Saan a nasayaat ti komunikasion ti adu nga agassawa uray no agkaduada. Ania dagiti rason?

•  Agkaduada ngem kasla saan—apay?

•  Ti mabalinmo nga aramiden

•  Ti kuna dagiti naasawaan

•  Salsaludsod a pagsaritaan

•   Pannakabannog

   “No adda tiempomi nga agtungtong ken misterko, mabalin a nabambannog isuna wenno siak ti nabambannog. No nabambannogak, nakalaklakaak a mairita isu nga agbuyakami lattan iti TV.”—Anna.

•   Pannakaistorbo gapu kadagiti gadyet

   “Mangibus iti oras ti social media ken ti panaginternet. Mabalin nga adun nga oras ti nausarmo para iti dayta ngem saanmo pay a kinatungtong ti asawam. Baka agduma pay ketdi ti ayanyo iti balayyo.”—Katherine.

•   Nagduma a paginteresan

   “No nakaawiden ni lakayko, kanayon a maibus ti orasna kadagiti pagay-ayatna nga aramiden. Siempre, kasapulanna met ti agrelaks ta nabannog iti trabahona. Ngem kayatko nga ad-adu koma ti tiempomi nga agkadua.”—Jane.

•   Trabaho

   “Gapu kadagiti elektroniko a gadyet, makapagtrabahoka latta uray addaka iti balay ken kaduam ti pamiliam. Kanayon no kua a maibus ti orasko a sumungbat kadagiti e-mail ken teks iti trabahok imbes nga usarek koma dayta nga agkaduakami ken misisko.”—Mark.

•   Ibilangmo nga importante nga adda tiempo nga agkaduakayo.

   Prinsipio ti Biblia: ‘Siguraduenyo ti napatpateg a bambanag.’—Filipos 1:10.

   Panunotem: Ipakpakitam kadi a mas importante kenka ti panagasawayo ngem iti trabahom wenno kadagiti pagay-ayatmo nga aramiden? Sobsobra laeng kadi a tiempo ken atension ti it-itedmo iti asawam?

   Tip: Kanayon nga iplanom nga agkaduakayo iti asawam a dakdakayo.

   “Maragragsakanak no adda iplano ni lakayko a dakdakami laeng. Mariknak nga espesialak ken kaykayatna ti makikadua kaniak. Isu a lallalo nga ay-ayatek isuna.”—Anna.

•   Sursuruem nga “ibbatan pay laeng” dagiti elektroniko a gadyet.

   Prinsipio ti Biblia: “Adda tiempo ti tunggal banag.”—Eclesiastes 3:1.

   Panunotem: Namin-anon a napukaw ti atensionmo iti asawam gapu ta adda nagteks wenno adda naawatmo a notification?

   Tip: Ikarigatanyo ti agiddan a mangan uray maminsan laeng iti kada aldaw ken iyadayoyo dagiti selponyo. Nagsayaat a tiempo a pagsaritaanyo dagiti napasamak iti nagmalem bayat a mangmangankayo.

•   No posible, agkaduakayo a mapan gumatang kadagiti kasapulanyo wenno agkaduakayo a mangaramid kadagiti trabaho iti balay.

   Prinsipio ti Biblia: “Nasaysayaat ti dua ngem ti maysa, ta adda dakdakkel a gunggonada iti napasnek a panagtrabahoda.”—Eclesiastes 4:9, footnote.

   Panunotem: Kanayon kadi nga agsinakayo iti asawam a mangaramid iti trabaho iti balay wenno gumatang kadagiti kasapulanyo?

   Tip: Agkadua ken agtinnulongkayo a mangaramid kadagiti trabaho iti balay uray kaya nga aramiden dagita ti maysa.

   “Ibilangyo ti panaggatang iti kasapulanyo, panaginnaw, panagkupin, ken panagdalus iti arubayan a tsansa a makapagkaduakayo nga agassawa.”—Nina.

•   Saan a sobra ti ekspektarem

   Prinsipio ti Biblia: “Maammuan koma ti amin a tattao a nainkalintegankayo.”—Filipos 4:5.

   Panunotem: Kasanom a maipakita a saan a sobra ti eks-ekspektarem iti asawam?

   Tip: Agtungtongkayo tapno maammuanyo no ania ti kasapulan ti tunggal maysa kadakayo. Agtulagkayo no ania ti pangusaranyo iti orasyo a mangparagsak kadakayo a dua.

   “Nakagangganaygay ni misterko, ngem siak, nakapsutak ta adda sakitko. Kanayon nga ibagak a rummuar ken ag-enjoy. Urayek laengen ditoy balay tapno makainanaak bayat nga agek-exercise. Agpadakami a marelaks ta maaramidmi dagiti kasapulanmi nga aramiden.”—Daniela.

 Umuna, sungbatan ti tunggal maysa kadakayo dagitoy a saludsod sa pagsaritaanyo a dua dagiti sungbatyo.

•   Ad-adu kadi ti orasyo ita nga agkadua nga agassawa?

•   Ania ti ap-apresiarem nga ar-aramiden ti asawam tapno maaramidyo dayta?

•   Ania a panagbalbaliw ti kayatmo nga aramiden ti asawam?

•   Kasano kasansan a mais-istorboka iti gadyetmo isu a saanmon a mapanpansin ti ibagbaga ti asawam?

•   Kasanoyo a maipakita a saan a sobra ti eks-ekspektarenyo iti maysa ken maysa?

•   Ania ti balbaliwan ti tunggal maysa kadakayo ita a lawas tapno awan ti makaistorbo no agkaduakayo?