem saanak nga interesado. Nakirelasionak ketdi iti sabali a babai. Gapu ta immoral ken naranggasak, innala ni Skolastique ti tallo nga annakmi ket nakipagyanda kadagiti katugangak.

 Adda lakay a gayyemmi a nakisarita kaniak maipapan iti kasasaad ti biagko. Binagbagaannak a makisinnubliananak ken ni Skolastique. Imbagana a saan nga umiso a maisina dagiti annakko iti amada. Isu nga idi 2005, insardengkon ti aginum, pinanawak ti babaik, ken nakisinnubliananak ken Skolastique. Nagkasarkami idi 2006. Ngem naranggasak latta ken baketko.

 Idi 2008, immay iti balaymi ni Joël a maysa a Saksi ni Jehova. Dimngegak iti imbagana. Sumagmamano a bulan a binisbisitanak a kaduana ti maysa pay a Saksi a ni Bonaventure. Adda dagiti nabara a diskusionmi maipapan iti Biblia. Adu ti saludsodko, nangruna iti libro nga Apocalipsis. Ngem ti agpayso, ikagkagumaak a paneknekan a kamali dagiti Saksi. Kas pagarigan, dinamagko no apay nga ibagbagada nga agbiag ditoy daga ti “dakkel a bunggoy” a nadakamat iti Apocalipsis 7:9, idinto ta ibaga ti bersikulo nga ‘agtaktakderda iti sanguanan ti trono [ti Dios] ken iti sanguanan ti Kordero’ a ni Jesu-Kristo. Inan-anusan ni Joël a sungbatan dagiti saludsodko. Kas pagarigan, impakitana kaniak ti Isaias 66:1, nga inawagan ti Dios ti daga kas ‘pagbatayan ti sakana.’ Isu nga agtaktakder ti dakkel a bunggoy ditoy daga iti sanguanan ti trono ti Dios. Ken binasak ti Salmo 37:29, a kunana nga agbiagto nga agnanayon ditoy daga dagiti nalinteg.

 Idi agangay, nakipagadalak met laeng iti Biblia. Isu a nagpayadalkami ken baketko ken ni Bonaventure. Bayat nga agad-adalkami iti Biblia, natignayak nga agbalbaliw. Nasursurok a respetuen ni baketko. Saankon a kayat nga agparintumeng no kablaawannak wenno no adda kiddawenna kaniak, ken saanko metten a pampanunoten a kukuak ti amin a sanikua ti pamiliak. Insardengko metten ti agbuya kadagiti naranggas a pelikula. Nagrigat ti agbalbaliw. Kasapulak ti agteppel ken agbalin a napakumbaba.

 Sumagmamano a tawen sakbayna, pinagyanko ti inauna nga anakmi a ni Christian kadagiti kabagianmi idiay Uganda. Ngem idi nabasami ti Deuteronomio 6:4-7, nabigbigmi nga obligasionmi iti Dios ti panangaywan kadagiti annakmi. Karaman iti dayta ti panangisuromi kadakuada kadagiti prinsipio ti Biblia. Kasta unay ti ragsakmi ken ti anakmi idi kaduami a nagawid iti balaymi!

 Naadalko a ni Jehova ket naasi a Dios, ket patiek a napakawannan dagiti dati a naaramidak. Maragsakanak ta kaduak ni Skolastique a nakipagadal iti Biblia. Indedikarmi ti biagmi ken Jehova ket nabautisarankami idi Disiembre 4, 2010. Pagtaltalkanmin ti maysa ken maysa, ken maragragsakankami a mangyap-aplikar kadagiti prinsipio ti Biblia iti pamiliami. Maragragsakan ni baketko ta agdiretsoak iti balaymi kalpasan ti trabahok. Ap-apresiarenna met ta resrespetuek ken nasayaat ti panangtratok kenkuana, inkeddengko a saanakon nga uminum iti arak, ken saanakon a naranggas. Idi 2015, naapointaranak kas panglakayen tapno tumulong a mangipastor iti kongregasion. Bautisado metten ti tallo iti lima nga annakmi.

 Idi nangrugiak a makipagadal kadagiti Saksi ni Jehova, saanko a basta pinati lattan ti insuroda. Ngem naapresiarko ida ta inusarda ti Biblia a mangsungbat kadagiti saludsodko. Nasursuromi ken Skolastique a dagiti mangibagbaga nga agserserbi iti pudno a Dios masapul a tungpalenda dagiti pagalagadan ti Dios, saan a ti kaykayatda. Agyamyamanak unay ta inyasidegnak ni Jehova kenkuana ket pasetakon iti naespirituan a pamiliana. No panunotek ti biagko idi, kombinsidoak a babaen ti tulong ti Dios, kabaelan ti napudno a tao ti agbalbaliw tapno maparagsakna ti Dios.