“Santo, Santo, Santo ni Jehova”
Umadanika iti Dios
“Santo, Santo, Santo ni Jehova”
NO AGPILIKA iti sao a mangiladawan ken Jehova a Dios, ania ti piliem? Idi maikawalo a siglo B.C.E., adda sirmata a naipaay ken mammadto Isaias a nakangngeganna kadagiti espiritu a parsua a mangidaydayaw ken Jehova. Inaramat dagitoy nga anghel ti sao a mangiladawan iti nagpateg a kualidad ti Dios—ti kinasanto. Ti nakita ken nangngeg ni Isaias tignayennatayo koma nga agdayaw ken umadani ken Jehova. Iladawam nga addaka iti eksena bayat nga usigentayo ti sasao iti Isaias 6:1-3.
Ania ti nakita ni Isaias? Kunana: “Siak . . . nakitak ni Jehova, a situtugaw iti trono a nangato ken naitan-ok.” (Bersikulo 1) Saan nga aktual a buybuyaen ni Isaias ti Soberano nga Apo Jehova, ta dagiti espiritu ket saan a makita ti pisikal a mata. Nabatad a kunaen ti Biblia: “Awan ti tao a nakakita iti Dios uray kaano.” (Juan 1:18) Sirmata laeng ti nakita ni Isaias. a Ngem detalyado ti sirmata ta kasla agpaypayso a nakitana ni Jehova, ket uray la nagamanga ni Isaias.
Kalpasanna, napaliiw ni Isaias ti saan pay idi a nakita ti asinoman a tao a naaddaan iti pribilehio a makakita iti sirmata. Insuratna: “Dagiti serafin agtaktakderda idi iti ngatuen [ni Jehova]. Tunggal maysa addaan innem a payak. Babaen iti dua tinaginayonna a siaabbong ti rupana, ket babaen iti dua tinaginayonna a siaabbong dagiti sakana, ket babaen iti dua isu tumayab.” (Bersikulo 2) Dagiti serafin ket espiritu a parsua a nangato ti saadda. Ni laeng Isaias ti mannurat iti Biblia a nangdakamat kadagitoy a parsua. Agtaktakder dagiti serafin a sisasagana a mangitungpal iti aniaman a kayat ti Dios. Ab-abbonganda ti rupa ken saksakada, a mangipakita iti nauneg a panagraemda ken Jehova gapu iti dakkel a pribilehioda nga agserbi iti sanguananna.
Saan laeng a nagamanga ni Isaias iti nakitana no di ket iti pay nangngegna a napigsa a kanta dagiti serafin. Insurat ni Isaias: “Daytoy immawag iti daydiay ket kinunana: ‘Santo, santo, santo ni Jehova ti buybuyot.’” (Bersikulo 3) Ti Hebreo a sao a naipatarus a “santo” ipasimudaagna ti kinasin-aw ken kinadalus. Ramanenna met ti “naan-anay a kinaawan biddut ken pannakaisina iti basol.” Nalabit dua a grupo dagiti serafin ti agsinnungbat a mangikankanta iti sasao a “santo, santo, santo,” a mangipaganetget iti kangatuan a kita ti kinasanto ni Jehova. (Apocalipsis 4:8) Kinasanto ngarud ti pakabigbigan ni Jehova. Naan-anay a nasin-aw, nadalus, ken awan pakapilawanna.
Gapu ta ammotayo a santo ni Jehova, matignaytayo koma nga umadani kenkuana. Apay? Saan a kas kadagiti tattao nga agtuturay nga addaan tendensia nga agabuso, awan a pulos pakainaigan ni Jehova iti basol. Ngarud, ipasigurado ti kinasantona a kanayon nga isu ti kasayaatan nga Ama, nalinteg nga Agturay, ken di mangidumduma nga Ukom. Agtalektayo a saannatayto a paayen ti nasantuan a Dios.
Singasing a basaen iti Biblia iti Disiembre:
[Footnote]
a Kastoy ti kuna ti Pannakatarus iti Kasuratan: “No ti maysa a tao umawat iti sirmata manipud iti Dios bayat a siririing, agparang a maimaldit ti ladawan iti sipupuot a panunot. Inton agangay, ti immawat mabalinna a lagipen ken deskribiren wenno ilanad ti sirmata iti bukodna a sasao.”—Impablaak dagiti Saksi ni Jehova.
[Blurb iti panid 26]
Gapu ta ammotayo a santo ni Jehova, matignaytayo koma nga umadani kenkuana
