Saludsod Dagiti Agbasbasa

Ti Dios Pinarsuana Kadi ti Diablo?

▪ Yantangay kuna ti Biblia a ti Dios ‘pinarsuana ti amin a bambanag,’ ipapan ti dadduma a ti Dios pinarsuana la ketdi ti Diablo. (Efeso 3:9; Apocalipsis 4:11) Ngem nalawag a saan a kasta ti kunaen ti Biblia.

Nupay pinarsua ni Jehova ti persona a nagbalin a Diablo wenno ti kangrunaan a bumusbusor iti Dios, saan a ti Dios ti nangparsua iti Diablo. Maitunos daytoy iti kunaen ti Biblia maipapan ken Jehova kas Namarsua: “Naan-anay ti aramidna, ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; isu nalinteg ken napalungdo.” (Deuteronomio 32:3-5) Kadagita a sasao, maikunatayo a ni Satanas ket maysa idi a perpekto ken nalinteg nga anghel a karaman kadagiti annak ti Dios. Kinuna ni Jesus iti Juan 8:44 a ti Diablo “saan a nagtakder a di maisin iti kinapudno,” a mangipamatmat a sigud a napudno ken awanan basol.

Ngem kas iti dadduma a nasaririt a parsua ni Jehova, ti anghel a nagbalin a Satanas ket addaan iti wayawaya nga agpili iti naimbag wenno dakes. Gapu ta pinilina a busoren ti Dios ken sinugsoganna a kumanunong kenkuana ti umuna a natauan a pagassawaan, inaramidna ti bagina kas Satanas, a kaipapananna “Bumusbusor.”​—Genesis 3:1-5.

Dayta a nadangkes nga espiritu a parsua pinagbalinna met ti bagina a Diablo, kayatna a sawen, “Mammardaya.” Ni Satanas daydiay di makita a persona nga adda idi iti likudan ti serpiente ken sisisikap a nagulbod tapno maallilawna ni Eva nga agsukir iti nabatad a linteg ti Namarsua. Dayta ti makagapu a ni Jesus inawaganna ni Satanas iti “ama ti kinaulbod.”​—Juan 8:44.

Ngem kasano a nagbalin a dakes ti maysa a perpekto nga espiritu a parsua, nga awanan pagkapuyan ken dakes nga impluensia iti aglawlawna? Nabatad a ginartemanna ti panagdayaw a maipaay laeng iti Dios ken nakitana a posible a maiturayanna dagiti tattao imbes nga agpaiturayda ken Jehova. Gapu ta pinampanunotna a mabalinna met ti agturay, binay-anna nga umukuok dayta iti isipna imbes nga iwaksina, ket intungpalna dayta idi agangay. Kasta ti nadakamat iti libro a Santiago: “Tunggal maysa masuot babaen ti pananggargari ken panangsulbog ti bukodna a derrep. Kalpasanna ti derrep, inton nayinawen, mangipasngay iti basol.”​—Santiago 1:14, 15; 1 Timoteo 3:6.

Kas ilustrasion: Ipapanmo a ti maysa nga accountant ket nakakita iti gundaway a mangpalsipikar kadagiti rekord tapno matakawanna ti kompania a pagtartrabahuanna. Mabalinna nga iwaksi a dagus dayta a dakes a kapanunotan. Ngem no kanayon a pampanunotenna, ad-adda a tarigagayanna nga ibanag dayta. No aramidenna ti kasta, arigna a pinagbalinna ti bagina a mannanakaw. No ilibakna ti dakes nga inaramidna, agbalin met a managulbod. Umasping iti dayta, ti pinarsua ti Dios nga anghel pinatanorna dagiti dakes a tarigagayna sana imbanag dagita. Inaramatna ti wayawayana nga agpili tapno mangallilaw ken sukirenna ti Amana, iti kasta pinagbalinna ti bagina a Satanas a Diablo.

Imbag laengen ta iti tiempo nga inkeddeng ti Dios, dadaelennanto ni Satanas a Diablo. (Roma 16:20) Kabayatanna, naipakaammo kadagiti adipen ti Dios no ania dagiti taktika ni Satanas ken masalsalaknibanda manipud kadagiti panangallilawna. (2 Corinto 2:11; Efeso 6:11) Ngarud, ikagumaantayo koma a ‘busoren ti Diablo, ket isu agtalawto kadatayo.’​—Santiago 4:7.

[Blurb iti panid 21]

Ti maysa kadagiti pinarsua ti Dios a perpekto nga anghel pinagbalinna ti bagina a Satanas gapu ta pinilina a busoren ti Dios