Ni Juan Bautista ket propeta ti Dios. (Lucas 1:76) Nayanak idi dandanin agpatingga ti umuna a siglo B.C.E. ket nagbiag idi umuna a siglo C.E. Isu ti pinili ti Dios a mangisagana iti dalan para iti Mesias, wenno Kristo. Inaramid dayta ni Juan babaen ti panangikasabana iti mensahe ti Dios kadagiti padana a Judio tapno agsublida iti Dios.—Marcos 1:1-4; Lucas 1:13, 16, 17.

 Ti mensahe ni Juan ti nakatulong kadagiti napudno a tattao tapno mabigbigda a ni Jesus a taga-Nazaret ti naikari a Mesias. (Mateo 11:10) Imbaga ni Juan kadagiti agdengdengngeg kenkuana nga agbabawida kadagiti basolda sa agpabautisarda kas panangipakitada nga agbabbabawida. (Lucas 3:3-6) Gapu ta adu ti binautisaran ni Juan, naawagan iti Bautista wenno Mammautisar. Ti kaimportantean nga inaramid ni Juan ket ti panangbautisarna ken Jesus. a—Marcos 1:9.

Iti daytoy nga artikulo

•  Apay a naidumduma ni Juan Bautista?

•  Siasino dagiti nagannak ni Juan Bautista?

•  Asino ti nangipapatay ken Juan Bautista?

•  Agkaribal kadi da Juan Bautista ken Jesus?

•  Mano ti Juan a nainaganan iti Biblia?

 Naipakpakauna ti aramidenna: Babaen ti panangasaba ni Juan, tinungpalna ti padto maipapan iti mensahero ni Jehova. (Malakias 3:1; Mateo 3:1-3) Talaga nga isu ti ‘nangisagana kadagiti tattao para ken Jehova’—kayatna a sawen, insaganana ti dalan tapno awaten dagiti padana a Judio ti mensahe ti kangrunaan a pannakabagi ni Jehova a Dios, ni Jesu-Kristo.—Lucas 1:17.

 Naaramidanna: Imbaga ni Jesus nga “awan ti natantan-ok ngem ni Juan a Mammautisar. Ngem daydiay kanunumuan iti Pagarian ti langit ket natantan-ok ngem ni Juan.” (Mateo 11:11) Saan la a basta propeta ni Juan no di pay ket isu ti naipadto a “mensahero.” Isu nga awan ti adipen ti Dios sakbayna a maibilang a natantan-ok ngem isuna. Ipakita met ti imbaga ni Jesus a saan a karaman ni Juan kadagidiay agturay iti Pagarian idiay langit. b Natay daytoy matalek a propeta sakbay a linuktan ni Kristo ti dalan idiay langit. (Hebreo 10:19, 20) Imbes ketdi, maysanto ni Juan kadagiti iturayan ti Pagarian ti Dios ditoy daga, ken adda namnamana nga agbiag nga agnanayon iti Paraiso.—Salmo 37:29; Lucas 23:43.

 Dagiti nagannak ni Juan ket ti agassawa a da Zacarias ken Elisabet. Ni Zacarias ket maysa a Judio a padi. Milagro ti pannakayanak ni Juan ta lupes wenno saan nga aganak ni nanangna. Kasta met, “baketen” ni Elisabet ken “lakay metten” idi ni Zacarias.—Lucas 1:5-7, 13.

 Ni Ari Herodes Antipas pinapugotanna ni Juan. Inaramidna dayta ta sinugsogan ti asawana a ni Herodias. Kagurgura ni Herodias ni Juan. Imbaga ngamin ni Juan ken Herodes, a mangibilbilang iti bagina a Judio, nga illegal ti panangasawana ken Herodias sigun iti linteg dagiti Judio.—Mateo 14:1-12; Marcos 6:16-19.

 Ti ideya nga agkaribalda ket saan a pulos suportaran ti Biblia. (Juan 3:25-30) Kinapudnona, imbaga a mismo ni Juan a responsabilidadna nga isagana ti dalan para iti Mesias, imbes a makikompetensia kenkuana. Imbaga ni Juan: “Mangbabautisarak iti danum tapno isu ket maipakaammo iti Israel.” Sa innayonna: “Isu ti Anak ti Dios.” (Juan 1:26-34) Nakaragragsak ngarud ni Juan idi nadamagna a naballigi ti ministerio ni Jesus.