Sigun iti nabiit pay a surbey iti nadumaduma a paset ti lubong, a agarup maysa iti uppat a tattao ti makarikrikna iti kinaliday.

•   “Aniaman ti edad wenno sadinoman ti ayan ti maysa, mabalin nga adda latta dagiti tiempo nga awan ti makadua wenno makasaritana.”—Chido Mpemba, co-chairperson iti World Health Organization’s Commission on Social Connection.

 Pampanunoten ti dadduma a dagiti laeng natataengan wenno dagiti awan kaduana ti makarikrikna iti kinaliday. Ngem mabalin met a marikna dayta uray dagiti agtutubo, nasalun-at, naballigi iti biag, ken dagiti adda asawana. No malidlidayan wenno awan kadkadua ti maysa, mabalin a nakaro ti epekto dayta iti salun-at ken emosionna.

•   “Ti kinaliday ket saan la a basta madi a rikrikna,” kuna ni Dr. Vivek Murthy, maysa a U.S. surgeon general. Imbagana pay: “Ti epekto ti kinaliday ket kas met laeng iti epekto ti panagsigarilio iti 15 nga istik iti kada aldaw. Mabalin a makapapatay dayta!”

 Saan a kayat ti Namarsua nga agmaymaysatayo. Kayatna a maaddaantayo kadagiti nasingpet ken nasayaat ti impluensiana a kakadua.

•   Prinsipio ti Biblia: “Kinuna ni Jehova a Dios: ‘Saan a nasayaat nga agmaymaysa ti lalaki.’”—Genesis 2:18.

 Kayat ti Dios a makigayyemtayo kenkuana. Ikarkarina nga umasideg kadatayo no ipakitatayo a talaga a kayattayo ti umasideg kenkuana.—Santiago 4:8.

•   Prinsipio ti Biblia: “Naragsak dagiti sipapanunot iti naespirituan a kasapulanda, ta kukuada ti Pagarian ti langit.”—Mateo 5:3.

 Kayat ti Dios nga agdayawtayo kenkuana a kadua ti dadduma. Makatulong dayta tapno agbalintayo a naragragsak.

•   Prinsipio ti Biblia: “Agpipinnanunottayo tapno matignaytayo a mangipakita iti ayat ken nasayaat nga ar-aramid, a ditay baybay-an ti panaggigimongtayo, . . . no di ket agpipinnaregtatayo.”—Hebreo 10:24, 25.

 Tapno ad-adu pay ti maammuam no apay a masapul a labanantayo ti kinaliday, basaem ti artikulo a “Kinaliday iti Laksid ti Adu a Wagas ti Komunikasion.”