Apay a Kasla Awan Mamaay ti Biag?

ANIA ti pamatiantayo a ti biag ket saan nga agnanayon nga “ubbaw” wenno apagbiit nga agpukaw a “kas anniniwan,” kas panangiladawan ni Ari Solomon? (Eclesiastes 6:12) Ti Biblia a naipaltiing a Sao ti Dios​—ti mapagtalkan a gubuayan ti impormasion​—inkarina a talaga a makagunggonanto ti biag iti masanguanan.​—2 Timoteo 3:16, 17.

Maammuantayo iti Biblia no ania ti orihinal a panggep ti Dios para iti daga ken para kadagiti tattao. Ilawlawagna met no apay a nasaknap ti kinaawan hustisia, panangirurumen, ken panagsagaba. Apay a nasken a matarusantayo dagitoy? Adu ngamin ti mangipagarup nga awan a pulos mamaay ti biag agsipud ta saanda nga ammo wenno dida patien dagitoy a kinapudno.

Ania ti Panggep ti Dios Para iti Daga?

Ni Jehova a Dios a pinarsuana ti daga kas perpekto a paraiso a pagtaengan ti tao​—ti lugar a pagbiagan koma nga agnanayon dagiti perpekto a lallaki ken babbai. Saan a kasta ti pammati ti kaaduan ta kunada nga inaramid kano  ti Dios ti daga kas lugar a pangsubokan kadagiti tattao tapno makitana no maikarida a maaddaan iti naragsak ken makagunggona a biag iti lubong dagiti espiritu.​—Kitaem ti kahon a  “Masapul Kadi a Panawantayo ti Daga Tapno Maaddaantayo iti Makagunggona a Biag?” iti panid 6.

Pinarsua ti Dios ti lalaki ken babai sigun iti ladawanna, nga inikkanna ida iti kabaelan a mangtulad iti nagsasayaat a kualidadna. (Genesis 1:26, 27) Inaramidna ida a perpekto. Impaayna ti amin a kasapulanda tapno maaddaanda iti nabunga ken makagunggona a biag iti agnanayon. Ramanen dayta ti panangpunnoda iti intero a daga ken ti panangaywanda iti dayta, a pagbalinenda a paraiso a kas idi iti hardin ti Eden.​—Genesis 1:28-31; 2:8, 9.

Ania ti Timmaud a Parikut?

Nalawag nga adda dakes a napasamak. Saan a maiparangarang ti kaaduan a tattao ti nagsasayaat a kualidad ti Dios. Saan met a paraiso ti daga ita. Ania ti napasamak? Di umiso ti panangusar da Adan ken Eva iti wayawayada nga agpili. Tinarigagayanda ti agbalin a “kas iti Dios,” ket inkeddengda no ania ti “naimbag ken dakes.” Gapuna, nagsukirda met kas iti inaramid ni Satanas a Diablo.​—Genesis 3:1-6.

Ngarud, saan a karaman ti kinadakes iti makunkuna a misterioso ken naikeddengen a plano ti Dios. Timmaud laeng dayta idi a ni Satanas​—ken kalpasanna, da Adan ken Eva​—nagrebeldeda iti panangituray ti Dios. Nagbanaganna, napukaw dagiti immuna a nagannaktayo ti Paraiso ken ti kinaperpekto, a nangibunga iti basol ken ipapatayda agraman dagiti annakda​—ti intero a sangatauan. (Genesis 3:17-19; Roma 5:12) Daytoy ti nakaigapuan dagiti kasasaad a mamagbalin a kasla awan mamaay ti biag ita.

Apay a Di Napagpatingga a Dagus ti Kinadakes?

Adda dagiti agkuna, ‘Apay a saan a dagus nga impatingga ti Dios ti kinadakes babaen ti panangpukawna ken Satanas ken ti dadduma pay a rebelde tapno matungpal ti panggepna?’ Nasaysayaat kadi no kasta ti inaramidna? Ania ti makunam no adda nabileg nga agturay a dagus a mangpapatay iti asinoman a mangkarit iti autoridadna? Saanto ngata nga agduadua dagiti nasaririt nga umili ket kuestionaranda dagiti pagalagadan dayta nga agturay?

Inkeddeng ti Dios a saanna a dadaelen a dagus dagiti rebelde. Nainsiriban ti panangpalabasna iti tiempo tapno mamimpinsan a marisut dagiti isyu a naibangon idiay Eden mainaig iti wagas ti panangiturayna.

Maikkatto ti Amin a Kinadakes

Daytoy ti laglagipentayo: Ti Dios impalubosna ti kinadakes iti limitado laeng a tiempo. Ammona ngamin a kabaelanna nga ikkaten ti amin a nakas-ang a resulta ti kinadakes no narisuten dagiti napateg nga isyu a pinataud dagiti rebelde.

Saan a binaybay-an ti Dios ti panggepna iti daga ken iti sangatauan. Babaen ken mammadto Isaias, impasigurado ni Jehova nga Isu ti Nangaramid iti daga, a ‘saanna a pinarsua nga awan kapapay-anna, a nangbukel iti dayta tapno mapagnaedan.’ (Isaias 45:18) Din agbayag, rugiannan nga isubli ti perpekto a kasasaad ti daga sigun iti orihinal a panggepna. Yantangay napaneknekanton nga umiso ti wagas ti  panangiturayna, nainkalinteganto laeng nga aramatenna ti di malapdan a pannakabalinna tapno matungpal ti pagayatanna ken tapno matalipuposna ti amin a kinadakes. (Isaias 55:10, 11) Dayta a tignay ti Dios ket karaman iti kiddaw a dinakamat ni Jesu-Kristo iti modelo a kararag. Kastoy ti insurona nga ikararagtayo: “Maaramid koma ti pagayatam, kas sadi langit, kasta met iti daga.” (Mateo 6:9, 10) Ania ti ramanen dayta?

Ti Pagayatan ti Dios Para Iti Daga

Karaman iti pagayatanna ti ‘panangtagikua dagiti naemma iti daga.’ (Salmo 37:9-11, 29; Proverbio 2:21, 22) Ni Jesu-Kristo “ispalennanto daydiay napanglaw nga agpatpatulong, kasta met daydiay naparigatan.” Isalakannanto ida iti “pannakairurumen ken iti kinaranggas.” (Salmo 72:12-14) Awanton ti gubat, ipapatay, lulua, ut-ot, wenno panagsagaba. (Salmo 46:9; Apocalipsis 21:1-4) Riniwriw a  natnatay bayat ti panangipalubos ti Dios iti kinadakes ti mapagungarto ditoy daga, ket maikkandanto iti gundaway a magunggonaan iti daytoy a probision ken iti dadduma pay a bendision.​—Juan 5:28, 29.

Wen, ikkatenton ni Jehova ti dakes a resulta ti panagrebelde ni Satanas. Naan-anayto a maikkat dayta ta “dagiti immun-una a riribuk [amin a pakaigapuan ti ladingit ken ut-ot itatta] pudno a malipatanton.” (Isaias 65:16-19) Siguradonto a matungpal dayta. Saan a mabalin nga agulbod ti Dios. Matungpal amin a karina. Saanton nga agbalin ti biag a “kinaubbaw ken panangkamkamat iti angin.” (Eclesiastes 2:17) Agbalinton a makagunggona dayta.

Ngem ti ngay biagtayo ita? Agbalin kadi a makagunggona ti biagmo no maammuam ti isursuro ti Biblia ken matarusam ti panggep ti Dios para iti daga? Dayta ti ilawlawag ti sumaruno nga artikulo.

[Footnote]

[Kahon iti panid 6]

 Masapul Kadi a Panawantayo ti Daga Tapno Maaddaantayo iti Makagunggona a Biag?

Iti adun a siglo, dagiti tattao a saan a makaammo iti panggep ti Dios para iti daga insuroda a masapul a panawantayo ti daga tapno maaddaantayo iti makagunggona a biag.

Adda dagiti agkuna a ti kararua ket “sigud a natantan-ok a parsua sakbay a simrek iti bagi ti tattao.” (New Dictionary of Theology) Kunaen met ti dadduma a ti kararua ket “naipupok iti bagi kas dusa kadagiti basol a naaramidanna idiay langit.”​—Cyclopedia of Biblical, Theological, and Ecclesiastical Literature.

Kastoy ti kapanunotan nga insuro dagiti Griego a pilosopo, kas kada Socrates ken Plato: No makaruk-at ti kararua iti pisikal a bagi, “saanton nga agalla-alla ken agaramid iti kinamaag ken agbuteng, ken agtarigagay iti dakes ken agsagaba iti amin a rigat a mapaspasaran ti sangatauan” ken agnaedto nga “agnanayon a kaduana dagiti didios.”​—Plato’s Phaedo, 81, A.

Idi agangay, dagiti makunkuna a lider dagiti Kristiano innayonda kadagiti sursuroda ti kapanunotan dagiti Griego a pilosopo a “saan kano a matay ti kararua.”​—Christianity​—A Global History.

Idiligmo dagitoy a kapanunotan iti tallo a kangrunaan a kinapudno a masarakan iti Biblia:

1. Panggep ti Dios nga agbalin ti daga a permanente a pagtaengan ti tao, saan ketdi a temporario a pakasubokan no siasino ti maikari a makipagtaeng kenkuana idiay langit. No nagtulnog koma da Adan ken Eva kadagiti linteg ti Dios, sibibiagda koma pay laeng nga agnanaed iti paraiso a daga.​—Genesis 1:27, 28; Salmo 115:16.

2. Nupay isursuro ti kaaduan a relihion a ti tao ket addaan iti kararua​—di makita a banag nga agtataeng iti bagi​—simple laeng ti isursuro ti Biblia. Ti tao isu ti “kararua a sibibiag” a nabukel manipud iti ‘tapok iti daga.’ (Genesis 2:7) Saan a pulos nga imbaga ti Biblia a di matay wenno imortal ti kararua. Kunaenna a ti kararua ket mabalin a patayen, dadaelen, wenno naan-anay a maawan. (Salmo 146:4; Eclesiastes 9:5, 10; Ezequiel 18:4, 20) Talaga a natay ti immuna a kararua a ni Adan, ket nagsubli iti tapok a naggapuanna.​—Genesis 2:17; 3:19.

3. Yantangay awan ti imortal a kararua a pumanaw ken agturong iti lubong dagiti espiritu, agpannuray ngarud ti masanguanan a biag ti tao iti kari ti Dios a panagungar iti paraiso a daga.​—Daniel 12:13; Juan 11:24-26; Aramid 24:15.