Saan. Kas dakamaten ti linteg nga inted ti Dios iti nasion ti Israel, kuna ti New Catholic Encyclopedia: “Kadagiti nagduduma a salaysay ti Biblia, nalawag a saan a nausar dagiti imahen iti pudno a panagdayaw iti Dios.” Usigem dagitoy a teksto ti Biblia:

•   “Dika mangaramid maipaay kenka iti maysa a kinitikitan a ladawan wenno maysa a porma a kaasping ti aniaman a banag nga adda iti langlangit sadi ngato wenno adda iti daga iti baba wenno adda iti dandanum iti uneg ti daga. Dika agruknoy kadakuada wenno mauyotan nga agserbi kadakuada, agsipud ta siak ni Jehova a Diosmo maysaak a Dios a mangalkalikagum iti naipamaysa a debosion.” (Exodo 20:​4, 5) Gapu ta kalikaguman ti Dios ti “naipamaysa a debosion,” saan a maragsakan no agdayawtayo kadagiti imahen, ladawan, idolo, rebulto, wenno simbolo.

•   “Diak ipalubos a ti panagdayaw kaniak ket maipaay kadagiti ladawan.” (Isaias 42:8, Easy-to-Read Version) Saanna nga awaten ti Dios ti panagdayaw kenkuana babaen kadagiti imahen. Idi adda dagiti Israelita nga agdayaw kenkuana babaen ti ladawan ti urbon a baka, imbaga ti Dios a nakaaramidda iti “nadagsen a basol.”​—Exodo 32:​7-9, Easy-to-Read Version.

•   “Rebbeng a ditay pagarupen a ti Nadibinuan a Persona umasping iti balitok wenno pirak wenno bato, nga umasping iti maysa a banag a naikitikit babaen ti arte ken panagpartuat ti tao.” (Aramid 17:29) Maisupadi iti panagdayaw dagiti pagano, a masansan nga agusar kadagiti ladawan a “naikitikit babaen ti arte ken panagpartuat ti tao,” a dagiti Kristiano ket masapul a ‘magna babaen ti pammati, saan nga iti panagkita,’ kas kuna ti Biblia.​—2 Corinto 5:7.

•   “Igagayo ti bagbagiyo [umadayokayo] manipud kadagiti idolo.” (1 Juan 5:21) Iti bilin kadagiti Kristiano ken iti nasion ti Israel, kanayon nga ibaga ti Biblia a palso ti pannursuro nga anamongan ti Dios ti panagusar kadagiti ladawan iti panagdayaw.