Nayanakak iti Montreal, ti kadakkelan a siudad ti Quebec, Canada. Uppatkami nga agkakabsat. Pinadakkeldakami dagiti naayat a nagannakmi iti napintas a lugar ti Rosemont. Naragsak ken natalna ti biagmi.

 Idi ubingak, interesadoak iti Biblia. Malagipko nga idi 12 ti tawenko, magusgustuak unay a basaen ti Baro a Tulag maipapan iti biag ni Jesus. Gapu iti ayat ken asina iti sabsabali, kayatko ti agbalin a kas kenkuana. Ngem in-inut a napukaw dayta a rikna bayat a dumakdakkelak ken nangrugiak a makilangen kadagiti saan a nasayaat a kakadua.

 Agtoktokar ni Tatang iti saxophone. Saan la a ti saxophone-na ti impatawidna kaniak, uray ti panagayatna iti musika, a nagbalin a sentro ti biagko. Magusgustuak unay ti musika ket di nagbayag, nasursurok ti aggitara. Idi agangay, nangbukelak iti banda a kadua ti dadduma a gagayyemko ket nagtokarkami iti sumagmamano a show. Nagustuandakami ti dadduma a nalatak a producer iti industria ti musika isu nga inasitgandak ta kayatda a pagbalinen a sikat dagiti kantak. Nagpirmaak iti kontrata iti maysa a dakkel a recording company. Nagbalin a sikat dagiti kantak ken kanayon a maipatpatokar dagita iti radio iti Quebec.

 Kasla adda kaniakon ti amin a kayatko. Ubingak pay ngem nalatakakon. Dakkel ti masapsapulak ken kaykayatko ti ar-aramidek. Iti aldaw, addaak iti gym, agpainterbiu, mangtedak kadagiti autograph, ken agparangak iti telebision. Iti rabii, agtokarak kadagiti show ken mapanak kadagiti party. Tapno saanak a ma-stress gapu kadagiti tattao a mangid-idolo kaniak, nangrugiak nga uminum iti arak ken idi agangay, nagusarak iti droga. Awan bibiangko idi iti aglawlawko ken immoral ti panagbiagko.

 Adda dagiti umapal iti panagbiagko ta makitkitada a naragsakak. Ngem iti un-unegko, mariknak nga awan direksion ti biagko, aglalo no agmaymaysaak. Nakalidliday ken madandanaganak. Nakalkaldaang ta bayat ti kinalatakko, natay ti dua kadagiti producer-ko gapu iti AIDS. Diak ninamnama dayta! Kaykayatko ti musika ngem diak mairusok ti klase ti panagbiag a kakuykuyog dayta.

 Uray no naballigiak, ammok a nakadakdakes ti lubong. Apay a nakaro ti kinaawan hustisia? Pampanunotek no apay nga awan ar-aramiden ti Dios. Kinapudnona, masansan nga ikarkararagko a sungbatan ti Dios dagiti saludsodko. Naminsan, bayat ti bakasionko, nagbasaak manen iti Biblia. Uray no diak naawatan ti kaaduan a nabasak, nabigbigko nga asidegen ti panungpalan ti lubong.

 Iti panagbasak iti Biblia, naammuak a naminsan, nagayunar, wenno saan a nangnangan, ni Jesus iti 40 nga aldaw iti let-ang. (Mateo 4:1, 2) Napanunotko a no aramidek met dayta, baka iyam-ammo ti Dios ti kinasiasinona kaniak, isu nga inyeskediulko dayta. Dua a lawas sakbay ti panagayunarko, adda dua a Saksi ni Jehova a nagtuktok iti ridaw ket pinastrekko ida a kasla padpadaanak ida. Pinerrengko ti maysa kadakuada nga agnagan iti Jacques sa dinamagko: “Kasanotayo a maammuan nga agbibiagtayon iti maudi nga al-aldaw daytoy a lubong?” Kas sungbat, linuktanna ti Bibliana iti 2 Timoteo 3:1-5. Agsasaruno ti saludsodko kadakuada ket nakombinsirak kadagiti lohikal ken makapnek a sungbatda a kanayon a naibatay iti Biblia. Kalpasan ti namin-ano a panangbisitada kaniak, nabigbigko a saanen a kasapulan nga agayunarak.

 Regular a nakipagadalak iti Biblia kadagiti Saksi. Idi agangay, impapukisko ti atiddog a buokko ken inatenderakon ti amin a gimong iti Kingdom Hall iti ayanmi. Ti nabara a panangabrasada kaniak kadagitoy a gimong ti ad-adda a nangkombinsir kaniak a nasarakakon ti kinapudno.

 Siempre, tapno mayaplikarko dagiti maad-adalko iti Biblia, masapul nga agbalbaliwak. Masapul nga isardengko ti agdroga ken ti immoral a panagbiagko. Masapul met a saan laeng a ti bagik ti pampanunotek no di ket ad-adda nga ikabilangak ti sabsabali. Kas agsolsolo a nagannak, masapul nga ipaayko ti emosional ken naespirituan a kasapulan ti dua nga annakko. Isu nga insardengko ti karerak iti musika ket nagtrabahoak iti maysa a paktoria a nababa ti sueldona.

 Saan a nalaka dagitoy a panagbalbaliw. Adda dagiti madi nga epektona iti bagik ti panagsardengko nga agdroga. Narigatanak isu nga adda sumagmamano a tiempo a nagusarak manen. (Roma 7:19, 21-24) Talaga a nagrigat a panawan ti immoral a panagbiagko. Maysa pay, makabannog ti baro a trabahok ken makapaupay ti bassit a sueldok. Masapul nga agtrabahoak iti tallo a bulan tapno makaurnongak iti kuarta a kas kadakkel ti masapulak idi iti dua nga oras laeng a panagtokarko.

 Nakatulong ti kararag tapno maitultuloyko dagitoy a narigat a panagbalbaliw. Nagpateg met ti regular a panagbasa iti Biblia. Adda dagiti teksto iti Biblia a nakaparegtaak unay. Maysa ti 2 Corinto 7:1 a mangiparparegta kadagiti Kristiano a ‘dalusanda ti bagbagida iti tunggal pakatulawan [wenno, pakarugitan] iti lasag ken iti espiritu.’ Ti maysa pay a teksto a nangipasigurado kaniak a posible a maikkatko dagiti bisiok ket ti Filipos 4:13: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” Sinungbatan met laengen ni Apo Jehova dagiti kararagko ket naawatakon dagiti kinapudno iti Biblia ken nakapagbalbaliwak. Natignayak a mangidedikar iti biagko kenkuana. (1 Pedro 4:1, 2) Nabautisaranak kas maysa kadagiti Saksi ni Jehova idi 1997.

 Sigurado a natayak itan no intultuloyko ti dati a panagbiagko. Ngem ita, talaga a nakaragragsak ti biagko! Pudno a bendision kaniak ti nasingpet nga asawak a ni Elvie. Maay-ayatankami a mangisursuro iti Biblia kadagiti sabsabali kas full-time a manangaskasaba. Nakaragragsak ken kontentokami. Agyamyamanak ken Jehova ta inyasidegnak kenkuana.​—Juan 6:44.