Surat Manipud Congo (Kinshasa)

Iti Arubayan ti Bantay ti Apuy

BAYAT a sumingsingising ti init iti siudad ti Goma, nagbalin a dumerosas ken nalabaga ti tangatang. Kanayon a makitami ti makapaamanga a buya ti Mount Nyiragongo, maysa kadagiti kaaktibuan a bulkan iti lubong. Kanayon nga agas-asuk ti wangawanganna. Lumabbaga ti napuskol nga asuk no rabii, a mangyanninaw iti lava iti wangawanganna.

Iti lenguahe a Swahili, maaw-awagan daytoy a bantay iti Mulima ya Moto​—Bantay ti Apuy. Idi 2002 ti naudi a napigsa a panagbettak ti Nyiragongo. Napukaw ti amin a sanikua ti adu a kaarruba ken gagayyemmi ditoy Goma. Iti sumagmamano a lugar a pangasabaanmi ken lakayko, magnakami iti rabaw dagiti timmangken a lava, ket nakunak iti unegko a kastoy siguro ti magna idiay bulan. Ngem uray kasano katangken dagiti lava, nalukneng ti puso dagiti tattao nga agnanaed ditoy. Naragsak ken sisasaganada a dumngeg iti ipakpakaammomi a naimbag a damag. Daytoy ti namagbalin a nakaragragsak ti panagserbimi iti arubayan ti Bantay ti Apuy.

Magagaranak a nagriing iti maysa a bigat ti Sabado. Implanomi ngamin ti mapan iti refugee camp iti Mugunga, iti laeng lauden ti siudad. Dakami nga agassawa, agraman dagiti bumisbisita a gagayyem ken padami a misionero, ket agrubrubbuat a mangasaba sadiay iti agmalmalem. Adu ti agnanaed sadiay gapu ta tinalawanda ti ilida a biktima ti kinaranggas.

Inkargami iti trak ti adu a naibatay-Biblia a literatura, adda lenguahe a Pranses, Kiswahili, ken Kinyarwanda. Kalpasanna, napankamin. Lumawlawag ti siudad bayat ti ilalasatmi iti lasonglasong a kalsada ti Route Sake. Idurduron dagiti agtutubo ti napnapno ti kargana a chukudu (sinan-motor a kayo a pagbunag). Nakarangrangrang ti bidang dagiti babbai a magmagna iti igid ti kalsada bayat a susuonenda ti dadakkel a nabalkut a karga. Okupado dagiti mototaxi nga agbumbunag iti tattao nga agturong iti trabaho ken iti tiendaan. Adu ti nalabsanmi a balbalay nga asul ti hambada ken nagratiken dagiti kayo a didingda.

Nakasangpetkami iti Kingdom Hall idiay Ndosho tapno agkikitakami kadagiti padami a Saksi ni Jehova a kaduami a mangasaba iti kampo. Maasianak kadagiti agtutubo, balo a babbai, ulila, ken dagiti addaan nadumaduma a pisikal a sagubanit. Adu kadakuada ti nagsagaba iti nakaro a rigat ngem simmayaat ti kasasaadda gapu iti panangsurotda kadagiti prinsipio iti Biblia. Segseggaanda a matungpal ti namnama a nailanad iti Biblia, ket sigagagar nga iranranudda dayta iti sabsabali. Kalpasan ti  ababa a panagsasaritami no ania dagiti mabalinmi a basaen a teksto ti Biblia a makaparegta kadagiti masabetmi a tattao, naglugankami nga agdagup iti 130 iti lima a minibus ken maysa a four-wheel-drive a trak.

Agarup 30 a minuto ti biahemi a nagturong iti kampo. Ginasut a babassit a puraw a tolda ti naipatakder iti rabaw ti timmangken a lava. Naintar dagiti kasilias ken paglabaan iti tengnga ti kampo. Adu ti aglablaba, agin-innaw, aglutluto, agibukbuksil iti bukbukel, ken agwalwalis iti paraangan ti toldada.

Nakasaomi ni Papa Jacques, ti lalaki a mangay-aywan iti maysa a paset ti kampo. Maseknan iti panangpadakkelna kadagiti annakna kadagitoy narikut a tiempo. Napalaus ti yamanna idi imbatimi ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo ket kinunana a basaenna dayta sa mangummong iti babassit a grupo tapno iranudna ti naammuanna.

Kalpasanna, nakasaritami met ni Mama Beatrice. Dinamagna no apay nga impalubos ti Dios ti panagsagaba. Impagarupna ngamin a dusdusaen ti Dios ta natay ni lakayna iti gubat. Marigrigatan ti nasikogan a balasangna a mangtartaripato iti maladagana. Nakidnap pay ti barona sumagmamano a bulan ti napalabasen ken saannan nga ammo ti ayanna.

Iti dayta a napait a kapadasan ni Mama Beatrice, napanunotko ti nakaro a panagsagaba ni Job idi naipadamag kenkuana dagiti makapakigtot a pasamak. Inlawlawagmi no apay nga agsagsagaba ti tao ken impanamnamami a ti panagsagabana ket saan a pannusa ti Dios. (Job 34:10-12; Santiago 1:14, 15) Impaganetgetmi met dagiti panagbalbaliw nga aramidento ti Dios ditoy daga babaen ti Pagarianna. Nakaisem met laeng idi agangay, ket kinunana a kayatna a talaga ti agadal iti Biblia ken umararaw iti Dios.

Naragsakkami amin a napan nangasaba iti dayta nga aldaw, ket nariknami ti tulong ni Jehova iti panangiranudmi iti namnama ken pammaregta kadagiti tattao. Idi pumanawkamin iti kampo, inwagayway ti adu a tattao ti iggemda a tract, magasin, ken libro.

Idi agaw-awidkamin, pinampanunotko dagiti kapadasanmi iti nagmalmalem. Kasta unay ti ragsakko iti dayta a naisangsangayan nga aldaw! Malaglagipko ti panagyaman ni Papa Jacques, ti isem ni Mama Beatrice gapu iti pannakabang-arna, ti nairut nga alamano ti maysa a baket nga isem laeng ti maisungbatna. Malagipko dagiti agtutubo a nauneg ti saludsodda ken nataengan ti panagpampanunotda. Apresiarek ti nabileg a pakinakem dagiti tattao a kabaelanda pay laeng ti umisem ken agkatawa uray no kasta unay ti rigatda.

Iti daytoy a lugar, adu a napinget a tattao ti mangikagkagumaan a tumulong ken mangliwliwa kadagiti agsagsagaba. Dakkel a pribilehio nga aramaten ita ti Biblia tapno ipakita kadagiti tattao ti permanente a solusion kadagiti problemada. Nakaragragsakak ta karamanak iti kasaknapan pay laeng a naespirituan a panangtulong kadagiti tattao ditoy lubong!