Agbalin a gayyemmo ti Dios no ammuem ti maipapan kenkuana ken no aramidem dagiti banag a mangparagsak kenkuana. No aramidem dayta ‘umasidegto kenka ti Dios.’ (Santiago 4:8) Ipasigurado ti Biblia kadatayo a “saan nga adayo [ti Dios] iti tunggal maysa kadatayo.”—Aramid 17:27.

•  Dagiti aramidem tapno maam-ammom ti Dios

•  Di umiso a kapanunotan maipapan iti panangam-ammo iti Dios

 Basaem ti Biblia

•  Ti kuna ti Biblia: “Inwanwan ti Dios ti pannakaisurat ti intero a Kasuratan.”—2 Timoteo 3:16.

•  Kaipapananna: Ti Dios ti Autor ti Biblia. Inkabilna dagiti kapanunotanna iti panunot dagiti nangisurat iti Biblia. Babaen daytoy naidumduma a libro, impakita ti Dios ti pagayatanna kadatayo. Mabasatayo met iti dayta dagiti aspeto ti personalidadna, agraman ti ayat, kinahustisia, ken asi.—Exodo 34:6; Deuteronomio 32:4.

•  Ti mabalinmo nga aramiden: Inaldaw nga agbasaka iti Biblia. (Josue 1:8) Panunotem a naimbag dagiti mabasam, ken damagem iti bagim: ‘Ania ti isuro daytoy kaniak maipapan iti Dios kas maysa a Persona?’—Salmo 77:12.

   Kas pagarigan, basaem ti Jeremias 29:11, sa damagem iti bagim: ‘Ania ti kayat ti Dios para kaniak—talna wenno rigat? Managibales kadi ti Dios, wenno kayatna a maaddaanak iti nasayaat a masakbayan?’

 Kitaem dagiti parsua iti aglawlawmo

•  Ti kuna ti Biblia: ‘Dagiti di makita a kualidad [ti Dios] ket nalawag a makita manipud idi pinarsuana ti lubong ken agpatpatuloy, ta maawatan dagita babaen ti bambanag a naaramid.’—Roma 1:20.

•  Kaipapananna: Makitatayo dagiti aspeto ti personalidad ti Dios kadagiti pinarsuana. Kas pagarigan, adu ti maammuantayo maipapan iti maysa nga artist babaen kadagiti inaramidna; maam-ammotayo met ti maysa nga imbentor babaen ti komplikado nga imbensionna. Panunotenyo daytoy, ti kapasidad ken kinakomplikado ti utek ti tao ipakitana ti kinasirib ti Dios. Ken ti kontrolado nga enerhia ti init ken ti dadduma a bituen ipakitana ti pannakabalinna.—Salmo 104:24; Isaias 40:26.

•  Ti mabalinmo nga aramiden: Mangiwayaka iti tiempo nga agpaliiw ken agsursuro maipapan kadagiti parsua iti aglawlawmo sa damagem iti bagim, ‘Ania ngata ti maammuak maipapan iti Dios kadagiti nagpipintas a disenio dagiti parsua iti aglawlaw?’ a Siempre, adu dagiti bambanag maipapan iti Namarsua a saantayo a maammuan kadagiti parsua iti aglawlaw. Dayta ti rason nga intedna kadatayo ti Biblia.

 Usarem ti nagan ti Dios

•  Ti kuna ti Biblia: “Salaknibakto gapu ta ammona ti naganko. Umawagto kaniak, ket sungbatakto.”—Salmo 91:14, 15.

•  Kaipapananna: Ti Dios nga agnagan Jehova, espesial ti panangtratona kadagidiay makaammo iti naganna ken kadagidiay sirerespeto a mangusar iti dayta. b (Salmo 83:18; Malakias 3:16) Inyam-ammona ti bagina kadatayo babaen ti panangibagana iti naganna. “Siak ni Jehova. Dayta ti naganko,” kunana.—Isaias 42:8.

•  Ti mabalinmo nga aramiden: Usarem ti nagan ni Jehova no ibagbagam ti maipapan kenkuana.

 Makisaritaka ken Jehova babaen ti kararag

•  Ti kuna ti Biblia: “Asideg ni Jehova iti amin nga umaw-awag kenkuana.”—Salmo 145:18.

•  Kaipapananna: Umasideg ni Jehova kadagidiay agkararag kenkuana nga addaan iti pammati. Ti kararag ket maysa a pamay-an ti panagdaydayaw a mangipakita a nauneg ti respetotayo iti Dios.

•  Ti mabalinmo nga aramiden: Kanayon nga agkararagka iti Dios. (1 Tesalonica 5:17) Ibagam kenkuana ti amin a pakadanagam ken ti marikriknam.—Salmo 62:8. c

 Maaddaanka iti pammati iti Dios

•  Ti kuna ti Biblia: “Imposible a naan-anay a maparagsak ti Dios no awan ti pammati.”—Hebreo 11:6.

•  Kaipapananna: Tapno makaasidegtayo iti Dios, masapul a maaddaantayo iti pammati kenkuana. Iti Biblia, no addaantayo iti pammati saanna laeng a kaipapanan a basta mamatitayo nga adda Dios. Masapul met a naan-anay nga agtalektayo kenkuana, kadagiti karina ken kadagiti prinsipiona. Nagdakkel ti papel ti panagtalek iti maysa a relasion.

•  Ti mabalinmo nga aramiden: Ti natibker a pammati ket naibatay kadagiti bambanag nga ammo ti maysa a tao. (Roma 10:17) Adalem ngarud ti Biblia tapno mapaneknekam a makapagtalekka iti Dios ken kadagiti balakadna. Maragsakan dagiti Saksi ni Jehova a tumulong kenka nga agadal iti Biblia. d

 Aramidem dagiti mangparagsak iti Dios

•  Ti kuna ti Biblia: “Daytoy ti kaipapanan ti panagayat iti Dios, a tungpalentayo dagiti bilinna.”—1 Juan 5:3.

•  Kaipapananna: Asideg ni Jehova kadagidiay mangipakpakita iti ayatda kenkuana babaen ti panangaramidda iti amin a mangtungpal kadagiti bilinna.

•  Ti mabalinmo nga aramiden: Bayat nga ad-adalem ti Biblia, kitaem dagiti kayat ken saan a kayat ti Dios. Damagem iti bagim, ‘Ania dagiti balbaliwak tapno maparagsakko ti Namarsua kaniak?’—1 Tesalonica 4:1.

 Mariknam nga ipatpategnaka ti Dios no aramidem dagiti balakadna

•  Ti kuna ti Biblia: “Mapaneknekanyo a mismo a naimbag ti [Dios].”—Salmo 34:8, The Bible in Basic English.

•  Kaipapananna: Aw-awisennaka ti Dios a mangpaneknek a mismo iti kinaimbagna. No mapadasam ti ayat ken tulongna kayatmo ti umasideg kenkuana.

•  Ti mabalinmo nga aramiden: Bayat a basbasaem ti Biblia, aramidem dagiti balakad ti Dios ket mapadasamto dagiti pagimbaganna. (Isaias 48:17, 18) Kitaem met dagiti indibidual a tinulongan ti Dios isu a napagballigianda dagiti problemada, simmayaat ti biagda ken ti biag dagiti kapamiliada, ken nagbalinda a pudpudno a naragsak. e

 Di umiso: Saantayo a maam-ammo ti Dios gapu ta maysa a misterio.

 Umiso: Adu a bambanag maipapan iti Dios ti narigat a maawatan. Kas pagarigan, ti Dios ket maysa a di makita nga espiritu ngem posible latta a maam-ammotayo ti Dios. Kinapudnona, ibaga ti Biblia a masapul nga am-ammuentayo tapno maaddaantayo iti biag nga agnanayon. (Juan 17:3) Babaen kadagiti sasao a maawatantayo, ibaga ti Biblia kadatayo ti maipapan iti Namarsua, kas iti personalidadna, ti panggepna kadagiti tattao ken iti daga, ken dagiti prinsipiona. (Isaias 45:18, 19; 1 Timoteo 2:4) Ken kas naibagan, ipakita met ti Biblia ti nagan ti Dios. (Salmo 83:18) Saantayo laeng ngarud a maam-ammo ti Dios, agbalintayo pay a gayyemna.—Santiago 4:8.