Idi 33 C.E., natay ni Jesus, napagungar, ken immuli idiay langit. Idi agangay, naikkan iti autoridad nga agturay kas Ari. (Daniel 7:13, 14) Iti masanguanan, agtignay ni Jesus kas Ari tapno iyegna ti sangalubongan a talna ken ikkatenna ti kinapanglaw.—Basaem ti Salmo 72:7, 8, 13.

Nakaskasdaaw a bambanag ti aramiden ni Jesus kas Agturay iti sangatauan. Usarenna ti pannakabalin nga inted kenkuana ni Amana tapno isublina ti kinaperpekto dagiti tattao. Agbiagdanton a siraragsak ken didanton lumakay, bumaket, ken matay.—Basaem ti Juan 5:26-29; 1 Corinto 15:25, 26.

Iwanwanwan ita ni Jesus ti sangalubongan a panangasaba dagiti pudno a pasurotna. Sarsarungkaranda dagiti tattao tapno isuroda ti kuna ti Biblia maipapan iti Pagarian ti Dios. Imbaga ni Jesus nga itultuloyna a suportaran dagiti adalanna agingga a pukawen ti Pagarian ti Dios dagiti gobierno ti tao.—Basaem ti Mateo 24:14; 28:19, 20.

Tultulongan ita ni Jesus dagiti tattao a maaddaan iti nasaysayaat a panagbiag babaen ti pudno a kongregasion Kristiano. Itultuloyna nga iwanwan ken tulongan ida agingga a makalasatda iti pannakadadael daytoy agdama a sistema ti bambanag nga agturong iti inkari ti Dios a baro a lubong.—Basaem ti 2 Pedro 3:7, 13; Apocalipsis 7:17.