“Tunggal naimbag a sagut ken tunggal naan-anay a rangkap [wenno, perpekto a regalo] aggapu iti ngato, ta bumaba dayta manipud iti Ama dagiti nailangitan a lawag.” (Santiago 1:17) Nalawag a tumukoy daytoy a bersikulo iti kinaparabur ti nailangitan nga Amatayo a ni Jehova a Dios. Ngem iti adu a regalo ti Dios kadagiti tattao, adda maysa a kasasayaatan iti amin. Ania dayta? Ibaga kadatayo ti pagaammo a sasao ni Jesus iti Juan 3:16: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”

Ti bugbugtong nga Anak ti Dios—sigurado a dayta ti kasasayaatan a regalo a mabalin a maawat ti asinoman ta babaen iti dayta, mabalin a mawayawayaantayo iti pannakaadipen iti basol, panaglakay ken panagbaket, ken ipapatay. (Salmo 51:5; Juan 8:34) Uray ania ti aramidentayo, saantayo a kabaelan a wayawayaan ti bagitayo. Ngem gapu iti kasta unay a panagayat ti Dios, intedna ti kasapulan tapno mawayawayaantayo. Babaen iti panangitedna iti bugbugtong nga Anakna a ni Jesu-Kristo kas subbot, inikkan ni Jehova a Dios dagiti natulnog a tattao iti namnama nga agbiag nga agnanayon. Ngem ania a talaga ti subbot? Apay a kasapulan dayta? Ania dagiti iyegna a pagimbagantayo?

Ti subbot ket ti kantidad a maibayad tapno maisubli ti banag a napukaw wenno tapno mawayawayaan ti maysa manipud iti pannakaadipen. Ilawlawag ti Biblia a naparsua nga awanan basol dagiti immuna a nagannaktayo a da Adan ken Eva, ken posible nga agbiagda nga agnanayon iti paraiso a daga agraman dagiti agbalinto nga annakda. (Genesis 1:26-28) Makapaladingit ta napukawda amin dayta gapu ta pinilida ti agsukir iti Dios ket nagbalinda a managbasol. Ania ti resultana? Sumungbat ti Biblia: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Imbes a perpekto a biag, basol ken ipapatay ti impatawid ni Adan kadagiti kaputotanna.

No maipapan iti subbot, masapul a ti maibayad ket katupag ti napukaw. Idi nagsukir ni Adan iti Dios, isu ket nagbasol. Ket napukaw ti perpekto a biag ti tao—ti biag ni Adan. Sigun iti Biblia, nagresulta dayta iti pannakaadipen ti kaputotanna iti basol ken ipapatay. Isu a masapul nga adda maisakripisio a perpekto a biag ti tao—ti biag ni Jesus—tapno agbalin a posible ti pannakawayawaya iti pannakaadipen. (Roma 5:19; Efeso 1:7) Babaen laeng iti naayat a panangibayad ti Dios iti daytoy a subbot a nagbalin a posible para iti tao a matagiragsak ti napukaw da Adan ken Eva—ti biag nga agnanayon iti paraiso a daga.—Apocalipsis 21:3-5.

Nagbalin a posible ti agnanayon a biag gapu iti regalo ti Dios a subbot isu nga awan duadua a dayta ti kasasayaatan a regalo iti amin. Tapno ad-adda a maawatantayo no apay a “naan-anay” wenno perpekto dayta a regalo, kitaentayo no kasano a pennekenna, ken lab-awanna pay ketdi, dagiti rason no apay a maibagatayo a napateg ti maysa a regalo, kas nailawlawag iti napalabas nga artikulo.

Pennekenna ti tarigagaytayo. Normal laeng a kayattayo ti agtultuloy nga agbiag. (Eclesiastes 3:11) Saantayo a mapennek dayta a tarigagay a bukbukodtayo, ngem nagbalin dayta a posible gapu iti subbot. Kuna ti Biblia: “Ta dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”—Roma 6:23.

Punnuanna ti kasapulantayo. Saan a kabaelan  dagiti tattao nga ipaay ti subbot. Ilawlawag ti Biblia: “Nangina unay ti subbot ti biag ti tao. Ti kabaelanna nga ibayad dinto makaanay.” (Salmo 49:8, Ti Baro a Naimbag a Damag Biblia) Gapuna, kasapulantayo unay ti tulong ti Dios tapno mawayawayaantayo iti basol ken ipapatay. Ngem “baeten iti pannakaluk-at babaen ti subbot nga imbayad ni Kristo Jesus,” impaay ti Dios ti talaga a kasapulan.—Roma 3:23, 24.

Eksakto ti tiempo a pannakaitedna. Ibaga ti Biblia: “Bayat a managbasoltayo pay laeng idi, ni Kristo natay a maipaay kadatayo.” (Roma 5:8) Gapu ta naited dayta “bayat a managbasoltayo pay laeng,” ipasigurado ti subbot nga ay-ayatennatayo unay ti Dios uray no managbasoltayo. Isu nga uray no masapul a mapasarantayo dagiti dakes nga epekto ti basol, adu ti nasaysayaat a bambanag nga agur-uray kadatayo.

Ipakitana a nasayaat ti motibo ken managsakripisio ti nangted. Ipakita ti Biblia no ania ti nangtignay iti Dios a mangipaay iti Anakna kas subbot: “Babaen itoy naiparangarang ti ayat ti Dios iti kasasaadtayo, agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana. Ti ayat adda itoy a banag, saan a gapu ta inayattayo ti Dios, no di ket gapu ta inayatnatayo.”—1 Juan 4:9, 10.

Kasano a maipakitam ti panagyamanmo iti kasasayaatan a regalo iti amin? Inyunay-unay ni Jesus iti Juan 3:16 a dagidiay laeng mangipakita iti “pammati” kenkuana ti maisalakan. Sigun iti Biblia, ti pammati ket “ti sigurado a panangsegsegga iti bambanag nga in-inanamaen.” (Hebreo 11:1) Agbalin laeng a posible dayta no maaddaantayo iti umiso a pannakaammo. Gapuna, pangngaasim ta iwayaam nga adalen ti maipapan ken Jehova a Dios, ti Nangted iti daytoy “naan-anay” a regalo. Ammuem met ti masapul nga aramidem tapno maaddaanka iti biag nga agnanayon.

Maammuam amin dagitoy no adalem dagiti naibatay-Biblia nga impormasion iti www.isa4310.com/ilo. Maragsakan dagiti Saksi ni Jehova a tumulong kenka. Masiguradomi a bayat nga ad-adalem ti maipapan iti kasasayaatan a regalo ken mapadpadasam dagiti pagimbagan nga itedna, matignayka a mangyebkas: “Pagyamanan iti Dios baeten ken Jesu-Kristo nga Apotayo!”—Roma 7:25.