TALAGA kadi a maseknan ni Jehova kadagiti adipenna? No kasta, kasano kauneg ti pannakaseknanna kadakuada? Maammuantayo laeng ti sungbat babaen iti Sao ti Dios. Iti Biblia, nabatad nga ipalgak ni Jehova ti riknana. Usigem ti sasao a masarakan iti Isaias 49:15.

Kas panangyilustrar iti nauneg a pannakaseknan ni Jehova kadagiti adipenna, inaramatna ni Isaias a mangidatag iti maysa kadagiti makatukay-rikna a pagarigan a mailadawantayo. Inyimtuodna daytoy a mamagpanunot a saludsod: “Mabalinan aya ti asawa a babai a lipatan ti agsussusona iti kasta saanna a kaasian ti anak ti tianna?” Kasla nalaka laeng a sungbatan dayta a saludsod. Kasano koma a malipatan ti agpaspasuso nga ina ti maladagana? Aldaw ken rabii nga agdepende kenkuana ti anakna​—ket sidadaan a mangasikaso no kasapulan! Ngem saan laeng a dayta ti sungbat iti saludsod ni Jehova.

Apay a paspasusuen ti ina ti anakna ken ipaayna ti amin a kasapulanna? Tapno laeng kadi agtalna ti agsangsangit nga ubing? Saan. Gagangay a kaasian ti ina ti “anak ti tianna.” Ti Hebreo a berbo a naipatarus a “kaasian” kaipapananna met ti kinadungngo iti maysa nga awanan gaway wenno nakapuy. Ti panangipateg ti ina iti agsussuso nga anakna ti maysa kadagiti kadudungnguan a rikna a mailadawantayo.

Ngem makapaladingit ta saan a tunggal ina ket maasian iti agsussuso nga anakna. “Uray dagitoy a babbai makalipatda,” kuna ni Jehova. Iti lubong a pagbibiagantayo, adu a lallaki ken babbai ti “saan a nasungdo, awanan nainkasigudan a panagayat.” (2 Timoteo 3:1-5) No dadduma, madamagtayo nga adda dagiti inna a mangbaybay-a, mangabuso, wenno mangpanaw iti kayyanak a maladagada. Kastoy ti komento ti maysa a reperensia iti Biblia maipapan iti Isaias 49:15: “Managbasol dagiti inna ket ti ayatda no dadduma abaken ti kinadakes. Mabalin a di makapudno uray ti kadudungnguan a tao.”

“Ngem,” impasigurado ni Jehova, “siak saankanto a malipatan.” Ita makitatayon no ania ti kayat a sawen ti saludsod ni Jehova iti Isaias 49:15. Ibagbagana nga adayo a naas-asi ngem iti tattao nga inna. Dagiti imperpekto nga inna mabalin a dida maasian iti awanan gaway nga annakda, ngem dinto pulos malipatan ni Jehova a kaasian dagiti adipenna nga agkasapulan. Mayanatup ngarud ti kanayonan a komento ti nadakamaten a reperensia maipapan iti Isaias 49:15: “Maysa daytoy a kadudungnguan, no saan man a ti kadudungnguan, nga ebkas ti ayat ti Dios a nailanad iti Daan a Tulag.”

Saan kadi a makaliwliwa a maammuan ti maipapan iti “nadungngo a panangngaasi ti Diostayo.” (Lucas 1:78) Paregtaendaka a mangammo no kasano a makaadanika ken Jehova? Daytoy a naayat a Dios ipasiguradona kadagiti agdaydayaw kenkuana: “Saankanto a pulos panawan ket saankanto a pulos baybay-an.”​—Hebreo 13:5.

Singasing a Basaen iti Biblia iti Pebrero:

▪ Isaias 43-62