Saan unay a pakadanagan ti adu nga agtutubo ti panangaywan kadagiti nagannakda. Mabalin ngamin nga adu pay a tawen ti lumabas santo kumapsut wenno agsakit dagiti nagannakda.

 Ngem kasanon no agsakit ni papang wenno mamangmo uray no ubingka pay? Ammuem no ania ti inaramid ti dua nga agtutubo.

•  Kapadasan ni Emmaline

•  Kapadasan ni Emily

 Adda Ehlers-Danlos syndrome (EDS) ni mamangko. Nakaro ken naut-ot dayta a sakit a mangapektar kadagiti susuop, kudil, ken urat.

 Awan agas dayta a sakit, ken kimmaro a kimmaro ti sakit ni Mamang iti napalabas a sangapulo a tawen. Adda pay ketdi tiempo idi a nakababbaba ti darana isu a dandani natay ken no dadduma, kayatna pay ketdin ti matay no saannan a maibturan ti ut-ot a mariknana.

 Saksi ni Jehova ti pamiliami, ket dakkel a liwliwa ti maaw-awatmi kadagiti kapammatianmi. Kas pagarigan, maysa a balasang a dandani kaedadko ti nabiit pay a nangted iti card iti pamiliami. Imbagana nga ipatpategnakami ken kanayon a manamnamami ti tulongna. Nagmayat ti kasta a gayyem!

 Dakkel ti naitulong ti Biblia kaniak. Kas pagarigan, ti maysa a paboritok ket ti Salmo 34:18, a kunana: “Ni Jehova asideg kadagidiay nadunor ti pusoda.” Ti maysa pay ket mabasa iti Hebreo 13:6, a kunana: “Ni Jehova ti katulongak; saanakto nga agbuteng.”

 Magusgustuak ti maikadua a teksto ta kabutengko unay a matay ni Mamang. Ay-ayatek unay isuna, ken agyamyamanak iti kada aldaw a makaduak ni mamangko. Gapu iti dayta a bersikulo, naturturedak a mangsango iti aniaman a mapasamak iti masanguanan.

 Ngem adda pay sabali a pagbutbutngak. Matawtawid ti EDS. Naala dayta ni Mamang ken lolak, ket natawidko met dayta. Wen, addaanak met iti EDS. Ngem gapu iti Hebreo 13:6, kampanteak a ni Jehova ti “katulongak.”

 En-enjoyek no ania ti adda kaniak ita ken diak sangkapanunot ti napalabas​—wenno pakadanagan ti masanguanan. Malidayanak laeng no ikomparak ti situasion ni Mamang ita iti kabaelanna nga aramiden idi. Ibaga ti Biblia a dagiti pakarigatantayo ket “apagkanito ken nalag-an” no idilig iti namnama a biag nga agnanayon nga awanen ti sakit.​—2 Corinto 4:17; Apocalipsis 21:1-4.

 Panunotem: Ania ti nakatulong ken Emmaline nga agtalinaed a positibo? Kasanoka a makapagtalinaed a positibo no adda pakarigatam?

 Idi hayskulak, naaddaan ni papangko iti depresion. Kasla awanen ti dati a papangko; sabsabali isunan. Manipud idi, kanayonen a naliday, mabutbuteng, ken madandanagan. Kinse a tawenen a lablabananna dayta. Nagdagsen la ketdi ti riknana ta malidlidayan uray awan met ti rason a mariknana dayta!

 Saksi ni Jehova-kami, ket nagdakkel ti maitultulong dagiti kapammatianmi. Nakasingsingpet ken mannakaawatda. Saanda met a pulos imparikna nga awan serserbi ni Papang. No makitkitak ti panagib-ibtur ni Papang, umun-uneg ti panagayatko kenkuana.

 Kailiwkon ti dati a papangko​—daydiay saan a madandanagan, saan nga agrigrigat, ken naragsak. Nagmadi ti riknak ta inaldaw a masapul a labananna ti di makita a kalaban iti panunotna.

 Ngem ikarkarigatan ni Papang ti agtalinaed a positibo. Iti nabiit pay a nakaro a pannakadepresna, inaldaw latta a nagbasa iti Biblia uray sumagmamano laeng a bersikulo. Nagdakkel ti naitulong dayta kenkuana. Uray no kasla nagbassit a banag dayta, nasalbar ti biagna. Maipagpannakkelko ni Papang aglalo iti daydi a tiempo.

 Magustuak a permi ti Nehemias 8:​10, a kunana: “Ti rag-o ni Jehova isu ti salindegyo” wenno, mangpapigsa kadakayo. Pudno la unay dayta. Maragragsakanak no kaduak dagiti kapammatiak ken no addaak ken makiramanak iti gimong ta masukatan iti ragsak ti nakaro a lidayko. Dayta ti mangpapigsa kaniak iti agmalmalem. Nasursurok ken Papang nga aniaman ti problemam, kanayon a sisasagana ni Jehova a tumulong kenka.

 Panunotem: Ania ti inaramid ni Emily tapno matulonganna ni papangna? Kasanom a matulongan ti maysa nga addaan iti depresion?