Ammo ti amin a nangpadas a mangpatit iti ngilaw a nakarigrigat nga aramiden dayta. Gapu ta kasla kimat ti kapartak dagitoy nga insekto, kaaduanna a malisianda dagiti mangtiliw kadakuada.

 Nadiskobre dagiti sientista a ti maysa a kita ti ngilaw a maawagan iti fruit fly ket makapagsikko a kas iti fighter jet, ngem iti bassit laeng a paset ti segundo. Apaman a maaddaandan iti payak, “ekspertoda metten nga agtayab,” kuna ni Professor Michael Dickinson. “Kasla panangikabil dayta iti kayyanak nga ubing iti komplikado nga eroplano a pakigubat nga ammona ti kudkuditenna.”

 Im-video dagiti researcher ti panagtayab dagita a ngilaw ket nadiskobreda nga agpayakpakda iti mamin-200 iti kada segundo. Ngem umanayen ti maminsan a panagpayakpakda tapno makabuelta ken makalibasda.

 Komusta ngay ti panagtignayda? Nadiskobre dagiti researcher a no agpeligro dagitoy a ngilaw, mamin-50 a naparpartak ti panagtignayda ngem iti panagkirem ti tao. Inlawlawag ni Dickinson: “Nakalalaing ti panagtantia dagitoy a ngilaw ta maammuanda a dagus no sadino ti ayan ti peligro ken no sadino ti kasayaatan a pagturonganda.”

 Kasano a maaramidan daytoy ti nagbassit nga utek ti fruit fly? Maysa daytoy a misterio iti inhenieria a kayat a matakuatan dagiti researcher.

 Ania ti makunam? Resulta kadi ti ebolusion ti abilidad ti fruit fly nga agtayab? Wenno adda nangdisenio iti dayta?