Uray no saan a detalyado nga inlawlawag ti Biblia ti maipapan iti panagsugal, maawatantayo kadagiti prinsipio ti Biblia nga ibilang ti Dios a basol ti panagsugal.​—Efeso 5:​17. a

•   Agsugal ti maysa a tao gapu iti kinaagum, banag a kagura ti Dios. (1 Corinto 6:9, 10; Efeso 5:3, 5) Mangnamnama dagiti sugador a maabak ti dadduma tapno mangabakda iti kuarta, ngem ibaga ti Biblia a dakes ti napalalo a panangtarigagay iti sanikua wenno kukua ti dadduma.​—Exodo 20:17; Roma 7:7; 13:9, 10.

•   Ti panagsugal, uray iti bassit laeng a kantidad, ket mabalin nga agresulta iti makadadael a panagayat iti kuarta.​—1 Timoteo 6:9, 10.

•   Kaaduanna nga agdepende dagiti sugador iti gasat, wenno suerte, wenno kadagiti pampammati (pamahiin iti Tagalog). Ngem ibilang ti Dios dagita a patpatien kas kita ti idolatria, a saan a maitunos iti panagdaydayaw kenkuana.​—Isaias 65:11.

•   Irekomenda ti Biblia ti nagaget a panagtrabaho, imbes a ti panagtarigagay a maalam ti banag a dimo man la nagbannogan. (Eclesiastes 2:24; Efeso 4:28) Dagidiay mangsursurot iti balakad ti Biblia ket ‘mangan iti taraon a mateggedda [wenno, nagbannoganda] a mismo.’​—2 Tesalonica 3:10, 12.

•   Mabalin a riingen ti panagsugal ti saan a nasayaat a pannakikompetensia, banag a maikontra iti Biblia.​—Galacia 5:26.