Uppat a pulo a tawenen ti napalabas, idi Pebrero 2, 1973, naipuesto dagiti baro a makina idiay Wallkill, New York, U.S.A. tapno agimprenta kadagiti magasin a Pagwanawanan ken Agriingkayo!

Sangapulo a tawen sakbayna, gimmatang dagiti Saksi ni Jehova iti talon a mangsuplay iti taraon kadagiti agtrabtrabaho iti hedkuarterda iti Brooklyn, New York. Ngem ita, mausar met daytan iti panangpataud iti naiduma a kita ti taraon, ti naespirituan a taraon.​—Mateo 24:45-​47.

Ni Philip Wilcox a manangaywan idi iti pressroom, malagipna ti umuna nga aldaw a panagandar dagiti pagimprentaan iti Wallkill: “Agarup makabulan nga in-assemble-mi dagiti high-speed rotary web presses. Idi nakasagana dagitan, rinugianmi a testingen. Di nagbayag, nakaimprentakamin iti sumagmamano a ribu a magasin. Impatulodmi dagita iti pagimprentaan idiay Brooklyn sa naipatulod kadagiti kongregasion. Determinadokami a di mangsayang iti uray maysa a magasin.”

Imbangon dagiti Saksi ni Jehova daytoy baro a pagimprentaan kas nayon ti dakkel a pagimprentaanda nga adda idi iti Brooklyn. Idi rugrugi ti 1970’s, kanayon nga ad-adu a naibasar-Biblia a literatura ti order ngem iti kabaelan dagiti makina nga iyimprenta iti agmalem. Gapu iti dayta, adda dagiti nagtrabaho iti rabii iti pagimprentaan iti Brooklyn tapno maaguantaanda ti kaadu dagiti order.

Idi nairingpas ti umuna a pasdek a pagimprentaan iti Wallkill, addaan dayta iti uppat a makina, maysa a pasilidad para iti panagitulod, ken Kingdom Hall. Ngem sakbay a naan-anay a mausar, nangrugi ti konstruksion ti maikadua a dakdakkel a pasdek a kasilpo ti umuna. Nagadu ti order a naibasar-Biblia a literatura isu nga innem pay a makina ti naikabil iti maikadua a pasdek, uray no saan pay a nalpas dayta.

Iti panaglabas dagiti tawen, rimmang-ay ti teknolohia iti panagimprenta ken immadu dagiti order a naibasar-Biblia a literatura. Tapno makagiddan kadagita a panagbalbaliw, namin-adu a binaliwan ken pinalawami ti pagimprentaan iti Wallkill. Dagiti daanen a makina a letterpress idi 1980’s ket nasukatan kadagiti high-speed offset presses.

Idi 2004, naiserra ti pagimprentaan iti Brooklyn, ket iti kaunaan a gundaway, nangrugi a mayimprenta dagiti libro iti Wallkill. Idi 2010, nayakar iti amianan ti pakayimprentaan dagiti magasin—iti sanga nga opisina dagiti Saksi ni Jehova iti Canada. Dagiti baro a makina sadiay ket makayimprenta iti 200,000 a magasin kada oras.

Ita, highly automated ti pagimprentaan iti Wallkill, nga agus-usar iti kabaruan a teknolohia ken addaan iti 281 a boluntario a lallaki ken babbai. Itay napan a tawen, nasurok a 17 a milion a libro ken Biblia ti nayimprenta sadiay. Malaksid kadagiti pagimprentaan iti Wallkill ken Canada iti Amianan nga America, dagiti Saksi ni Jehova ket addaan iti 13 pay a pagimprentaan nga adda iti Africa, Asia, Australia, Europa, ken Abagatan nga America​—a makatulong a mangpennek iti naespirituan a kasapulan ti minilion.​—Mateo 5:3.