Siasino Wenno Ania Dagiti Anghel?
Sungbat ti Biblia
Dagiti anghel ket mas mannakabalin ken ad-adu ti kabaelanda nga aramiden ngem kadagiti tattao. (2 Pedro 2:11) Addada idiay langit, wenno lugar nga ayan dagiti espiritu, a nangatngato ngem iti pisikal nga uniberso. (1 Ar-ari 8:27; Juan 6:38) Maawaganda met ngarud nga espiritu.—1 Ar-ari 22:21; Salmo 18:10.
Naggapuan dagiti anghel?
Pinarsua ti Dios dagiti anghel babaen ken Jesus, nga aw-awagan ti Biblia a “ti inauna iti isuamin a parsua.” Kastoy ti ibagbaga ti Biblia iti panangusar ti Dios ken Jesus iti panamarsua: “Babaen [ken Jesus], amin a sabsabali pay a bambanag naparsuada iti langlangit ken iti rabaw ti daga, ti bambanag a makita ken ti bambanag a di makita,” a pakairamanan dagiti anghel. (Colosas 1:13-17) Saan nga agasawa ken agpaadu dagiti anghel. (Marcos 12:25) Imbes ketdi, indibidual a naparsua dagitoy nga “annak ti pudno a Dios.”—Job 1:6.
Nabayagen a naparsua dagiti anghel, sakbay pay a naparsua ti daga. Idi pinarsua ti Dios ti daga, “nagdir-i [dagiti anghel] buyogen ti panangpadayaw.”—Job 38:4-7.
Kasano kaadu dagiti anghel?
Awan ti eksakto nga ibaga ti Biblia, ngem ipakitana a nakaad-aduda. Kas pagarigan, iti maysa a sirmata, nakakita ni apostol Juan iti ginasut a milion nga anghel.—Apocalipsis 5:11.
Adda kadi nagan dagiti anghel ken agduduma ti kababalinda?
Wen. Adda dua a nagan ti anghel a nadakamat iti Biblia: Miguel ken Gabriel. (Daniel 12:1; Lucas 1:26) a Binigbig ti dadduma nga anghel nga adda naganda, ngem saanda nga imbaga dagita.—Genesis 32:29; Uk-ukom 13:17, 18.
Agduduma ti kababalin dagiti anghel. Makapagsisinnaritada. (1 Corinto 13:1) Kabaelanda ti agpanunot ken idaydayaw ti Dios. (Lucas 2:13, 14) Adda met wayawayada nga agpili iti naimbag wenno dakes, kas iti napasamak idi pinili ti dadduma kadakuada ti sumurot ken Satanas a Diablo idi nagrebelde iti Dios.—Mateo 25:41; 2 Pedro 2:4.
Adda kadi ranggo dagiti anghel?
Adda. Ni Miguel nga arkanghel ti kangatuan ken kabilgan iti amin nga anghel. (Judas 9; Apocalipsis 12:7) Nangato ti ranggo dagiti anghel a serafin a nakapuesto iti asideg ti trono ni Jehova. (Isaias 6:2, 6) Nangato met ti ranggo dagiti anghel a kerubin, nga addaan kadagiti espesial a trabaho. Kas pagarigan, binantayan dagiti kerubin ti pagserkan iti hardin ti Eden idi naparuar da Adan ken Eva.—Genesis 3:23, 24.
Tultulongan kadi dagiti anghel dagiti tattao?
Wen. Us-usaren ti Dios dagiti matalek nga anghelna a tumulong kadagiti tattao ita.
Us-usaren ti Dios dagiti anghel a mangiwanwan kadagiti adipenna iti panangikasaba iti naimbag a damag ti Pagarian ti Dios. (Apocalipsis 14:6, 7) Pagsayaatan daytoy dagiti mangikaskasaba ken dumngeg iti naimbag a damag.—Aramid 8:26, 27.
Tumultulong dagiti anghel tapno saan a makastrek ti impluensia dagiti dakes a tattao iti kongregasion.—Mateo 13:49.
Iwanwanwan ken protprotektaran dagiti anghel dagiti matalek iti Dios.—Salmo 34:7; 91:10, 11; Hebreo 1:7, 14.
Asidegen a bang-aran dagiti anghel dagiti tattao babaen iti pannakitinnulongda ken Jesu-Kristo a mangikkat iti kinadakes.—2 Tesalonica 1:6-8.
Adda kadi anghel de la guardia ti tunggal tao?
Kitkitaen dagiti anghel ti naespirituan a pagimbagan dagiti adipen ti Dios. Ngem saan a kayat a sawen dayta nga ikkan ti Dios ti tunggal Kristiano iti anghel a mangbantay kadakuada. b (Mateo 18:10) Saan a protektaran dagiti anghel dagiti adipen ti Dios iti amin a sulisog wenno pakasubokanda. Ibaga ti Biblia a no masuot ti maysa, masansan nga ‘agaramid [ti Dios] iti dalan a pagruaran’ babaen iti panangitedna iti sirib ken bileg tapno makapagibtur.—1 Corinto 10:12, 13; Santiago 1:2-5.
Di umiso a kapanunotan maipapan kadagiti anghel
Di umiso: Nasingpet amin nga anghel.
Umiso: Dakamaten ti Biblia nga adda dagiti “nadangkes nga espiritu” ken dagiti “anghel a nagbasol.” (Efeso 6:12; 2 Pedro 2:4) Maawagan a demonio dagitoy dakes nga anghel, a simmurot ken Satanas idi nagrebelde iti Dios.
Di umiso: Immortal dagiti anghel.
Umiso: Madadaelto dagiti dakes nga anghel, karaman ni Satanas a Diablo.—Judas 6.
Di umiso: Agbalin nga anghel dagiti tattao no matayda.
Umiso: Pinarsua ti Dios dagiti anghel, saanda a tao a napagungar sa nagbalin nga anghel. (Colosas 1:16) Umawatto iti immortal a biag manipud iti Dios dagiti tattao a mapagungar idiay langit. (1 Corinto 15:53, 54) Nangatngatodanto ngem kadagiti anghel.—1 Corinto 6:3.
Di umiso: Naparsua dagiti anghel tapno pagserbianda dagiti tattao.
Umiso: Ti Dios ti pagtultulnogan dagiti anghel, saan a datayo. (Salmo 103:20, 21) Uray ni Jesus imbagana a ti Dios ti pagpatulonganna, saan ket a direkta a kadagiti anghel.—Mateo 26:53.
Di umiso: Mabalintayo ti agkararag kadagiti anghel tapno tulongandatayo.
Umiso: Ti panagkararag iti Dios ket paset ti panagdaydayawtayo, a para laeng ken Jehova a Dios. (Apocalipsis 19:10) Ti laeng Dios ti masapul a pagkararagantayo, babaen ken Jesus.—Juan 14:6.
a Adda dagiti bersion ti Biblia a nangusar iti sao a “Lucifer” iti Isaias 14:12, ket patien ti dadduma a dayta ti nagan ti anghel a nagbalin a Satanas a Diablo. Ngem “agsilsilnag” ti kaipapanan ti orihinal a Hebreo a sao a nausar ditoy. Ipakita ti dadduma a bersikulo a saan a tumukoy ken Satanas daytoy a sao, no di ket iti imperio ti Babilonia, nga imbabain ti Dios gapu iti kinapangasna. (Isaias 14:4, 13-20) Nausar ti sao nga “agsilsilnag” a panguyaw iti imperio ti Babilonia kalpasan ti pannakaabakna.
b Patien ti dadduma a ti salaysay maipapan iti pannakairuar ni Pedro iti pagbaludan ipakitana nga adda anghel de la guardia ni Pedro. (Aramid 12:6-16) Ngem idi tinukoy dagiti adalan ti “anghel [ni Pedro],” mabalin nga impagarupda a ti napan kadakuada ket maysa nga anghel a mangirepresentar ken Pedro, saan a ni Pedro a mismo.
Baka Kayatmo Met ti
SUNGBAT DAGITI SALUDSOD MAIPAPAN ITI BIBLIA
Siasino ti Arkanghel a ni Miguel?
Pagaammo met isuna iti sabali a nagan a mabalin a mas pamiliar kenka.
TI PAGWANAWANAN
Adda Kadi Anghel de la Guardiam?
Maibagam kadi nga adda maysa wenno ad-adu pay nga anghel a mangprotektar kenka?
SUNGBAT DAGITI SALUDSOD MAIPAPAN ITI BIBLIA
Talaga Kadi nga Adda Demonio?
Ania dagiti demonio? Naggapuanda?
PANNURSURO TI BIBLIA
Padasem ti Panagadal iti Biblia
Padasem ti libre a panagadal iti Biblia nga adda tumulong kenka.