Adu a tattao ti madandanagan iti pannakaperdi ti daga ken ti epektona iti biag ditoy daga gapu iti aramid ti tao. Ibaga ti dadduma nga environmental expert a nakarkaro itan ti ar-aramiden ti tao isu a mapukpukawen ti adu a klase ti parsua ken maperperdi ti adu a kita ti biag.

 Interamente kadi a madadael ti daga gapu iti aramid ti tao? Wenno mangaramidda iti pamay-an a saan a madadael ti aglawlaw?

 Mamati ti adu nga eksperto a kaya ti tao a protektaran ti daga ken saanda a mangaramid iti mangperdi iti aglawlaw. Ibaga ti dadduma a researcher a tapno mapasamak dayta, adda dagiti masapul a mabalbaliwan ken masapul nga aggigiddan a maaramid. Dagitoy ti dadduma kadagita:

•   Pasayaaten ti panangaywan iti daga, kabakiran, karayan, ken baybay.

•   Padasen ti nagduduma a pamay-an ti agrikultura ken usaren ti nadumaduma a paggapuan ti enerhia.

•   Baliwan ti pamay-an ti pannakapataud ken pannakaiwaras dagiti makan tapno ti kaaduan a kanen dagiti tattao ket aggapu iti mula ken bassit laeng ti makanda a karne ken ikan ket iti kasta, basbassit ti makonsumo ken masayang a makan.

•   Akseptaren a saan a nakadepende iti kaadu ti material a bambanag ti naragsak ken kontento a panagbiag.

 Ania ti makunam? Realistiko kadi nga ekspektaren nga agtitinnulongto dagiti gobierno, negosio, ken dagiti indibidual? Wenno saan gapu ta nakaag-agum dagiti tattao, bagida laeng ti pampanunotenda, ken awan ti bibiangda iti masanguanan?—2 Timoteo 3:1-5.

 Ipasigurado ti Biblia nga adda nasayaat a masakbayan ti planetatayo. Ibagana ti rason no apay a saan a kabaelan ti tao a protektaran ti daga ken ibagana ti pudpudno a panagbalbaliw a masapul a maaramid. Ibagana met no kasano a mapasamak dayta a panagbalbaliw.

 No apay a saan a kabaelan ti tao a protektaran ti planetatayo. Pinarsua ni Jehova a a Dios ti daga, ken intedna kadagiti tattao ti responsabilidad nga aywananda dayta. (Genesis 1:28; 2:15) Naaramidanda koma dayta nga asaynmentda no nagpaidalanda iti Namarsua kadakuada ken nagtulnogda kadagiti instruksionna. (Proverbio 20:24) Ngem saanda nga inkaskaso ni Jehova, ken inaramidda ti kaykayatda. (Eclesiastes 7:29) Saan a kaya dagiti tattao nga aywanan ti daga a bukbukodda, ket no adda man maaramidanda, nakabasbassit laeng dayta.—Proverbio 21:30; Jeremias 10:23.

 Ti panagbalbaliw a masapul a mapasamak. Kayat ti Dios nga agsardeng dagiti tattao a mangdadael iti daga. (Apocalipsis 11:18) Saanna a pasayaaten dagiti gobierno ken dagiti grupo ti tattao a mangdaddadael iti planeta no di ket, sukatanna ida. (Apocalipsis 21:1) Dayta ti rason nga imbaga ni Jehova: “Kitaem! Pabpabaruek ti amin a bambanag.”—Apocalipsis 21:5.

 No kasano a mapasamak dayta a panagbalbaliw. Sukatan ni Jehova dagiti gobierno ti tattao iti nailangitan a gobierno a maawagan Pagarian ti Dios. Dayta a gobierno, nga iturayan ni Jesu-Kristo ket agturayto ditoy daga.—Daniel 2:44; Mateo 6:10.

 Isuronto ti Pagarian ti Dios dagiti tattao nga agbiagda maitunos iti pagayatan ti Dios. No agpaiturayton dagiti tattao iti Namarsua kadakuada ken agtulnogda iti panangidalanna, makapagbiagdanto a saan a madadael ti daga. (Isaias 11:9) Ibaga ti Biblia no kasano nga agbalinto a naragsak ti biag dagiti tattao iti panangituray ti gobierno ti Dios, ket pagsayaatan dayta ti planetatayo. Dagitoyto ti aramidenna:

•   Addanto makan para iti amin.—Salmo 72:16.

•   Maisublinto ti kinapintas ti aglawlaw.—Isaias 35:1, 2, 6, 7.

•   Aywananto dagiti tattao dagiti animal ket saanto met a dangran dagiti animal dagiti tattao.—Isaias 11:6-8; Oseas 2:18.

•   Awanton dagiti natural a kalamidad.—Marcos 4:37-41.

 Manamnamam a dandanin iyeg ti Pagarian ti Dios dagitoy a panagbalbaliw. Tapno ad-adu pay ti maammuam, basaem ti artikulo a “Kaano nga Iturayan ti Pagarian ti Dios ti Daga?”