Insurat ni apostol Pablo: “No kayatko nga aramiden ti umiso, ti dakes ti adda kaniak.” (Roma 7:21) Nariknam met kadin dayta? No kasta, makatulong daytoy nga artikulo tapno malabanam ti sulisog a mangaramid kadagiti dakes a tarigagay.

•  Ti masapul a maammuam

•  Ti mabalinmo nga aramiden

•  Ti kuna dagiti padam nga agtutubo

 Kanayon nga agkuyog ti sulisog ken panangpilit dagiti kakadua. Kinapudnona, kuna ti Biblia a “dagiti dakes a kakadua dadaelenda dagiti nasayaat a kababalin.” (1 Corinto 15:33, footnote) Gapu iti panangpilit ti dadduma wenno ti media, mabalin a maaddaanka iti tarigagay a mangtignay kenka nga agaramid iti dakes ken ‘mangsurot iti kaaduan nga agaramid iti dakes.’​—Exodo 23:2.

 “Gapu ta kayatmo nga akseptarendaka dagiti dadduma, mabalin a tuladem ti aniaman nga ar-aramidenda tapno laeng magustuandaka.”​—Jeremy.

 Panunotem: Apay a narigrigat a labanan ti sulisog no madanaganka unay iti pampanunoten ti dadduma maipapan kenka?—Proverbio 29:25.

 Laglagipem: Saanmo nga ipalubos a maikompromiso dagiti pagalagadam gapu iti panangpilit dagiti kakaduam.

 Ammuem dagiti patpatiem. No saanmo nga ammo dagiti patpatiem, agbalinka a kasla puppet a konkontrolen ti dadduma. Adayo a nasaysayaat a surotem ti balakad ti Biblia: “Siguraduenyo ti amin a banag; kumpetkayo a siiirut iti nasayaat.” (1 Tesalonica 5:21) No ad-adda a maawatam dagiti patpatiem, nalaklakaka nga agbiag maitunos kadagita ken manglaban iti sulisog a mangsukir kadagita.

 Panunotem: Apay a patiem a pagsayaatam dagiti moral a pagalagadan ti Dios?

 “Nadlawko a no takderak ti patpatiek ken saanak a tumulok iti sulisog, ad-adda a respetuendak ti dadduma.”​—Kimberly.

 Ulidan iti Biblia: Daniel. Mabalin nga idi agtutubo pay laeng ni Daniel, ‘inkeddengnan’ a suroten dagiti linteg ti Dios.—Daniel 1:8.

 Ammuem dagiti pagkapuyam. Dakamaten ti Biblia ti maipapan kadagiti “tarigagay dagiti agtutubo”​—dagiti rikna a napigsa bayat ti kinaagtutubom. (2 Timoteo 2:22) Saan laeng a ti seksual a tarigagay ti ramanen daytoy no di pay ket ti tarigagay a maakseptar ken agdesision a bukbukod uray no dika pay nakasagana.

 Panunotem: Kuna ti Biblia a “masubok ti tunggal maysa no maallukoy ken masulisog iti bukodna a tarigagay.” (Santiago 1:14) Ania a tarigagay ti kangrunaan a mangsulisog kenka?

 “Masapul a bigbigem no ania dagiti kangrunaan a pakasulisogam. Agsukimatka no kasanom a malabanan dagita ken isuratmo dagiti punto a mausarmo. Iti kasta, inton sumaruno a maipasangoka iti kasta a sulisog, ammomton no kasano a labanan dayta.”​—Sylvia.

 Ulidan iti Biblia: David. Timmulok met idi ni David iti panangpilit ti dadduma ken uray iti tarigagayna. Ngem nakasursuro kadagiti kamalina ken inkagumaanna a saanen nga uliten dagita. Inkararagna ken Jehova: “Mangparsuaka kaniak iti nadalus a puso, ken ikkannak iti baro nga espiritu a natibker.”​—Salmo 51:10.

 Agteppelka. Kuna ti Biblia: “Dimo ipalubos a parmekennaka ti dakes.” (Roma 12:21) Kayatna sawen a kabaelam a labanan ti sulisog. Mabalinmo a pilien nga aramiden ti umiso.

 Panunotem: Kasanom a masigurado a maaramidmo ti umiso no maipasangoka iti situasion a mabalin a masulisogka nga agaramid iti dakes?

 “Pampanunotek no anianto ti mariknak no tumulokak iti sulisog. Mabang-aranakto ngata? Mabalin, ngem apagbiit laeng. Nasayaatto ngata ti riknak kalpasan ti adu a tiempo? Saan, nakarkaronto laeng. Sulit kadi a talaga? Saan!”​—Sophia.

 Ulidan iti Biblia: Pablo. Nupay binigbigna nga adda dagiti dakes a tarigagayna, nakapagteppel ni Pablo. Insuratna: “Siiistrikto a disdisiplinaek ti bagik ken ad-adipenek.”​—1 Corinto 9:27, footnote.

 Laglagipem: Sika ti agdesision no kasanom a labanan dagiti sulisog.

 Laglagipem a temporario laeng dagiti sulisog. “Adu kadagiti nakaro a sulisog idi hayskulak ti awan serserbina itan,” kuna ti 20 ti tawenna a ni Melissa. “No pampanunotek daytoy, mapatpatibkerak nga aglabasto met laeng dagiti sulisog a sangsanguek ita ket dumtengto ti aldaw a maibagak nga imbag laengen ta saanak a timmulok.”