Ti Biblia Balbaliwanna ti Biag

KASANO a nagbalbaliw ti maysa a serbidora iti bar, a nalaing nga agsao iti dakes, nalabes ti panagin-inumna, ken agdrogdroga? Apay a nagbalin a ministro ti relihion ti maysa a politiko idinto ta kagurgurana idi ti relihion? Ania dagiti karit a masapul a pagballigian ti instruktor ti maysa a bunggoy ti polisia idiay Russia tapno agbalin a Saksi ni Jehova? Basaem ti mismo a salaysayda.

“Simmayaat Manen ti Relasionmi ken ni Nanang.”​—NATALIE HAM

NAYANAK: 1965

NAKAYANAKANNA: AUSTRALIA

PAKASARITAANNA: NAGDROGDROGA

TI NAPALABASKO: Dimmakkelak idiay South Australia, iti bassit nga ili ti Robe, a panagkalap ti pagbiagan dagiti umili. Kadagiti kasta a komunidad, hotel ti pagsasarakan dagiti tattao tapno agpalpaliwada. Dagiti nagannak masansan a mapanda iti hotel, isu a dagiti annakda makitkitada ti panagabuso iti droga, mangmangngegda ti agkakadakes a sasao, ken malanglang-abda dagiti asuk ti sigarilio.

Idi agtawenak iti 12, agsigsigarilioakon, nalaingakon nga agsao iti dakes, ken kanayonkami nga agsubang ken nanangko. Idi agtawenakon iti 15, nagsina dagiti dadakkelko, ket kalpasan ti 18 a bulan, nagtalawakon iti balaymi. Nasursurok ti aginum ken agdroga, ken nagbalin nga imoral ti panagbiagko. Nauyongak ken saan a natalna ti panunotko. Ngem gapu ta lima a tawen a nagadalak iti martial arts ken iti panagsanay no kasano nga idepensa dagiti babbai ti bagida, impagarupko a kabaelak nga ikanawa ti bagik. Nupay kasta, kadagiti kanito nga agmaymaysaak ken agut-utobak, umapay kaniak ni liday ket ikararagko iti Dios a tulongannak. Ngem ibagak kenkuana: “Dinak koma ibabaon idiay simbaan.”

Di nagbayag, inikkannak iti Biblia ti maysa a gayyemko a relihioso ngem awan ti nakaikamenganna a relihion. Daytoy a lalaki ket agsussusop iti droga a kas met laeng iti dadduma a gagayyemmi. Ibilangna ti bagina a napasnek ti panamatina iti Dios ket kinombinsirnak nga agpabautisar. Impannak iti maysa a dan-aw ket binautisarannak. Sipud idin, panagriknak ket addan naisangsangayan a relasionko iti Dios. Nupay kasta, diak pulos inwayaan a basaen ti Biblia.

NO KASANO A BINALBALIWAN TI BIBLIA TI BIAGKO: Idi 1988, dua a Saksi ti nagtuktok iti ridawko. Insaludsod ti maysa kadakuada, “Ammom kadi ti nagan ti Dios?” Binasa ti Saksi ti Bibliana iti Salmo 83:18, a kunkunana: “Tapno maammuan koma dagiti tattao a sika, nga agnagan Jehova, sika laeng ti Kangatuan iti intero a daga.” Nasdaawak! Idi nakapanawdan, nagmanehoak iti 56 a kilometro (35 a milia) a napan iti maysa a  paglakuan iti narelihiosuan a liblibro tapno kitaek ti dadduma a patarus ti Biblia sa kinitak dayta a nagan iti diksionario. Yantangay nakombinsirak a Jehova ti nagan ti Dios, pinampanunotko no ania pay ti diak ammo.

Kinuna kaniak ni nanangko a sabsabali kano dagiti Saksi ni Jehova. Gapu ta bassit laeng ti ammok maipapan kadakuada, impagarupko no konserbatiboda unay ken awan ti panagraragsakda. Planok nga inton sumarungkarda, diak ipadlaw nga addaak. Ngem nagbaliw ti panunotko idi immayda. Pinastrekko ida ket dagus nga inrugimi ti agadal iti Biblia.

Tunggal malpas ti panagadalmi, iranudko met iti nobiok a ni Craig dagiti naadalko. Idi agangay, gapu iti suronna, rinabsutna ti ig-iggamak a libro a pagad-adalanmi ket rinugianna a basaen dayta. Iti las-ud ti tallo a lawas, nayebkasna a nasarakannan ti kinapudno maipapan iti Dios. Nagangayanna, insardengmi ken ni Craig ti agdroga ken aginum. Insardengko metten ti agtrabaho kas serbidora iti bar. Tapno maitunosmi ti biagmi kadagiti pagalagadan ti Biblia, inkeddengmi ti agkasar.

NO KASANO A NAGUNGGONAANAK: Idi rugianmi ti makipagadal iti Biblia kadagiti Saksi ni Jehova, agsinakami koman ken Craig. Ngem ita, ni Craig ket maysan a nakasaysayaat nga asawa, ken addaankamin iti dua a nagguguapo nga annak. Addaankami met kadagiti kapammatian nga ibilangmi a napateg a gagayyem.

Idi damo, nakaunget ni Nanang idi naammuanna a makitimtimpuyogak kadagiti Saksi ni Jehova. Ngem saan nga umiso ti nakaibatayan dagiti pagdandanaganna. Ita, simmayaat manen ti relasionmi ken ni Nanang. Saanakon a naliday. Imbes ketdi, addan direksion ken panggep ti biagko, ken mariknak a mapempenneken dagiti naespirituan a kasapulak.​—Mateo 5:3.

“Adu a Baro a Banag ti Nasursurok iti Biblia.”​—ISAKALA PAENIU

NAYANAK: 1939

NAKAYANAKANNA: TUVALU

PAKASARITAANNA: POLITIKO

TI NAPALABASKO: Nayanakak idiay Nukulaelae, maysa a nangayed nga isla iti Pacifico a paset itan ti Tuvalu. Dagiti umili iti isla ket domdominaran dagiti pastor a nagadal iti kinapastor iti maysa a kolehio idiay Samoa. Obligado dagiti umili nga ipaay ti kasayaatan kadagiti pastor ken kadagiti pamiliada, agraman ti pagnaedanda ken ti inaldaw a taraonda. Uray awan ti umdas a taraon dagiti umili para iti pamiliada, obligadoda latta a mangipaay iti kasapulan dagiti pastor.

Ti pastor iti islami ti mangimanmanehar iti eskuelaan iti purok ken mangisursuro iti maipapan iti relihion, matematika, ken geograpia. Malagipko pay ti nakaro a panangkabkabil ti pastor kadagiti estudiante nga uray la a daradara ti bagida. Kaskasdi, awan man la ti nakaitured nga agreklamo, uray dagiti nagannak. Madaydayaw ti pastor a kasla ket tay isu ti Dios.

Idi agtawenak iti sangapulo, napanak nageskuela iti kakaisuna nga eskuelaan ti gobierno iti  Tuvalu, nga adda iti sabali nga isla. Idi nagraduarak, nagtrabahuak iti gobierno. Dagiti isla ket paset idi ti kolonia ti Britania a pagaammo kas Gilbert ken Ellice Islands. Nagtrabahoak iti nagduduma a departamento sakbay a nagbalinak nga editor ti linawas a warnakan a kukua ti gobierno. Naannayas ti taray ti bambanag. Ngem timmanor ti problema idi impablaakko ti surat ti maysa nga agbasbasa a nangkritikar iti pannakausar ti kuarta para iti panagsagana iti isasarungkar ti Prince of Wales. Ti nagsurat saanna nga inusar ti pudno a naganna, ket kayat ti superiorko a maammuan ti pudpudno a nagan dayta a tao. Nagkedkedak a mangibaga iti dayta, ket nagdinamag dayta a panagsubang.

Di nagbayag kalpasan dayta nga insidente, pinanawak ti trabahok iti gobierno ket simrekak iti politika. Nangabakak iti eleksion idiay Nukulaelae ket nadutokanak nga agbalin a Minister of Commerce and Natural Resources. Idi a ti independensia manipud iti Britania ket magunggun-odanen dagiti umili iti isla ti Kiribati (dati a Gilbert) ken Tuvalu (dati nga Ellice), intukon kaniak ti gobernador ti posision kas pangulo ti gobierno ti Tuvalu. Ngem diak kayat nga adda pakainaigak iti turay ti kolonia ti Britania. Gapuna, pinagkedkedak dayta a tukon ket nagkandidatoak iti eleksion para iti kangatuan a saad iti gobierno uray awan suporta ti gobernador. Naabakak. Gapuna, nagsublikami ken baketko iti islami ket inkeddengmi ti agbiag kas gagangay a pumurok.

NO KASANO A BINALBALIWAN TI BIBLIA TI BIAGKO: Kadagiti isla, ti aldaw ti Domingo ket Sabbath isu a nasantuan dayta nga aldaw iti isuamin, malaksid kaniak. Dayta ti aldaw a mapanak aglayag ken agkalap. Diak kayat ti maibilang kas relihioso a tao. Kasta unay ti pannakadismaya ni Tatang ken dagiti sabsabali gapu iti dayta nga ar-aramidek. Ngem determinadoak a saan nga agpaimpluensia iti relihion.

Iti naminsan nga ipapanko idiay Funafuti​—ti isla nga ayan ti kabesera ti Tuvalu​—inawisnak ni adingko a kuyogek a tumabuno iti gimong dagiti Saksi ni Jehova. Kalpasanna, maysa a Saksi a misionero ti nangted kaniak iti adu a magasin a Pagwanawanan ken Agriingkayo! tapno basaek. Inikkannak pay iti libro a nangibutaktak iti namunganayan dagiti pagano a doktrina nga isursuro ti adu nga agkunkuna a Kristiano. Inulit-ulitko a binasa dayta a libro. Adu a baro a banag ti nasursurok iti Biblia, agraman ti kinapudno a saan nga obligado dagiti Kristiano a mangngilin iti linawas a Sabbath. a Inranudko ken baketko dagita a naammuak, ket dagus nga insardengna ti mapan iti kapilia.

Kaskasdi, diak latta kayat ti makipaset iti aniaman a relihion. Limmabas ti gistay dua a tawen, ngem diak malipatan dagiti naadalko. Idi agangay, sinuratak ti misionero idiay Funafuti ket imbagak a nakasaganaakon a mangaramid iti panagbalbaliw. Dagus a naglugan iti sumaganad a biahe ti bangka tapno umaynak tulongan a mangammo iti ad-adu pay maipapan iti Biblia. Nakapungtot ni Tatang idi naammuanna a kayatkon ti agbalin a Saksi ni Jehova. Ngem inlawlawagko kenkuana a nakapagdesisionakon gapu iti adu nga insuro kaniak dagiti Saksi maipapan iti Biblia.

NO KASANO A NAGUNGGONAANAK: Idi 1986, nabautisaranak kas Saksi ni Jehova, ken nabautisaran met ni baketko kalpasan ti makatawen. Naadal met ti dua nga annakmi ti isursuro ti Biblia ket inkeddengda ti agbalin a Saksi ni Jehova.

Ita, pakaragsakakon ti maikameng iti maysa a relihion nga umasping kadagiti Kristiano idi umuna a siglo, a dagiti mangidadaulo ket saan a natantan-ok ngem kadagiti miembro. (Mateo 23:8-12) Sipapakumbaba met a sursurotenda ti ulidan ni Jesus ken ikaskasabada ti gobierno a Pagarian ti Dios. (Mateo 4:17) Anian a yamanko ken Jehova a Dios ta inikkannak iti gundaway a mangammo iti kinapudno maipapan kenkuana ken iti organisasionna!

 “Saan nga Indiktar Dagiti Saksi no Ania ti Patiek.”​—ALEXANDER SOSKOV

NAYANAK: 1971

NAKAYANAKANNA: RUSSIA

PAKASARITAANNA: INSTRUKTOR ITI KOMBAT

TI NAPALABASKO: Naipasngayak idiay Moscow, nga isu idi ti kabesera ti Soviet Union. Nagnaed ti pamiliami iti dakkel nga apartment, ken adu kadagiti kaarrubami ti agtartrabaho iti maysa a paktoria. Malagipko pay nga ibagbagada idi a naalikutegak nga ubing, ket kunada a no saanak man a masapa a matay, agtungpalakto iti pagbaludan. Kinapudnona, idi agtawenak iti sangapulo, addaanakon iti saan a nasayaat a rekord iti polisia.

Idi agtawenakon iti 18, naayabanak nga agsoldado ket naibaonak nga agguardia iti pagbeddengan ti pagilian. Kalpasan ti dua a tawen, nagawidak ket nagtrabahoak iti maysa a paktoria. Ngem makauma ti trabahok isu a simrekak kas kameng ti bunggoy dagiti polis ti Moscow nga agtigtignay maibusor kadagiti manangriribuk. Nagbalinak nga instruktor ti manomano a pannakiranget. Timmulongak a mangtiliw kadagiti kriminal idiay Moscow ken naibaonak iti nagduduma a nariribuk a paset ti pagilian. Nakaro ti marikriknak a tension. No agawidak, adda dagiti gundaway nga agsinakami ken baketko iti pagiddaan ta amangan no madangrak bayat a matmaturogak.

NO KASANO A BINALBALIWAN TI BIBLIA TI BIAGKO: Idi makipagadalakon iti Biblia kadagiti Saksi ni Jehova, naammuak a saan a maitunos kadagiti pagalagadan ti Biblia ti naranggas a panagbiagko. Naamirisko met a masapul nga isardengko ti agsigarilio ken kontrolek ti kaadu ti in-inumek nga arak. Ngem inkalintegak a diak mabaliwan ti trabahok gapu ta awan ti sabali a paglaingak a mangkualipikar kaniak iti sabali a trabaho a pangalaak iti pangsustentok iti pamiliak. Nariknak met a diakto pulos maitured ti mangasaba, kas iti ar-aramiden dagiti Saksi.

Idi agangay, nakombinsirak met laeng nga umiso ti ibagbaga ti Biblia. Naliwliwaak iti salaysay iti Ezequiel 18:21, 22, nga agkuna: “No maipapan iti maysa a nadangkes, no kas pagarigan tumallikud kadagiti amin a basolna nga inaramidna . . . , amin a salungasingna a naaramidanna​—saandanto a malagip maibusor kenkuana.”

Ti nagustuak ket saan nga indiktar dagiti Saksi no ania ti patiek no di ket tinulongandak a mangutob iti maad-adalko. Nangalaak iti 40 wenno ad-adu pay kadagiti magasinda ket binasak dagita iti las-ud ti tallo a lawas. Gapu kadagiti naadalko, nakombisirak a nasarakakon ti pudno a relihion.

NO KASANO A NAGUNGGONAANAK: Sakbay ti panagadalko iti Biblia, agsinakami koman ken baketko. Ngem ita simmayaaten ti relasionmi kas agassawa. Naggiddankami ken baketko a nagadal iti Biblia ken inkeddengmi ti agserbi ken Jehova. Ita, naragragsaken ti pamiliami. Nakasarakak metten iti trabaho a saan a maikontra kadagiti prinsipio ti Biblia.

Idi damo a nakiramanak iti panangasaba iti binalaybalay, mariknak ti danag a kas iti nariknak idi no adda rautenmi. Ita, mariknak a kabaelakon ti agtalinaed a kalmado, uray no adda mangrurod kaniak. Iti panaglabas ti panawen, nasursurok ti agpasensia. Maladingitanak ta sinayangko ti adu a tawtawen ti biagko, ngem mariknak itan a pudpudno a makapnek ti biagko. Maragsakanak a mangusar iti pigsak nga agserbi ken Jehova a Dios ken tumulong iti sabsabali.

[Footnote]