Naammuan ti asawa a babai ti sekreto ni lakayna. Kasta unay ti panagpadispensar ni lakayna. Inkarina nga isardengnan, ket inaramidna met—ngem apagbiit laeng. Idi kuan nagbuya manen, nagpadispensar, sa nagkari nga isardengnan. Maulit-ulit laeng a kasta ti ar-aramidenna.

 Kasta met kadi ti situasionmo? No wen, masapul a maammuam no kasano a ti bisiom nga agbuya iti pornograpia apektaranna ti asawam ken no kasano nga interamente a maisardengmo dayta. a

Iti daytoy nga artikulo

•  Ti masapul a maammuam

•  Ti mabalinmo nga aramiden

•  No agbuybuya ni lakaymo iti pornograpia

 Madadael ti pornograpia ti panagasawa. Mabalin nga agsakit ti nakem ti inosente nga asawa ken saanen nga agtalek iti asawana. b

 Mabalin a dagitoy ti marikna ti asawa a babai no agbuybuya ni lakayna iti pornograpia:

•   Natraidor. Imbaga ti asawa a babai nga agnagan Sarah, “Kasla maulit-ulit a makikamkamalala ni lakayko.”

•   Nababa a panagkitkita iti bagi. Imbaga ti maysa nga asawa a babai a nariknana a “saan a napintas ken naibabain” gapu ta bisio ni lakayna ti agbuya iti pornograpia.

•   Panagduadua. “Pagsussuspetsaak ti amin a garaw ni lakayko,” kuna ti asawa a babai nga agnagan Helen.

•   Panagdandanag. Inamin ti asawa a babai nga agnagan Catherine, “Pagkunkunsumisionak ti dakes a bisio ni lakayko.”

 Panunotem: Ibaga ti Biblia nga ayaten ti asawa a lalaki ni baketna. (Efeso 5:25) Ipakpakita kadi dayta ti asawa a lalaki no marikna met ni baketna ti maysa kadagiti nadakamat iti ngato?

 Saan a nalaka nga isardeng ti bisio a panagbuya iti pornograpia. “Naisardeng ni lakayko ti agsigarilio, agmarihuana ken agbartek, ngem marigatan nga agsardeng nga agbuya iti pornograpia,” kuna ti asawa a babai nga agnagan Stacey.

 Makatulong dagitoy a suhestion tapno maisardengmo nga interamente dayta a bisio.

•   Ammuem no apay a dakes ti pornograpia. Iparegta ti pornograpia ti panangpennek iti managimbubukodan a tarigagay, a mangdadael iti ayat ken panagtalek a napateg iti naragsak a panagasawa. Kasta met, ti panagbuya iti pornograpia ket saan a panangipakita iti panagraem iti nangirugi iti panagasawa, ni Jehova a Dios.

   Prinsipio ti Biblia: ‘Maibilang koma a nadayaw ti panagasawa.’—Hebreo 13:4.

•   Dimo ikalintegan ti ar-aramidem. Saanmo nga ibaga, ‘Saanak koma nga agbuya iti pornograpia no nadungngo ni baketko.’ Saan nga umiso a pabasolem ni baketmo, ken agbalin laeng dayta a rason tapno ulitem manen ti agbuya iti pornograpia no madismayaka kenkuana.

   Prinsipio ti Biblia: “Masubok ti tunggal maysa no maallukoy ken masulisog iti bukodna a tarigagay.”—Santiago 1:14.

•   Agbalin a napudno ken ibagam ti amin iti asawam. Imbaga ti asawa a lalaki nga agnagan Kevin: “Kanayon nga i-update-ko ni baketko. Kas pagarigan, tinaliawko kadi ti maysa a makagargari a banag wenno saan? Gapu ta kanayonko nga ibagbaga ti amin kenkuana, mariknana nga awan ti iseksekretok.”

   Prinsipio ti Biblia: “Kayatmi ti agbiag a mapagtalkan iti amin a banag.”—Hebreo 13:18.

•   Agtalinaed nga alerto. Mabalin a maulitmo manen ti agbuya uray no ti ammom ket nabayagen a naisardengmo dayta. Imbaga ni Kevin a nadakamat itay: “Sangapulo a tawenen a nalabanak ti agbuya iti pornograpia isu a pinanunotko a saankon a problema dayta. Ngem ti pannakaadiktok iti pornograpia ket kasla matmaturog laeng, a mabalin a mariing iti aniaman nga oras.”

   Prinsipio ti Biblia: “Agannad koma daydiay mangipagarup a nakatakder tapno saan a matumba.”—1 Corinto 10:12.

•   No masulisogka, agpanunotka nga umuna. Posible a saanmo a maliklikan ti maaddaan iti dakes a tarigagay, ngem kayam a pilien no aramidem dayta wenno saan. Mabalin nga aglabas ti tarigagaymo—baka naparpartak pay no masursurom a balbaliwan ti panagpampanunotmo.

   Prinsipio ti Biblia: “Masapul nga ammo ti tunggal maysa kadakayo a kontrolen ti mismo a bagina tapno agbalinkayo a nasantuan ken nadayaw, diyo tultuladen dagiti nasion a dida makontrol ti kinarasukda iti sekso ta saanda a mapmapnek.”—1 Tesalonica 4:4, 5.

•   Liklikam dagiti situasion a mangsulisog kenka nga agbuya manen. “No addaka iti makagargari a situasion,” kuna ti libro a Willpower’s Not Enough, “kaslaka nagsindi iti posporo. Bassit la a sungrod ti kasapulan . . . tapno sumged ti apuy.”

   Prinsipio ti Biblia: “Awan koma ti dakes a mangkontrol kaniak.”—Salmo 119:133.

•   Dika maawanan iti namnama. Mabalin a mabayag—wenno tawtawen pay ketdi—sakbay a maisubli ti panagtalek kenka ti asawam. Ngem ipakita ti adu a kapadasan a posible dayta.

   Prinsipio ti Biblia: “Ti ayat ket naanus.”—1 Corinto 13:4.