“Nagrigat ti maparbangonan nga agar-aramid iti asaynment ta agtutuglepka no kuan.”—David.

 “No dadduma, agingga alas 4:30 iti parbangon nga agad-adalak sa alas 6:00 pay laeng, bumangonakon tapno mapanak ageskuela. Grabe, awan turogkon!”—Theresa.

 Nagabsuonanka kadi iti asaynment? No wen, makatulong daytoy nga artikulo tapno makalung-awka.

•  Apay a mangted dagiti titser iti asaynment?

•  Tips iti panagadal

•  Ti kuna dagiti padam nga agtutubo

 Ngamin, makatulong dagiti asaynment . . .

•   tapno lumawa ti pannakaammom

•   tapno agbalinka a mas responsable

•   tapno masursurom nga ibadyet ti orasmo

•   tapno maawatam a naimbag dagiti naisuro kenka iti klase a

 “Mangted dagiti titser iti asaynment tapno masiguradoda nga aramiden dagiti estudianteda ti maad-adalda, imbes a sumrek latta daytan iti maysa a lapayagda sa rummuar iti bangir.”—Marie.

 Kas pagarigan, mapasayaat ti math ken science ti abilidadmo a mangsolbar iti problema. Sigun kadagiti eksperto, mangpataud ken mangpalagda dayta kadagiti baro a koneksion iti utek. Isu a ti asaynment ket kasla ehersisio para iti utek!

 Dagiti asaynment ket paset ti biag a masapul a sanguem, makitam man dagiti pagsayaatanna wenno saan. Ngem adda maaramidam: Uray saanmo a makontrol ti kaadu ti asaynment a maited kenka, mabalinmo a kissayan ti oras a kasapulan a mangileppas kadagita. Kitaentayo no kasano.

 No marigatanka a mangileppas kadagiti asaynmentmo, baka masapul a panunotem a naimbag no kasanom nga aramiden dagita tapno saanka unay a mabannog. Padasem dagitoy.

•   Umuna a Tip: Agplanoka. Kuna ti Biblia: “Sigurado nga agballigi dagiti plano ti nagaget.” (Proverbio 21:5) Siguraduem nga adda amin a kasapulam sakbay a rugiam ti asaynmentmo tapno saanka nga agkaratakder a mangala iti kasapulam.

   Mangpilika met iti lugar a makapagpokuska. Kaykayat ti dadduma ti natalna ken nalawag a kuarto iti balayda. Kaykayat met ti dadduma ti sabali a lugar, kas iti library.

   “Makatulong no adda gamitmo nga usarem a mangyeskediul a naimbag iti orasmo, kas iti planner. No ammom no ania ti asaynmentmo ken no kaano nga ipasam, saanka unay a ma-stress.”—Richard.

•   Maikadua a Tip: Urnosem dagiti aramidem. Kuna ti Biblia: “Aramidenyo ti amin a banag . . . sigun iti urnos.” (1 Corinto 14:40) Isu a kitaem no ania ti umuna nga aramidem ken no ania ti isarunom.

   Kayat ti dadduma nga iyun-una ti karirigatan nga asaynmentda. Kayat met ti dadduma nga iyun-una dagiti nalaklaka nga asaynmentda, ta mariknada a naragsakda ta adda nalpasdan. Piliem no ania ti epektibo para kenka.

   “Talaga a makatulong no aglistaka ta ammom ti aramidem ken no ania ti iyun-unam. No kasta ti aramidem, saanka a ma-pressure nga agaramid kadagiti asaynmentmo ken saan a kasla nakaad-adu ti aramidem.”—Heidi.

•   Maikatlo a Tip: Aramidem ti asaynmentmo. Kuna ti Biblia: “Agbalinkayo a nagaget, saan a nasadut.” (Roma 12:11) Dimo ipalubos nga agawen ti dadduma nga aktibidad ti orasmo a mangaramid iti asaynmentmo—uray no makaengganio dagita.

   Dagiti manangitantan posible a maladawda nga agipasa wenno agap-apurada a mangileppas iti trabahoda isu a kaaduanna a saan a nasayaat ti resulta ti panagadalda ken ti trabahoda. Maliklikam ti ma-stress ken malidayan no aramidem a dagus ti asaynmentmo.

   “No aramidek a dagus ti asaynmentko kalpasan ti klasek wenno no rugiak a dagus ti naited a project-ko, saanakton a ma-stress ken adda ti orasko iti dadduma nga aktibidad.”—Serina.

   SUHESTION: Aramidem ti asaynmentmo iti isu met laeng nga oras iti kada aldaw. Tulongannaka dayta nga agbalin a disiplinado ken kanayon a mangsurot iti eskediulmo.

•   Maikapat a Tip: Agpokuska. Kuna ti Biblia: “Kumitaka laeng iti sanguanam.” (Proverbio 4:25) Masurotmo dayta a balakad no liklikam dagiti makaistorbo kenka no agad-adalka—lalo dagiti gadyet.

   Mabalin a madoble ti oras a mausarmo a mangileppas iti asaynmentmo no agin-Internet ken agtetekska. Ngem no agpokuska, saanka unay a ma-stress ken adda pay mabati nga orasmo para iti sabali a banag.

   “Nagrigat ti agpokus gapu iti cell phone, computer, video game, ken TV. Nakatulong kaniak ti panangiddepko iti cellphone-ko ken iti dadduma pay a gadyet nga adda iti asidegko a mabalin a makaistorbo kaniak.”—Joel.

•   Maikalima a Tip: Agbalinka a balanse. Kuna ti Biblia: ‘Maammuanda koma a nainkalintegankayo.’ (Filipos 4:5) Saanka unay a ma-stress a mangaramid iti asaynmentmo no ag-break-ka no kasapulan. Mabalinmo ti agpagnapagna, agbisikleta, wenno agtaray.

   No iti panagriknam ket kasla nagabsuonanka latta iti nakaad-adu nga asaynment, makisaritaka kadagiti titsermo. No makitada nga ar-aramidem ti amin, baka mangaramidda iti panagbalbaliw.

   “Dimo ipalubos a ma-stress-ka ken saankan a naragsak gapu kadagiti asaynmentmo. Aramidem ti best-mo. Ngem siempre, adda dagiti banag a saan a kasapulan a pakabagtitam, kas iti panagaramid iti asaynment.”—Julia.

 Isaludsodmo iti bagim:

•   Ania dagiti kasapulak para iti asaynmentko?

•   Kaano ti kasayaatan a panangaramidko kadagiti asaynmentko?

•   Sadino ti kasayaatan a lugar a makapagpokusak a mangaramid iti asaynmentko?

•   Kasano a maliklikak ti agitantan?

•   Ania dagiti mabalin a mangistorbo kaniak?

•   Kasanok a maliklikan dagiti mangistorbo kaniak, kas iti gadyet wenno dadduma pay?

•   Kasanok a maileppas dagiti asaynmentko a saanak a ma-stress?

 NAPATEG A PALAGIP: Siguraduem nga ammom a talaga no ania ti asaynmentmo. No adda dagiti saludsodmo, damagem iti titsermo sakbay a pumanawka iti classroom-yo.