Ania ti Langa ni Jesus?

I-PLAY

Sungbat ti Biblia

Awan ti makaammo iti eksakto a langa ni Jesus gapu ta saan a nailadawan dayta iti Biblia. Ipakita dayta a saan a napateg ti langa ni Jesus. Nupay kasta, mangted kadatayo ti Biblia iti ideya iti posible a langa ni Jesus.

Itsura: Judio ti nanang ni Jesus isu a mabalin nga isu ti nakatawidanna kadagiti gagangay nga itsura dagiti Judio. (Hebreo 7:14) Agparang a saan a naisangsangayan ti itsurana. Naminsan, sililimed a nakapagdaliasat ni Jesus idiay Jerusalem manipud Galilea nga awan ti nakabigbig kenkuana. (Juan 7:10, 11) Nalawag met a saan a naiduma ti itsurana uray kadagiti kadekketan nga adalanna. Masapul pay idi nga ipabigbig ni Judas Iscariote no asino ni Jesus kadagiti armado a lallaki a mangaresto kenkuana.—Mateo 26:47-49.
Kaatiddog ti buok: Imposible nga atiddog ti buok ni Jesus ta kuna ti Biblia a “no ti lalaki atiddog ti buokna, pakaibabainan kenkuana dayta.”—1 Corinto 11:14.
Barbas: Adda barbas ni Jesus. Nagtulnog iti linteg dagiti Judio a mangiparit kadagiti adulto a lallaki a ‘mangdadael iti pingir ti barbasda.’ (Levitico 19:27; Galacia 4:4) Maysa pay, nadakamat iti Biblia ti barbas ni Jesus iti maysa a padto maipapan iti panagsagabana.—Isaias 50:6.
Bagi: Ipakita dagiti salaysay a nabaked ni Jesus. Kinilkilometro ti pinagnana bayat ti ministeriona. (Mateo 9:35) Namindua a dinalusanna ti templo dagiti Judio, a binalintuagna dagiti lamisaan dagiti agsuksukat iti kuarta, ken iti maysa kadagita a gundaway, pinaruarna dagiti animal babaen iti pagsaplit a tali. (Lucas 19:45, 46; Juan 2:14, 15) Kuna ti McClintock and Strong’s Cyclopedia: “Ipakita ti amin a salaysay dagiti ebanghelio a nasalun-at ken napigsa [ni Jesus].”—Volume IV, panid 884.
Ekspresion ti rupa: Naayat ken mannakipagrikna ni Jesus, ket sigurado a makita dayta iti ekspresion ti rupana. (Mateo 11:28, 29) Napan kenkuana ti amin a kita ti tattao tapno maliwliwa ken agpatulong. (Lucas 5:12, 13; 7:37, 38) Komportable a makikadua kenkuana uray dagiti ubbing.—Mateo 19:13-15; Marcos 9:35-37.

Di umiso a kapanunotan maipapan iti langa ni Jesus

Di umiso: Ibagbaga ti dadduma nga Africano ti puli ni Jesus gapu ta inkompara ti libro nga Apocalipsis ti buokna iti delana (wool) ken ti sakana iti “napasileng a gambang.”—Apocalipsis 1:14, 15, Ti Baro a Naimbag a Damag Biblia.

Umiso: Ti libro nga Apocalipsis ket naiparang babaen “kadagiti pagilasinan.” (Apocalipsis 1:1) Simboliko a sasao ti nausar iti pannakailadawan ti buok ken saka ni Jesus a mangirepresentar kadagiti kualidadna kalpasan a napagungar, saan ket nga iti langana idi adda ditoy daga. Iti panangdakamat ti Apocalipsis 1:14 a ti “ulo [ni Jesus] ken ti buokna ket purawda a kas iti puraw a delana, kas iti niebe,” kolor ti pagkomkomparaenna, saan ket a ti kalamuyot dagita. Irepresentar dayta ti siribna gapu iti edad. (Apocalipsis 3:14) Saan nga ikomkompara daytoy a bersikulo ti kinalamuyot ti buok ni Jesus iti delana ken uray iti niebe.

Dagiti saka ni Jesus ket kas iti “nasudi a gambang no bumegbeggang iti urno.” (Apocalipsis 1:15) Kasta met a ti rupana ket “kas iti init no agsilnag iti pannakabalinna.” (Apocalipsis 1:16) Awan ti puli a kasta ti kolor ti kudilda, isu a simboliko la ketdi daytoy a sirmata, a mangipakita iti napagungar a ni Jesus kas daydiay “agnanaed iti di maasitgan a lawag.”—1 Timoteo 6:16.

Di umiso: Nakapuy ken nalupoy ni Jesus.

Umiso: Napigsa ken natured ni Jesus. Kas pagarigan, situtured nga inyam-ammona ti bagina kadagiti armado a lallaki a mangaresto kenkuana. (Juan 18:4-8) Sigurado a napigsa met ni Jesus ta nagtrabtrabaho kas karpintero a nangus-usar kadagiti manomano a remienta.—Marcos 6:3.

Apay ngarud a kasapulan idi ni Jesus ti tulong a mangbagkat iti kayo a pagtutuokanna? Ken apay nga isu ti immuna a natay kadagiti kakaduana a nailansa iti kayo? (Lucas 23:26; Juan 19:31-33) Sakbay la unay ti pannakapapatay ni Jesus, nakakapkapsuten ti bagina. Awan ti turogna, a ti maysa a rason ket ti emosional a pannakaparigatna. (Lucas 22:42-44) Minaltrato isuna dagiti Judio iti rabii, sa kabigatanna, pinarparigat met dagiti Romano. (Mateo 26:67, 68; Juan 19:1-3) Mabalin a dagita ti makagapu nga isu ti immuna a natay.

Di umiso: Kanayon a serioso ken naliday ni Jesus.

Umiso: Naan-anay nga insarming ni Jesus dagiti kualidad ti nailangitan nga Amana a ni Jehova, nga iladladawan ti Biblia kas “ti naragsak a Dios.” (1 Timoteo 1:11; Juan 14:9) Kinapudnona, insuro ni Jesus iti sabsabali no kasano ti agbalin a naragsak. (Mateo 5:3-9; Lucas 11:28) Ipakita dagita a masansan a naragsak ti ekspresion ti rupa ni Jesus.