Iti intero a lubong, adu a tattao ti malidliday ken makarikrikna nga awan a pulos ti agbalin a nadekket a gayyemda. Patien ti dadduma nga eksperto iti salun-at a ti panangtulong iti dadduma ti maysa a pamay-an tapno malabanam ti kasta a rikna.

•   “No tumulongtayo kadagiti agkasapulan, agbalintayo a naragsak ken saantayo unay a marikna a kasla agmaymaysatayo.”—U.S. National Institutes of Health.

 Mangted ti Biblia kadagiti nagsayaat a balakad no kasanotayo a matulongan ti dadduma. No aramidentayo dagita, malabanantayo ti kinaliday.

 Agbalinka a naparabur. Mangiwayaka iti tiempo tapno makaduam ti dadduma. Nakasaganaka koma a mangiranud iti adda kenka. No aramidem dayta, mabalin a kasta met ti aramidenda kenka gapu iti panagyamanda. Dayta ti makatulong kenka tapno maaddaanka iti gagayyem.

•   Prinsipio ti Biblia: “Iyugaliyo ti mangted, tapno ikkandakayo dagiti tattao.”—Lucas 6:38.

 Tulongam ti dadduma. Mangbirokka kadagiti gundaway a matulongam dagiti tattao a maipaspasango kadagiti narigat a situasion. Karaman kadagita ti panangdengngeg a naimbag kadakuada wenno panangaramid kadagiti trabaho a pakalag-ananda.

•   Prinsipio ti Biblia: “Ti maysa a gayyem ket tumulong iti aniaman a situasion.”—Proverbio 17:17, Contemporary English Version.

 Para iti kanayonan nga impormasion no kasanom a mataginayon ti nasayaat a relasion iti dadduma, basaem ti artikulo a “Biag ti Pamilia ken Pannakigayyem.”