Ti Balkut iti Turin (Shroud of Turin) ket saan a nadakamat iti Biblia. Maysa daytoy a lupot a lienso wenno linen nga ipagarup ti adu a nausar iti pannakaitabon ni Jesu-Kristo. Gapu iti daytoy a patpatien, ibilang ti dadduma daytoy a balkut kas maysa kadagiti kasasagraduan a banag iti Kakristianuan. Adda itan dayta a balkut iti maysa a simbaan idiay Turin, Italy, ken naikabil iti haytek a pagikabilan kas proteksionna.

 Suportaran kadi dagiti salaysay ti Biblia nga agpayso ti Balkut iti Turin? Saan.

  Kitaentayo ti tallo a banag a nakaidumaan ti balkut no idilig iti kuna ti Biblia.

1.   Ti balkut ket maymaysa a pedaso ti lupot a 442 a sentimetro ti kaatiddogna ken 113 a sentimetro ti kaakabana (14 ft 6 in. by 3 ft 8 in.), sa adda karamanna a 8 a sentimetro (3 in.) ti kaatiddogna a lupot a nadait a paatiddog.

    Ti kuna ti Biblia: Saan a maymaysa a lupot ti nausar a pangbalkut iti bangkay ni Jesus no di ket adu a retaso. Sabali a lupot ti naibalkut iti ulona. Kalpasan a napagungar ni Jesus, napan ti maysa kadagiti apostolna iti bakante a tanem ket nakitana dagiti patapat a nakadisso.” Inayon ti Biblia: “Ti lupot nga adda idi iti rabaw ti ulona a saan a nakadisso a naitipon kadagiti patapat no di ket naisina a nalukot iti maysa a disso.”​—Juan 20:6, 7.

2.   Ti balkut ket addaan kadagiti marka a maipagarup a mansa ti dara ti saan a nadigus a bangkay.

    Ti kuna ti Biblia: Idi natay ni Jesus, insaganada ti bagina sigun “iti wagas ti kaugalian dagiti Judio a panagisagana a maipaay iti panagitabon.” (Juan 19:39-42) Dayta a kaugalian ramanenna ti panangdigus iti bangkay ken panangsapsapo iti lana ken especia sakbay a maitabon. (Mateo 26:12; Aramid 9:37) No kasta, dinigus dagiti adalan ni Jesus ti bangkayna sakbay a binalkutda kadagiti retaso ti lupot.

3.   Ti balkut ket addaan iti marka ti maysa a lalaki a “naipaidda a paatiddog iti kagudua a paset ti balkut, ken ti kagudua ti balkut ket nayabbong iti makinsango a paset ti bagina manipud ulo agingga iti dapanna,” sigun iti Encyclopædia Britannica.

    Ti kuna ti Biblia: Pinagsasaritaan dagiti adalan ni Jesus ti ipapatayna, ti bakanten a tanemna, ken ti imbaga dagiti babbai a nakakita kadagiti “karkarna a buya dagiti anghel a nagkuna nga isu sibibiag.” (Lucas 24:15-24) No ti balkut ket adda iti nakaitabonan ni Jesus, sigurado a dinakamatda koma met ti maipapan iti balkut ken dagiti marka iti dayta. Ngem awan ti ibaga ti Biblia a napagsasaritaanda dayta.

 Saan. Uray koma no agpaypayso dayta, saan latta a rumbeng a maibilang a sagrado. Kitaentayo dagiti prinsipio ti Biblia a mangilawlawag iti dayta.

1.   Saan a kasapulan. Inlawlawag ni Jesus: “Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:24) Iti pudno a panagdaydayaw, saan a maipalubos ti panagusar kadagiti narelihiosuan a banag wenno alikamen iti panagdaydayaw.

2.   Maiparit dayta. Sigun iti Sangapulo a Bilin, maiparit ti idolatria. (Deuteronomio 5:6-10) Kasta met nga imbilin ti Biblia kadagiti Kristiano: “Igagayo ti bagbagiyo manipud kadagiti idolo.” (1 Juan 5:21) Dadduma ti mabalin a mangirason a saan met nga idolo ti balkut no di ket alikamen laeng, wenno simbolo, ti narelihiosuan a patpatienda. Nupay kasta, ti maysa nga alikamen ket agbalin nga idolo ti maysa a tao no daydayawenna dayta. a Gapuna, no kayat ti maysa a paragsaken ti Dios, masapul a saan nga agdaydayaw iti aniaman nga alikamen a pakairamanan ti balkut.