Sipud pay idi ubingak, pagay-ayatkon ti nakaparsuaan. Masansan a maragsakan ti pamiliami nga agpasiar kadagiti napintas a kabakiran ken dan-aw iti aglawlaw ti ilimi a Jyväskylä iti Central Finland. Pagay-ayatko met dagiti animal. Idi ubingak pay, kayatko nga arakupen amin a makitak a pusa ken aso! Bayat a dumakdakkelak, maladingitanak no makitak ti panangmaltrato dagiti tattao kadagiti animal. Idi agangay, nakitimpuyogak iti organisasion a sadiay naam-ammok dagiti padak a mangisaksakit kadagiti animal.

Aktibokami a nangikampania iti maipapan iti kalintegan dagiti animal. Nangiwaraskami iti impormasion ken nangyurnoskami kadagiti protesta ken demostrasion maibusor iti panaglako iti lalat ti animal ken panangusar kadagiti animal kas eksperimento. Nangbuangaykami pay iti organisasion a mangsalaknib kadagiti animal. Gapu iti panangipapilitmi iti panggepmi, masansan a makasupiatmi dagiti autoridad. Namin-aduak a naaresto ken naidarum.

Saan laeng a kadagiti animal ti pakaseknak, mariribukanak met kadagiti problema iti intero a lubong. Idi agangay, nagbalinak a kameng ti adu nga organisasion a pakairamanan ti Amnesty International ken Greenpeace. Impaayko ti amin a kabaelak a nangsuportar kadagiti aktibidadda. Inrupirmi ti kalintegan dagiti napanglaw, mabisbisin, ken marigrigat.

Ngem naamirisko a saanko a mabalbaliwan ti lubong. Uray no adda naaramidan dagita nga organisasion a mangilinteg kadagiti sumagmamano a babassit a problema, kumarkaro latta dagiti dadakkel a problema. Nagsaknapen ti kinadakes iti intero a lubong ken awanen ti maseknan. Panagriknak, awanen ti maaramidak.

Gapu ta maladingitanak, napanunotko ti maipapan iti Dios ken iti  Biblia. Nakipagadalak idin iti Biblia kadagiti Saksi ni Jehova. Nupay apresiarek ti kinaanus ken pannakaseknan dagiti Saksi kaniak, saanak pay idi a nakasagana a mangbalbaliw iti panagbiagko. Ita, nakasaganaakon.

Rinugiak a binasa ti Bibliak ket nabang-aranak. Nabasak ti adu a teksto iti Biblia a mangisursuro kadatayo nga agbalintayo a naasi kadagiti animal. Kas pagarigan, kunaen ti Proverbio 12:10 nga “aywanan ti naimbag a tao dagiti animalna.” (Ti Baro a Naimbag a Damag Biblia) Naawatak met a saan a gapuanan ti Dios dagiti problema iti lubong. Imbes ketdi, kumaro dagiti problema gapu ta kaaduan a tattao saanda nga agtulnog iti panangiturongna. Natignayak idi naammuak dagiti galad ni Jehova nga ayat ken mabayag a panagitured.—Salmo 103:8-14.

Idin, adda nakitak a kupon para iti libro nga Ania a Talaga ti Isursuro ti Biblia? ket sinuratak ken impatulodko dayta. Di nagbayag, adda simmarungkar nga agassawa a Saksi ket intukonda ti panagadal iti Biblia. Immannugotak ken rinugiak ti timmabuno kadagiti Nakristianuan a gimong iti Kingdom Hall. Kas resultana, impategko ti kinapudno iti Biblia.

Gapu iti Biblia, adu ti nabalbaliwak. Naisardengko ti agsigarilio ken agbartek. Binaliwak ti langak, panagsasaok, ken ti panangmatmatko kadagiti autoridad. (Roma 13:1) Insardengko metten ti immoral a panagbiagko.

Para kaniak saan a kaskarina ti agbalbaliw, nangruna no maipapan iti umiso a panangmatmat kadagiti organisasion a mangitantandudo iti kalintegan. Idi damo, mariknak a lipliputak dagitoy nga organisasion no umikkatak. Ngem idi agangay, naawatak a ti laeng Pagarian ti Dios ti kakaisuna a makaipaay iti pudno a namnama iti intero a lubong. Inkeddengko nga ipaay ti amin a kabaelak a mangsuportar iti dayta a Pagarian ken tumulong iti sabsabali a mangammo ti maipapan iti dayta.—Mateo 6:33.

Kas maysa nga aktibista, dua laeng a grupo ti pangibilangak kadagiti tattao—naimbag ken dakes—ket sisasaganaak a mangbusor kadagidiay ibilangko a dakes. Gapu iti Biblia, saankon a gurguraen ti sabsabali. Imbes ketdi, ipakpakitak ti Nakristianuan nga ayat iti amin a tattao. (Mateo 5:44) Ti maysa pay a pamay-an ket babaen ti panangiranudko iti naimbag a damag ti Pagarian ti Dios. Maragsakanak a makakita a daytoy a trabaho ket makatulong a mangyeg iti talna, kinaragsak, ken pudno a namnama kadagiti tattao.

Gapu ta impabiangkon ken Jehova dagiti bambanag, natalnan ti panunotko. Kombinsidoak a kas Namarsua, dina ipalubos a mamaltrato dagiti animal ken tattao ken madadael ti nagpintas a dagatayo. Imbes ketdi, babaen iti Pagarianna, tarimaanennanto ti amin a nadadael. (Isaias 11:1-9) Maragsakanak ta naammuak dagitoy a kinapudno ken tultulongak ti sabsabali a maaddaan iti pammati kadagitoy. Saankon a marikna a masapul a balbaliwak ti lubong.