Adda dagiti uminum iti arak tapno malipatanda dagiti problemada. Iti damo, mabalin a mariknada a naturturedda ken kabaelanda a solbaren dagiti problemada. Ngem inton agangay, dagidiay agpannuray iti alkohol dangdangranda ti bagida. Kasta kadi met no maipapan iti pammati?

Ipagarup ti dadduma a dagidiay addaan pammati ket nalaka a mamatpati, saan nga agpampanunot wenno saan nga agus-usig kadagiti ebidensia. Kaslada ibagbaga a dagiti addaan nabileg a pammati dida ikabkabilangan ti pudno a kasasaad.

Adu ti dakamaten ti Biblia maipapan iti pammati. Ngem saannatayo a parparegtaen a basta mamati lattan wenno saantayon nga agpanunot. Imbes ketdi, ibagana nga awanan kapadasan ken maag dagidiay basta mamati lattan iti amin a mangngegda. (Proverbio 14:15, 18) Pudno a minamaag no basta patientayo lattan ti maysa nga ideya a ditay pay sinukimat nga umuna! Kayariganna ti panagballasiw iti kalsada nga aduan ti lugan a nakaapput ti matatayo gapu laeng ta adda nangibaga nga aramidentayo dayta.

Saan nga iparparegta ti Biblia ti basta panamati lattan, imbes ketdi pagtalinaedentayo a silulukat ti piguratibo a matatayo tapno ditay maallilaw. (Mateo 16:6) Maaramidtayo dayta no usarentayo ‘ti pannakabalintayo nga agrason.’ (Roma 12:1) Sanayennatayo ti Biblia a mangusig iti ebidensia ken maaddaan iti umiso a konklusion a naibatay iti pudno nga impormasion. Usigentayo ti sumagmamano a pagarigan kadagiti insurat ni apostol Pablo.

Idi nagsurat ni Pablo kadagiti Kristiano iti kongregasion ti Roma, saanna a kayat a basta mamatida lattan iti Dios gapu ta imbagana dayta. Imbes ketdi, pinaregtana ida nga usigenda ti ebidensia a pudno nga adda Dios. Insuratna: “Dagiti di makita a kualidadna [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna, iti kasta awan ti pagpambarda [dagidiay saan a mangbigbig iti autoridad ti Dios].” (Roma 1:20) Nagusar ni Pablo iti isu met laeng nga argumento idi nagsurat kadagiti Kristiano a Hebreo. Kunana: “Siempre, tunggal balay adda nangibangon, ngem ti nangibangon iti amin a bambanag isu ti Dios.” (Hebreo 3:4) Iti surat ni Pablo kadagiti Kristiano nga agnanaed iti siudad ti Tesalonica, pinaregtana ida a saanda a mamatpati lattan. Kayatna a ‘siguraduenda ti amin a banag.’​—1 Tesalonica 5:21.

Ti pammati a saan a naibatay iti umiso nga ebidensia ket arigna pangbang-ar laeng iti rikna, a mangyaw-awan ken mangdangran iti maysa a tao. Kuna ni Pablo maipapan kadagiti relihioso a tattao idi kaaldawanna: “Saksiak ida nga adda regtada iti Dios; ngem saan a maitunos iti umiso a pannakaammo.” (Roma 10:2) Nagpateg ngarud a surotentayo ti balakad ni Pablo kadagiti Kristiano iti kongregasion ti Roma. Insuratna: “Agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) Ti pammati a naibatay iti umiso a pannakaammo iti Dios ket saan laeng a pangbang-ar iti rikna no di ket “dakkel a kalasag” a mangsalaknib kadatayo tapno ditay madangran iti emosional ken naespirituan a pamay-an.​—Efeso 6:16.