Wen. Tulongannaka ti Dios no la ket ta maitunos iti pagayatanna dagiti banag a sipapasnek a kidkiddawem. Uray no saanmo pay a napadas ti nagkararag, maparegtaka kadagiti pagarigan iti Biblia a nangikararag iti “Diosko, tulongannak.” Kas pagarigan:

•   “Tulongannac, O Jehova a Diosco; O isalacannac cas mayalubog iti kinamanagayatmo.”—Salmo 109:26, Ti Biblia.

•   “Napanglaw ken nakurapayak: O Dios, tulongannak.”—Salmo 69:6, Douay Version.

 Siempre, ti nangisurat kadagita a sasao ket dakkel ti pammatina iti Dios. Ngem denggen ti Dios dagiti umararaw kenkuana buyogen iti umiso a kababalin, kas koma dagidiay “nadunor ti pusoda” wenno “naidagel iti espiritu.”—Salmo 34:18.

 Saanmo koma a panunoten a nakaad-adayo unay ti Dios ken isu ket saan a maseknan kadagiti problemam. Kuna ti Biblia: “Ta ni Jehova nangato, ket kaskasdi a makitana daydiay napakumbaba; Ngem daydiay napangato ammona laeng iti adayo.” (Salmo 138:6) Kinapudnona, iti naminsan, kinuna ni Jesus kadagiti adalanna: “Dagiti mismo a buok ti uloyo nabilangda amin.” (Mateo 10:30) Ammo ni Jehova dagiti maipapan kenka uray dagiti banag a saanmo nga ammo. Gapuna, no ikararagmo Kenkuana dagiti pakarigatam, sigurado nga imdenganna dayta!—1 Pedro 5:7.