IN-INUT nga umad-adayo ti luganmi a ferry boat iti nagpintas a Levká Mountains iti isla ti Crete bayat nga agturturongkami iti bassit a tapaw ti bantay iti Mediteraneo. Sangapulo ket tallokami amin a mapan mangasaba iti isla ti Gavdos, maysa a bassit a lugar iti kaabagatanan a murdong ti Europa.

Kasla awan ti problema iti biahemi iti daytoy nabara nga aldaw ti kalgaw. Ngem pagammuan ta kellaat a pimmigsa ti angin isu a dimmaleg ti baybay a nangipallapallayog iti naglugananmi a ferry boat. Gapu ta maulawak, malagipko ti salaysay ti Biblia maipapan iti bagyo a napasaran ni apostol Pablo iti tengnga daytoy a baybay sinigsiglon ti napalabas​—idi a ti Gavdos maawagan pay laeng iti Cauda. (Aramid 27:13-17) Inanamaek a natalgedkami a makadanon idiay Gavdos.

Kamaudiananna, makitami met laengen ti destinasionmi. Nabato ti igid ti isla ngem medio patag ti tapawna ta agarup 300 metro laeng ti kangatona ken awan ti alimpatokna. Adu a saleng ken babassit a mula ti nagtubo iti daytoy nga isla nga agarup 26 kilometro kuadrado ti kalawana. Adda met paset ti isla a nagtubuan dagiti kayo a parwa agingga iti aplaya.

Adda idi tiempo nga agarup 8,000 a tattao ti agindeg iti isla. Ita, awan pay 40 a tattao ti permanente nga agindeg iti isla. Agparang a saan a rimmang-ay ti isla ti Gavdos. Nupay masansan nga aglayag dagiti pangkargamento a barko ken tangker iti kostana, manmano dagiti ferry boat nga agbiahe a mapan iti isla ti Crete. Kanayon pay a maladaw wenno makanselar ti biahe gapu iti dakes a paniempo.

Napankami iti Gavdos tapno idanonmi kadagiti tattao ti makaparagsak ken makapabileg a mensahe, ti sigurado a namnama iti masanguanan a biag nga agnanayon nga addaan perpekto a salun-at. Idi dandanikamin sumanglad, magagarankamin a dumsaag tapno iranudmi ti naimbag a damag.

Madlaw kadagiti bimsag a rupami a narigat ti aglayag a mapan iti Gavdos gapu ta agarup uppat ket kagudua nga oras ti panaglayagmi iti nadaleg a baybay. Ngem nabang-arankami idi nakaridep ken nakapagkapekamin. Kalpasan ti apagbiit a panangrepaso iti salaysay ti Biblia maipapan iti panaglayag  ni apostol Pablo ken ti napasnek a panagkararagmi, nakasaganakamin a mangasaba.

Mannakigayyem ken managpadagus dagiti lumugar. Awisendakami kadagiti pagtaenganda ken pagmeriendaendakami. Malaksid iti panangiranudmi kadakuada iti naimbag a damag manipud iti Biblia, tinulonganmi met ida iti praktikal a pamay-an. Bayat a makisarsaritakami iti maysa a babai, nakita ti kaduami nga elektrisian ti naperdi nga aplayans iti puestona isu a nagboluntario a mangtarimaan. Natignay ti babai ket inawatna dagiti literatura ti Biblia nga intukonmi kenkuana ken inapresiarna ti ministeriomi. Inyebkas ti sabali pay a babai ti apresasionna ket kinunana, “Ipakita ti iyaayyo a nangasaba ditoy nasulinek nga isla a nagtaud iti Dios ti trabahoyo.”

Apresiaren unay ti tattao dagiti literatura ti Biblia nga awitmi. Maysa a lalaki ti immawat iti magasin a Pagwanawanan ken Agriingkayo! ken kayatna ti ad-adu pay a literatura a basaenna inton panawen ti lam-ek. Maysa met a lalaki ti dimmawat iti kanayonan a literatura a basaenna ken ikabilna iti puestona para kadagiti kostumerna. Intedna kadakami ti adresna tapno binulan a mapatulodanmi iti magasin. Naragsakan ti maysa a pamilia idi naipakita kadakuada a nadakamat iti Biblia ti bassit nga islada. Maragsakanda met a nangawat kadagiti magasintayo.

Nupay makaparegta ti reaksion dagiti tattao, ti ibibisitami iti Gavdos ipalagipna ti nakalkaldaang a pasamak iti dadduma a kakaduami. Iti asideg ti Sarakíniko Bay, adda pasdek a dati a nakaibaludan dagiti destiero gapu iti politika. Naidestiero ditoy ni Emmanuel Lionoudakis, maysa kadagiti Saksi ni Jehova, idi arinunos ti dekada ‘30 gapu iti panangaskasabana. * Idi a tiempo, nailadawan ti Gavdos kas “maysa a natikag nga isla nga ayan dagiti makapapatay a manggagama, lugar a nakatayan ti adu . . . gapu iti bisin, rigat ken sakit, isu a maitutop unay a maawagan dayta kas isla ni patay.” Nagkalap ni Kabsat Lionoudakis iti ikan a taraonna, nupay okupado a mangaskasaba kadagiti padana a balud gapu ta is-isu laeng ti Saksi sadiay. Naladingitan ti anakna a babai, katuganganna a lalaki, ken ti apokona a babai idi nakitada ti lugar a nagnaedanna, 70 a tawen ti napalabasen. Para kadakami, ti ulidanna ti inspirasionmi nga agtalinaed a matalek ken aktibo iti ministerio.

Kadagiti naidestiero ditoy, saan a nasayaat a lugar a pagpasiaran ti Gavdos. Ngem para kadakami, nagsayaat a pangasabaan ti intero nga isla iti daytoy ngudo ti lawas. Nakaipaimakami iti 46 a magasin ken 9 a broshur kadagiti mannakigayyem a tattao sadiay. Namnamaenmi a makitaminto manen dagiti baro a gagayyemmi!

Kasla nakabibiit ti oras ta agawidkami gayamen. Ngem saan manen a nasayaat ti paniempo, isu a naitantan ti alas singko ti malem a panaglayagmi koma. Tengnga ti rabiin idi rinugianmi ti agsagana manen para iti panaglayagmi. Kamaudiananna, nakapanawkami met laeng iti alas tres ti parbangon ken kalpasan ti agarup lima nga oras a nadaleg a panaglayagmi, dimtengkamin iti Crete. Nabambannogkamin idi makasangladkami, ngem maragsakankami ta naipakaammomi ti nagan ni Jehova iti isla ti Gavdos. (Isaias 42:12) Kombinsido ti amin a saan a sayang ti panagreggetmi. Malipatanminto met laeng dagiti narigat a panaglayagmi, ngem malaglagipminto a kanayon dagiti naragsak a kapadasanmi iti Gavdos.