Diak inekspektar a nagkaro ti pannakadangran ti partnerko iti martial arts. Aksidente a nakugtarak ti agongna. Nakonsiensiaak ket pinampanunotko no ituloyko pay ti martial arts. Apay a napanunotko dayta iti isport a pagay-ayatko iti mano a tawen gapu laeng iti dayta a kamali? Estoriaek pay nga umuna kadakayo no kasano a nagbalin a hiligko ti martial arts.

 Dimmakkelak iti asideg ti Buffalo, New York, U.S.A., iti naragsak a pamilia ken deboto a Katoliko. Nageskuelaak iti Catholic school ken maysaak a sakristan. Kayat dagiti nagannakmi a nasayaatto ti biagmi ken manangko isu a binay-andak nga agay-ayam iti isport kalpasan ti klasemi wenno agtrabaho iti part-time, basta nangato dagiti gradok. Isu nga ubingak pay laeng, nasursurokon a disiplinaen ti bagik.

 Idi 17 anyosak, nagadalak iti martial arts. Iti adu a tawen, nagpraktisak iti tallo nga oras iti inaldaw, innem nga aldaw iti kada lawas. Kada lawas, adu nga oras a sinanayko met ti isipko kadagiti teknik ken pamay-an ti panaggaraw ken nagbuyaak kadagiti video tapno lumaingak. Maragragsakanak nga agpraktis a nabedbedan dagiti matak ken uray no nakaiggemak kadagiti armas. Kayak a guduaen dagiti tabla ken buongen dagiti hollow blocks iti maysa laeng a danogko. Nagbalinak a maysa kadagiti kalalaingan ken adu ti inyawidko a trophy kadagiti kompetision. Ti martial arts ti kapatganen iti biagko.

 Ibilangko idin a naballigi ti biagko. Naggraduarak iti unibersidad a nangato ti honor-ko. Nagtrabahoak iti maysa a dakkel a kompania kas computer systems engineer. Adu ti maaw-awatko a benepisio manipud iti kompania, adda bukodko a balay, ken adda metten girlfriend-ko. No kitkitaen, kasla nagsayaat ti biagko, ngem saanak a naragsak ta adu dagiti saludsod a mangburburibor iti panunotko.

 Tapno mabirokak ti sungbat dagiti saludsodko, mamindua iti makalawas a makimisaak ken ikarkararagko iti Dios a tulongannak. Iti maysa nga aldaw, nakatungtongko ti maysa a gayyemko ket dayta ti nangbalbaliw iti biagko. Dinamagko: “Pinampanunotmo kadin no ania ti panggep ti biag?” Ken imbagak pay: “Nagadu ti problema ken mapaspasamak a kinaawan hustisia!” Imbagana nga isalsaludsodna met laeng dagita ket nabirokanna dagiti makapnek a sungbat iti Biblia. Inikkannak iti libro a Mabalinyo ti Agbiag nga Agnanayon iti Paraiso a Daga. a Imbagana a makipagad-adal iti Biblia kadagiti Saksi ni Jehova. Diak koma kayat nga awaten idi ta pinanunotko a saanko a mabalin a basaen dagiti pagbasaan ti sabali a relihion. Ngem gapu ta kayatko a maammuan ti sungbat dagiti saludsodko, kinitak no rasonable met laeng ti isursuro dagiti Saksi.

 Nasdaawak idi naammuak dagiti isursuro ti Biblia. Naammuak a ti talaga a panggep ti Dios para iti tao ket agbiag nga agnanayon iti paraiso a daga ken saan a nagbaliw dayta a panggep ti Dios. (Genesis 1:28) Nasdaawak idi mabasak ti nagan ti Dios a Jehova iti mismo a Bibliak a King James version. Daytoy gayam a nagan ti tuktukoyek no ilulualok ti Kararag ti Apo. (Salmo 83:18; Mateo 6:9) Maawatak met laengen no apay a temporario nga ipalpalubos ti Dios ti panagrigrigat ti tao. Agpaypayso ti amin a nasursurok! Nakaragragsakak.

 Diak pulos malipatan ti nariknak idi damok ti makigimong kadagiti Saksi ni Jehova. Mannakigayyem ti amin ken kayatdak a maam-ammo. Iti dayta a pannakigimongko, ti tema ti espesial a palawag ket maipapan kadagiti kararag a denggen ti Dios. Nagustuak dayta a topiko ta ikarkararagko iti Dios a tulongannak. Kalpasanna, immatenderak iti Memorial ti ipapatay ni Jesus. Nasdaawak ta uray dagiti ubbing sursurotenda iti Bibliada dagiti maibasbasa a teksto kadagita a gimong. Diak pay ammo idi ti agbirok kadagiti teksto, ngem insurodak dagiti Saksi nga agukag iti Biblia.

 Bayat a nakigimgimongak, lallalo a naapresiarko ti nagsayaat a panangisuro dagiti Saksi. Nakaad-adu ti nasursurok iti kada gimong ken kanayon a maparparegta ken mapabpabilegak. Di nagbayag, inawisdak a makipagadal iti Biblia.

 Ti nakitak kadagiti Saksi ni Jehova ket naiduma unay iti makitkitak iti relihionko. Dagiti Saksi ket maysa a grupo dagiti tattao nga agkaykaysa ken ar-aramidenda ti amin a kabaelanda a mangparagsak iti Dios. Ad-adda a kombinsidoak nga ipakpakitada ti pakailasinan dagiti pudno a Kristiano, ta agiinnayatda.—Juan 13:35.

 Bayat nga umad-adu ti maad-adalko iti Biblia, umad-adu met dagiti binalbaliwak iti biagko tapno mayaplikarko dagiti prinsipio ti Biblia. Ngem kasla saanko a maisardeng ti martial arts. Magusgustuak ti agsanay ken makilaban. Idi imbagak dayta iti Saksi a mangyad-adal kaniak iti Biblia, nakaas-asi nga imbagana kaniak, “Itultuloymo lang ti agadal, ket ammok a maaramidmonto ti umiso a desision.” Dayta a talaga ti kasapulak a mangngeg. Bayat nga umad-adu ti maad-adalko, ad-adda met a kayatko a paragsaken ni Jehova a Dios.

 Nagbaliw ti amin idi napasamak ti imbagak iti rugi. Aksidente idi a nakugtarak ti agong ti partnerko iti martial arts. Gapu iti dayta nga aksidente, napanunotko a saanko a maipakita ti talna kas pasurot ni Kristo no itultuloyko ti martial arts. Naadalko nga impadto ti Isaias 2:3, 4 a dagiti mangar-aramid iti pagayatan ni Jehova ‘saandanto a sursuruen ti makigubat.’ Ken insuro ni Jesus iti sabsabali a saanda nga agbalin a naranggas uray no saan a patas ti pannakatratoda. (Mateo 26:52) Isu nga insardengko ti isport a pagay-ayatko unay.

 Kalpasanna, inaramidko ti balakad ti Biblia a “sanayem ti bagim a mangipakita iti debosionmo iti Dios kas panggepmo.” (1 Timoteo 4:7) Amin nga oras ken pigsa nga us-usarek idi para iti martial arts ket us-usarekon para kadagiti naespirituan nga aktibidad. Saan a patien ti girlfriend-ko dagiti maad-adalko iti Biblia isu a nagsinakami. Nabautisaranak kas maysa a Saksi ni Jehova idi Enero 24, 1987. Di nagbayag, nagserbiak kas amin-tiempo a ministro, a boluntario nga us-usarek ti tiempok a mangisuro iti Biblia iti sabsabali. Manipud idin, agserserbiak kas amin-tiempo a ministro. Adda met tiempo a nagserbiak iti sangalubongan a hedkuarter dagiti Saksi ni Jehova iti New York, U.S.A.

 Ita ta naammuakon ti kinapudno maipapan iti Dios, nabirokakon ti kurang iti biagko. Addan direksion ken panggep ti biagko ken naammuak ti agpaypayso a namnama iti masanguanan isu a nakaragragsakakon. Siempre, agek-exercise-ak pay laeng a regular ngem saanen a dayta ti numero uno iti biagko. Ti panagserbi ken Jehova a Dios ti kapatganen kaniak.

 Idi saanko pay nga insardeng ti martial arts, kanayon a sipsiputak dagiti tattao iti aglawlawko ta pampanunotek no kasano nga idepensa ti bagik no adda mangdangran kaniak. Ita, palpaliiwek pay laeng dagiti tattao iti aglawlawko, ngem sabalin ti panggepko—tapno matulongak ida. Tinulongannak ti Biblia nga agbalin a manangted ken agbalin a nasaysayaat nga asawa iti napintas a baketko a ni Brenda.

 Pagay-ayatko idi ti martial arts ngem sinuktak iti nasaysayaat. Nagmayat ti pannakaibagana iti Biblia: “Bassit ti magunggona iti pisikal a panagsanay, ngem makagunggona iti amin a banag ti debosion iti Dios, ta mainaig dayta iti kari a biag ita ken biag iti masanguanan.”—1 Timoteo 4:8.