Ti common limpet ket maysa a kita ti bisukol iti kadanuman. Sukog apa ti shell-na. Nakaskasdaaw ti kinatibker dagiti ngipenna. Ti pakabuklan dagita ket naingpis ken nasedsed a fiber ti natangken a mineral a maawagan iti goethite nga adda iti uneg ti naluklukneng a protina a pannakapundasionna.

 Panunotem: Ti radula (wenno pannakagugot) ti limpet ket kasla dila a napno kadagiti naintar a kurbado a ngipen. Ti kaatiddog ti tunggal ngipen ket kurang a maysa a milimetro (3/64 a pulgada). Us-usarenna dagita a pagkurab. Masapul a nakapigpigsa ken nakatibtibker ti tunggal ngipenna tapno bayat a mangmangan, makurabna dagiti lumot iti rabaw dagiti bato.

 Nagusar dagiti researcher iti nakapigpigsa a mikroskopio tapno marukodda no kasano kapigsa dagiti ngipen ti limpet sakbay a maperdi. Natakuatanda a dagiti ngipenna ti katibkeran pay laeng a nairekordda. Natibtibker pay nga amang dagita ngem iti saput ti lawwalawwa. Imbaga ti nangidaulo iti research: “Masapul a tuladentayo ti disenio dagiti ngipen ti limpet kadagiti maimbentotayo a produkto.”

  Mamati dagiti researcher a dagiti sintetiko a bersion ti ngipen ti limpet ket mabalin nga usaren iti panagaramid kadagiti lugan, bangka, eroplano, ken uray pay iti panangaramid kadagiti postiso.

 Panagkunam? Resulta kadi ti ebolusion ti nakaskasdaaw nga estruktura ti ngipen ti limpet? Wenno adda nangdisenio iti dayta?