Nayanakak iti bassit nga ili ti Poland, nga asideg iti Germany. Kataltalonan ken kabakiran ti aglawlaw ti balaymi. Natalna idi ti biagko. Kanayon nga ibaga dagiti nadungngo a nagannakko nga agsingsingpetak, lalaingek ti ageskuela, ken gumaw-atak iti nangato a propesion.

Nangrugi a gimmulo ti biagko idi nangalaak iti abogasia iti maysa nga unibersidad iti siudad ti Wrocław. Adayoak idin kadagiti nagannakko, ket nakibarkadaak kadagiti dakes a tattao. Datin a hiligko ti soccer, ngem gapu iti impluensiada, nagbalin a nalabes ti panagayatko iti dayta. Ti paboritok a team ket naggapu iti Warsaw. Kada Sabado ken Domingo, sursurotek ida sadinoman ti pagay-ayamanda. Gagangay kadagita ti nalabes a panaginum, panagdroga, ken no dadduma, ti pannakirambol kadagiti mangsupsuporta iti kalaban a team. Imbilangko dagita kas pangyaw-awanko iti inaldaw nga stress uray ammok a no maarestoak, maperdi ti masakbayak iti abogasia.

Kaykayatmi kadagiti barkadak ti mapan kadagiti club ken disco. Kaaduanna a mapalabankami no addakamin sadiay. Adda dagiti gundaway a naarestoak ngem kanayon a maliklikak ti makasuan wenno maibalud​—no dadduma, gapu ta agpasuksokak. Talaga a ti panagkunak idi, kasasayaatanen ti biagko. Ngem iti un-unegko, ammok a dakes ti ar-aramidek. Dinomingo a makimisaak tapno saanak a makonsiensia.

Idi 2004, dua a Saksi ni Jehova ti nagtuktok iti ridawmi, ket nagsasaritakami maipapan iti Biblia. Bayat a maaw-awatak no ania ti kaipapanan ti panagbalin a pudno a Kristiano, ad-adda met a makonkonsiensiaak. Ammok a masapul nga isardengkon ti nakaro a panagin-inumko, panagdrogdrogak, ken pannakikadkaduak kadagiti tattao a saan a sumursurot kadagiti prinsipio ti Biblia. Nakitak met a rumbeng a balbaliwak ti bayolente a kababalinko. Ngem nagtultuloyak latta iti dakes nga ar-aramidko.

Iti maysa a rabii, nagbaliw ti amin idi napalabanak iti walo a lallaki. Malagipko a nakaiddaak iti kalsada bayat a bugbugbogendak ken kugkugtaranda ti ulok. Panagriknak ket matayakon isu nga inkararagko: “Pakawanennak Apo Jehova ta diak impapuso ti Saom. No makalasatak, ikarik a makipagadalak iti Biblia kadagiti Saksi ken  urnosekon ti biagko.” Kasla diak patien a nakalasatak! Tinungpalko ti karik nga agadal iti Biblia.

Idi 2006, immakarak ditoy England tapno makaurnongak iti pageskuelak iti nangatngato pay a kurso iti abogasia idiay Poland. Iti panagtultuloyko nga agadal iti Biblia, adda teksto a nagdakkel ti epektona kaniak. Insurat ni apostol Pablo: “Pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok. Maigapu kenkuana inawatko ti pannakaipukaw ti amin a bambanag ket ibilangko ida kas adu a basura, tapno magun-odak ni Kristo.” (Filipos 3:8) Kas kaniak, nagadal met ni Pablo iti abogasia​—ken nakarangranggas met idi. (Aramid 8:3) Ngem nakitana nga adda nasaysayaat a panagbiag: ti panagserbi iti Dios ken ti panangaramid iti amin a kabaelan a mangtulad ken Jesus. Idi pinampanunotko a naimbag ti biag ni Pablo, naawatak a saan a makaited iti kinaragsak ti nangato a propesion ken ti bayolente a kababalin. Kombinsidoak a no nakapagbalbaliw ni Pablo, makapagbalbaliwak met. Isu a nagdesisionak nga agtalinaed ditoy England ken lipatekon ti planok nga agadal iti nangatngato pay a kurso iti abogasia.

Bayat nga umad-adu ti maam-ammuak maipapan ken Apo Jehova, ad-adda met a mariknak nga umas-asidegak kenkuana. Natukay ti pusok iti karina a pakawanenna dagiti pudpudno a mangbalbaliw iti biagda. (Aramid 2:38) Ken idi pinampanunotko ti sasao iti 1 Juan 4:16 a “ti Dios ket ayat,” naawatak no apay a kagura ti Dios ti kinaranggas.

Bilibak met iti panagug-ugali dagiti Saksi. Nalawag a makitak nga ikarkarigatanda a suroten ti nangato a moral a prinsipio ti Biblia iti panagbiagda. Kayatko met ti agbalin a paset ti naragsak a panagkakabsatda. Nagporsegiak a nangbalbaliw iti biagko isu nga idi 2008, nabautisaranak kas maysa a Saksi ni Jehova.

Binalbaliwannak ti Biblia. Ti dati nga ambisioso, bayolente, agdrogdroga, mangnginum, ken nalabes ti panagayatna iti soccer ket nagbalin nga adipen ti Dios, a naragsak a mangisursuro iti dadduma maipapan iti Biblia. Kayatko latta met ti agbuya iti soccer, ngem determinadoak a pagtalinaeden dayta iti umiso a lugarna.

Adda asawak itan, ti napintas a ni Esther, a padak nga agdaydayaw ken ni Jehova a Dios. Naragsak ti panagasawami. Mariknami ti pudpudno a ragsak iti panangisuro iti Biblia kadagiti agsasao iti Polish ditoy amianan a laud ti England. Ita pay laeng a nariknak ti pudpudno a pannakakontento. Nadalusen ti konsiensiak ken talaga a kasasayaatanen ti panagbiagko.