Saludsod Dagiti Agbasbasa

Makalasat Kadi ti Daga Inton 2012?

▪ “Adu a tattao ti napan iti maysa a purok idiay France ta patienda nga asidegen ti kanibusanan ti lubong . . . Mamatida nga agpatingga ti lubong inton Disiembre 21, 2012, ti ngudo ti 5,125 a tawen iti nagkauna a kalendario dagiti Maya.”​—BBC News.

Agtalinaedto nga agnanayon ti daga aniaman ti sawen dagiti lider ti relihion, peke a sientista, ken dadduma pay a mangipadpadto a madadael ti daga. Sigurado a makalasat ti daga inton 2012. Kinapudnona, addanto latta ti planeta a Daga uray kalpasan dayta a tawen.

Kunaen ti Biblia: “Maysa a caputotan mapan, ket umay ti sabali a caputotan; ngem ti daga agtaeng iti agnanayon.” (Eclesiastes 1:4, Ti Biblia) Usigem met ti kaipapanan ti sasao iti Isaias 45:18: “Daytoy ti kinuna ni Jehova, . . . ti Nangporma iti daga ken ti Nangaramid iti dayta, Isu Daydiay sititibker a nangipasdek iti dayta, a saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan a mismo: ‘Siak ni Jehova, ket awanen ti sabali.’”

Busbosen kadi ti maysa nga ama ti adu nga oras tapno agaramid iti napintas nga ay-ayam a pagragsakan ti anakna sananto met laeng dagus a dadaelen dayta kalpasan a naitedna iti anakna? Anian a kinaulpit! Iti umasping a pamay-an, pinarsua ti Dios ti daga kangrunaanna nga agpaay a pagragsakan ti pinarsuana a tattao. Kinuna ti Dios iti umuna a natauan a pagassawaan a da Adan ken Eva: “Agbungakayo ken agadukayo ket punnuenyo ti daga ken parukmaenyo.” Kalpasanna, “nakita ti Dios ti isuamin nga inaramidna ket, adtoy! nasayaat unay dayta.” (Genesis 1:27, 28, 31) Saan a linipat ti Dios ti panggepna para iti daga, ket saannanto nga ipalubos a madadael ti daga. Impaganetget ni Jehova maipapan iti amin nga inkarina: “Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 55:11.

Nupay kasta, panggep ni Jehova a ‘dadaelen dagidiay mangdaddadael iti daga.’ (Apocalipsis 11:18) Kastoy ti inkarina: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”​—Proverbio 2:21, 22.

Kaano a mapasamak daytoy? Awan ti tao a makaammo. “Maipapan iti dayta nga aldaw wenno ti oras awan ti asinoman a makaammo,” kuna ni Jesus, “uray dagiti anghel sadi langit wenno uray ti Anak, no di ti Ama.” (Marcos 13:32) Saan nga ipadpadto dagiti Saksi ni Jehova no kaano a dadaelen ti Dios dagiti nadangkes. Nupay sipsiputanda ti “pagilasinan” ti panungpalan ken mamatida nga agbibiag itan ti sangatauan iti aw-awagan ti Biblia kas ‘dagiti maudi nga aldaw,’ saanda nga ammo no kaano a mapasamak ti “panungpalan.” (Marcos 13:4-8, 33; 2 Timoteo 3:1) Ammoda a ti laeng nailangitan nga Amada ken ti Anakna ti makaammo iti dayta.

Kabayatanna, okupado dagiti Saksi ni Jehova a mangikaskasaba iti naimbag a damag ti Pagarian ti Dios, ti nailangitan a gobierno a mangiturayto iti planeta a Daga ken mamagbalin iti dayta a natalna a paraiso, a ‘tagikuaen ken pagtaengan iti agnanayon dagiti nalinteg’ a tattao.​—Salmo 37:29.

[Picture Credit Line iti panid 10]

Image Science and Analysis Laboratory, NASA-Johnson Space Center