Matulongannaka Kadi ti Biblia a Mangisardeng iti Pannakaadiktom iti Droga?

I-PLAY

Kada tawen, minilion ti matmatay gapu iti direkta wenno saan a direkta nga epekto ti panagusar iti substansia, a pakairamanan dagiti maiparit a droga. Ad-adda pay a kimmaro daytoy a problema bayat ti COVID-19 pandemic. Nakatulong iti adu dagiti pammagbaga ti Biblia tapno maisardengda ti pannakaadiktoda iti droga. No marigatanka a mangisardeng iti pannakaadiktom iti droga, makatulong met kenka daytoy a pammagbaga. a

Iti daytoy nga artikulo

Apay a makatulong ti Biblia tapno maisardengmo ti pannakaadiktom iti droga?

Naammuan dagiti researcher a kaaduanna a maadikto dagiti tattao iti droga gapu iti kinaliday, stress, panagdandanag, wenno depresion. Matulongannaka ti Biblia a maaddaan iti pammati a kasapulam tapno mapagballigiam dagiti problema a mabalin a mangiduron kenka nga agdroga. Isurona kenka no kasanoka nga agbalin a nadekket a gayyem ti Dios. (Salmo 25:14) Iti tulongna, mapagballigiam dagiti problema a kasla saanmo a masolbar a siksika.—Marcos 11:22-24.

Uppat nga ibagbaga ti Biblia nga aramidem tapno maisardengmo ti pannakaadiktom

1. Am-ammuem ni Jehova a Dios. b (Juan 17:3) Isu ti Namarsua ken paggapgapuan ti awan limitasionna a pannakabalin. Napatpateg pay ngem iti dayta, isu ti naayat a nailangitan nga Amam. Kayatna a maaddaanka iti nadekket a relasion kenkuana ken kayatna nga usaren ti pannakabalinna a tumulong kenka. (Isaias 40:29-31; Santiago 4:8) Adda nagmayat a masakbayan nga isagsaganana para kenka no piliem ti agbalin a nadekket kenkuana.—Jeremias 29:11; Juan 3:16.
2. Agpatulongka ken Jehova. Agkararagka iti Dios ken dawatem a tulongannaka a mangisardeng iti pannakaadiktom tapno agbalinka a ‘nasantuan [wenno nadalus] ken pakaragsakanna.’ (Roma 12:1) Babaen ti nasantuan nga espirituna, wenno aktibo a puersana, ikkannaka iti “bileg a nalablabes ngem iti gagangay.” (2 Corinto 4:7; Lucas 11:13) Matulongannaka dayta tapno maisardengmo ti pannakaadiktom iti droga ken maaddaanka iti “baro a personalidad” a mangparagsak iti Dios.—Colosas 3:9, 10.
3. Punnuem ti panunotmo iti pampanunot ti Dios. (Isaias 55:9) Tulongannaka ti Dios a ‘mangpabaro iti puersa a mangiturturong iti panunotmo’ wenno mangbalbaliw iti panagpampanunotmo tapno maisardengmo ti pannakaadiktom. (Efeso 4:23) Masarakan iti Biblia ti pampanunot ti Dios, isu nga importante a regular a basaem dayta. (Salmo 1:1-3) Adu ti nabenepisiaran ta nagpatulongda tapno maawatanda ti isursuro ti Biblia. (Aramid 8:30, 31) Iyaw-awis dagiti Saksi ni Jehova ti libre a panagadal iti Biblia. Aw-awisendaka met nga umatender kadagiti gimongmi a pakasursuruanmi iti pannursuro ti Biblia ken no kasano a mayaplikarmi dagita.
4. Piliem dagiti nasayaat a kakadua. Dakkel ti impluensia dagiti gagayyem. Mabalin a matulongandaka a mangisardeng wenno lalo pay nga agbalin nga adikto. (Proverbio 13:20) Nasayaat a kakadua dagiti agdaydayaw iti Dios, ket kayatna nga isuda ti pakigayyemam. (Salmo 119:63; Roma 1:12) Piliem a naimbag dagiti pagpalpaliwaam ta kasla kaduam metten dagiti karakter iti buybuyaem, dengdenggem, wenno basbasaem. Liklikam ti aniaman a mangpakapuy iti determinasionmo a mangaramid iti umiso.—Salmo 101:3; Amos 5:14.

Dagiti bersikulo ti Biblia a makatulong kenka a mangisardeng iti pannakaadiktom

Salmo 27:10: “Uray no baybay-andak da amak ken inak, ni Jehova a mismo ti mangaywan kaniak.”

“Saanko pulos naam-ammo ti agpaypayso nga amak, isu a kasla adda kurang iti biagko. Ngem idi naam-ammok ni Jehova a Dios kas pudpudno a Persona a talaga a mangay-ayat kaniak, naaddaan iti direksion ti biagko ken naisardengko ti pannakaadiktok.”—Wilby, Haiti.

Salmo 50:15: “Awagannak iti tiempo ti rigat. Isalakankanto.”

“Namin-adu a nakatulong kaniak daytoy a bersikulo nga agporsegi a mangisardeng iti panag-drugs-ko, uray adda dagiti tiempo idi a naaramidko manen dayta. Tinungpal ni Jehova dagiti karina.”—Serhiy, Ukraine.

Proverbio 3:5, 6: “Agtalekka ken Jehova iti amin a pusom, ket dika agtalek iti bukodmo a pannakaawat. Ikabilangam iti amin a dalanmo, ket palintegennanto dagiti danam.”

“Nakatulong dagitoy a bersikulo tapno saanak nga agtalek iti bagik, no di ket agtalekak ken Jehova. Iti tulongna, nabalbaliwak nga interamente ti biagko.”—Michele, Italy.

Isaias 41:10: “Dika agbuteng, ta addaak kenka. Dika madanagan, ta siak ti Diosmo. Patibkerenkanto, wen, tulongankanto, talaga nga iggamankanto babaen ti kannawan nga imak ti kinalinteg.”

“Permi ti stress-ko no saanak nga ag-drugs. Nakatulong kaniak dayta a teksto tapno kombinsidoak a tulongannak ti Dios a mangkontrol iti stress-ko ket kasta ti inaramidna.”—Andy, South Africa.

1 Corinto 15:33, footnote: “Dikay agpaallilaw. Dagiti dakes a kakadua dadaelenda dagiti nasayaat a kababalin.”

“Nasursurok ti ag-drugs kadagiti dakes ti impluensiana a gagayyemko, ket idi kuan, naadikak. Naisardengko laeng dayta idi insardengkon ti makikadua kadakuada ken nakigayyemak kadagiti tattao a nadalus ti panagbiagda.”—Isaac, Kenya.

2 Corinto 7:1: “Dalusantayo ngarud ti bagitayo iti amin a mangrugit iti lasag ken espiritu.”

“Dagita a sasao ti inspirasionko nga agtultuloy a mangdalus iti bagik ken mangisardeng iti panagdrogak ken panangperdik iti bagik.”—Rosa, Colombia.

Filipos 4:13: “Ta adda pigsak a mangsango iti amin a banag gapu iti daydiay mangpabpabileg kaniak.”

“No siak lang, ammok a saanko a kaya nga isardeng ti panag-drugs-ko, isu a nagkararagak iti Dios a tulongannak. Ket tinulongannak a mangisardeng iti dayta.”—Patrizia, Italy.

Dadduma pay a kapadasan: Naisardeng ti pannakaadikto babaen ti tulong ti Biblia

Dimmakkel ni Joseph Ehrenbogen iti bayolente nga aglawlaw, ket nagbalin nga adikto iti arak, sigarilio, marijuana, ken heroin. Namin-adu a dandani natay gapu iti pannaka-overdose. Nakombinsir iti maysa a teksto a kayana ti agbalbaliw. Basaem ti pakasaritaanna iti artikulo a “Nasursurok a Respetuen Dagiti Babbai ken ti Bagik.”

Narigatan ni Dmitry Korshunov a mangisardeng iti panagbarbartekna. Buyaem ti video a ‘Naumaakon iti Panagbiagko’ tapno makitam no ania ti nakatulong kenkuana.

Sorry, saan a naglukat ti media player.I-download Daytoy a Video

Kontraen kadi ti Biblia ti medikal a pannakaagas dagiti naadikto?

Saan. Ibaga ti Biblia: “Dagiti masakit ti agkasapulan iti doktor, saan a dagiti nasalun-at.” (Mateo 9:12) Kuna met ti U.S. National Institute on Drug Abuse: “Komplikado a sakit ti pannakaadikto iti droga, ket kaaduanna a tapno maisardeng dayta, saan laeng a basta kayatmo no di ket masapul a determinadoka.” Siempre, adayo a nabilbileg ti tulong nga ipaay ti Dios ngem iti determinasion ti maysa. Nupay kasta, adu a nakaisardeng iti pannakaadiktoda babaen ti panangsurotda iti balakad ti Biblia ti nagkasapulan met iti medikal a tulong. c Kas pagarigan, kuna ti lalaki nga agnagan Allen: “Idi pinadasko nga isardeng ti panaginumko iti arak, permi ti sakit ti bagbagik. Nabigbigko nga uray no maipapaayanak iti naespirituan a tulong, kasapulak met ti agpatulong iti doktor.”

Iparit kadi ti Biblia ti panagusar ti droga kas pangagas?

Saan. Ti agpayso, ibaga ti Biblia a nausar ti arak a pangagas iti sakit wenno pangep-ep iti ut-ot a marikrikna ti dandanin matay. (Proverbio 31:6; 1 Timoteo 5:23) Nupay kasta, kas iti arak, dagiti agas a mausar a pangep-ep ti ut-ot ket makaadikto unay. Isu a masapul a sipapanunottayo iti posible a peggad ken agbalin a naannad iti panagusar iti naireseta a pangep-ep iti ut-ot wenno painkiller.—Proverbio 22:3.

a Nakapokus daytoy nga artikulo iti panangisardeng iti pannakaadikto iti droga, ngem makatulong met dagiti naibaga a pammagbaga ti Biblia iti pananglaban kadagiti problema a konektado iti panaginum iti arak, panagsigarilio, pannangan, panagsugal, pornograpia, wenno social media.

b Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?”

c Makatulong ti adu a treatment center, ospital, ken dagiti recovery program. Masapul a panunoten a naimbag ti tunggal maysa dagiti pagpilian, sa agdesision no ania a pannakaagas ti kasayaatan para kenkuana.—Proverbio 14:15.