Iti daytoy nga artikulo

•  Apay a makisaritaka iti personal?

•  No kasano a rugiam ti makisarita

•  Ti kuna dagiti padam nga agtutubo

 Kuna ti dadduma a narigat ken makapa-stress ti makisarita iti personal, lalo no ikomparada iti panagteks.

 “Mas makapadanag ti makisarita iti personal. Ngamin, saanmo a ma-edit wenno ma-delete ti imbagam a kas iti teks.”—Anna.

 “Ti panagteks ket kas iti nairekord a program, ngem ti pannakisarita iti personal ket kas iti live show. Isu a no makisarsaritaak, kanayon no kua a palagipak ti bagik, ‘Agannadka, dika agkamkamali!’”—Jean.

 Ngem masapul latta a sursuruem ti makisarita iti personal. Kas pagarigan, kasapulamto dayta no kayatmo ti maaddaan kadagiti baro a gagayyem, makabirok iti trabaho, wenno kayatmo ti maaddaan iti boyfriend wenno girlfriend no nakasaganakan.

 Ngem saan a masapul a mabutengka a makisarita iti personal. Masursurom dayta uray no managbabainka.

 “Siempre, no dadduma, makaibagaka latta iti madi isu a mabainanka. Ngem mayat no laglagipem a saanka a perpekto isu a baybay-am lattan.”—Neal.

•   Agsaludsodka. Mangpanunotka iti topiko a mabalin a paginteresan dagiti tattao, ket dayta ti usarem a mangirugi iti saritaan. Kas pagarigan:

   “Nagbakasionka?”

   “Nagpintas daytoy a website. Nakitamon?”

   “Nadamagmon nga . . . ?”

   Mabalinmo met ti mangpanunot iti pagpadaanyo iti kasarsaritam. Kas pagarigan, agkaeskuelaankayo kadi wenno agkatrabahuankayo? Usarem nga agsaludsod ti banag a pagpadaanyo.

   “Mangpanunotka kadagiti paginteresam a banag a kayatmo a maammuan ti opinion ti dadduma, sa dayta ti isaludsodmo.”—Maritza.

   Agannadka: Saanka koma a kas iti imbestigador a saludsod a saludsod. Saanka met nga agsaludsod kadagiti personal unay a bambanag. Kas pagarigan, mabalin a mabainan ti kasarsaritam no isaludsodmo, “Ania ti kabutbutengmo unay?” wenno “Apay a kanayonka a naka-blue?” Ti maikadua a saludsod ket mabalin pay ketdi a kasla dildillawem ti kasarsaritam!

   Maliklikam met ti agbalin a kasla imbestigador no ibagam ti opinionmo sakbay wenno kalpasan a sumungbat ti kasarsaritam. Kayatna a sawen, makisaritaka—saanka nga aginterbiu.

   Prinsipio ti Biblia: “Dagiti panunot . . . ti tao ket kas iti adalem a danum, ngem iyaon dagita ti tao nga adda pannakatarusna.”—Proverbio 20:5.

•   Dumngegka a naimbag. Nakadepende ti panagtultuloy ti saritaanyo iti laingmo a dumngeg, saan nga iti laingmo nga agsao.

   “Ikagkagumaak nga adda baro a maammuak iti kasarsaritak. Tantandaanak dayta, tapno inton agsaritakami manen, adda maisaludsodko.”—Tamara.

   Agannadka: Saanmo a panunoten no ania ti sumaruno nga ibagam. No dumngegka a naimbag, adda mapanunotmo nga isungbat iti ibagbaga ti kasarsaritam.

   Prinsipio ti Biblia: “Masapul nga alisto a dumngeg ti . . . maysa, nainayad nga agsao.”—Santiago 1:19.

•    Ipakitam a talaga nga interesadoka. Mas ma-enjoy-mo ti panagsaritayo no sipapanunotka iti kasarsaritam.

   “No ipariknam iti kasarsaritam nga interesadoka iti ibagbagana, ma-enjoy-yo ti agsarita uray no kasla maibusankayo iti ibaga no dadduma.”—Marie.

   Agannadka: Saanka nga agsaludsod iti personal unay. Kas pagarigan, baka mabainan ti kasarsaritam no ibagam, “Nagpintas dayta jacket-mo. Sagmamano?”

   Prinsipio ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.

 Kasanom nga ingudo ti saritaanyo? “Ikagumaam ti mangibaga iti positibo,” kuna ti agtutubo a ni Jordan. “Mabalinmo nga ibaga, ‘Nagmayat ti panagsaritata’ wenno ‘Enjoy-em ti agmalemmo, a!’ Makatulong dayta tapno nalaklakakanto a makisarita kenkuana inton sumaruno nga agkitakayo.”