Wen. Maseknan ti Dios kadagiti adipenna a masakit. Kastoy ti kuna ti Biblia maipapan iti matalek nga adipen: “Isu saranayento ni Jehova a mismo iti idda ti panagsakit.” (Salmo 41:3) No adda nakaro a sakitmo, makatulong kenka nga agibtur dagiti sumaganad a tallo nga addang:

1.   Agkararagka maipaay iti bileg nga agibtur. Maaddaanka iti “talna ti Dios a mangringbaw iti isuamin a panunot,” tapno saanka unay a maladingitan iti kasasaadmo ken makapagibturka.​—Filipos 4:6, 7.

2.   Agbalinka a positibo. Kuna ti Biblia: “Agtalinaedka a naragsak no nasalun-atka. Main-inutka a matay no kanayon a nalidayka.” (Proverbio 17:22, Ti Naimbag a Damag Biblia) Padasem ti agpakatawa, ta saannaka laeng a paragsaken no nalidayka no di ket pasayaatenna pay ti salun-atmo.

3.   Maaddaanka iti namnama kadagiti kari ti Dios. Ti namnama ket makatulong kenka a maaddaan iti rag-o uray no adda nakaro a sakitmo. (Roma 12:12) Impadto ti Biblia a dumtengto ti tiempo nga “awanto ti agtataeng nga agkuna: ‘Masakitak.’” (Isaias 33:24) Ikkatento ti Dios dagiti nakaro a sakit a saan a kabaelan nga agasan ti moderno a siensia. Kas pagarigan, kuna ti Biblia a dagiti lallakay ken babbaket ket umubingto manen. Kastoy ti panangdeskribirna iti dayta: “Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.”​—Job 33:25.

 Palagip: Nupay bigbigbigenmi ti tulong nga ipaay ti Dios, dakami a Saksi ni Jehova ket agpapaagas met no addaankami kadagiti sakit a kas iti clinical depression. (Marcos 2:17) Nupay kasta, saankami a mangyen-endorso iti partikular a kita ti panangagas ta dagiti tattao a mismo ti mangaramid iti bukodda a desision.